Prashant Veer Injury ahead IPL 2026 : आयपीएल (IPL) २०२६ चा हंगाम सुरू होण्यासाठी आता अवघ्या काही महिन्यांचा अवधी शिल्लक आहे. मात्र, त्याआधीच पाचवेळा विजेतेपद पटकावणाऱ्या चेन्नई सुपर किंग्स (CSK) संघाच्या गोटात चिंतेचे वातावरण पसरले आहे. सीएसकेने लिलावात १४.२० कोटी रुपये मोजून खरेदी केलेला उत्तर प्रदेशचा अष्टपैलू खेळाडू प्रशांत वीर रणजी ट्रॉफीदरम्यान गंभीर जखमी झाला आहे. मैदानात डायव्ह मारताना खांदा दुखावला – लखनौच्या इकाना स्टेडियमवर उत्तर प्रदेश आणि झारखंड यांच्यात रणजी ट्रॉफीचा सामना सुरू आहे. या सामन्याच्या पहिल्याच दिवशी मिड-ऑफला क्षेत्ररक्षण करत असताना प्रशांत वीरने चेंडू रोखण्यासाठी उजव्या बाजूला डायव्ह मारली. या प्रयत्नात त्याच्या उजव्या खांद्याला गंभीर दुखापत झाली. मैदानातच फिजिओने त्यांची तपासणी केली, पण वेदना असह्य असल्याने त्याला तातडीने मैदानाबाहेर नेण्यात आले. ग्रेड-२ शोल्डर टियर: आयपीएलच्या सुरुवातीच्या सामन्यांना मुकणार – ‘ईएसपीएन क्रिकइन्फो’च्या वृत्तानुसार, प्रशांत वीरला ‘ग्रेड-२ शोल्डर टियर’ (खांद्याचा सांधा दुखावणे) झाला आहे. या दुखापतीतून पूर्णपणे सावरण्यासाठी त्याला किमान तीन आठवड्यांचा काळ लागण्याची शक्यता आहे. आयपीएल २०२६ स्पर्धा मार्चच्या शेवटच्या आठवड्यात सुरू होऊ शकते, अशा परिस्थितीत प्रशांत वीर चेन्नईच्या सुरुवातीच्या काही सामन्यांमधून बाहेर राहू शकतो. हेही वाचा – Abhishek Sharma Revealed : ‘कोच गंभीरच्या सांगण्यावरुन मी रोहितला…’, अभिषेक शर्माचा हिटमॅनबद्दल मोठा खुलासा सीएसकेने लावली होती १४.२० कोटींची बोली – सीएसकेचा युवा खेळाडू प्रशांत वीरला गंभीर दुखापत डिसेंबर २०२५ मध्ये झालेल्या लिलावात प्रशांत वीरसाठी अनेक फ्रँचायझींमध्ये चुरस पाहायला मिळाली होती. अखेर धोनीच्या चेन्नई सुपर किंग्सने १४.२० कोटी रुपये खर्च करून या डावखुऱ्या फिरकी अष्टपैलू खेळाडूला आपल्या ताफ्यात सामील केले. प्रशांत वीरची कामगिरी – त्याने आतापर्यंत ९ टी-२० सामन्यांत १६.६६ च्या सरासरीने १२ विकेट्स घेतल्या आहेत, तर फलंदाजीमध्ये २८ च्या सरासरीने ११२ धावा केल्या आहेत. रवींद्र जडेजासारखी भूमिका पार पाडण्याची क्षमता त्याच्यात असल्याने सीएसकेने त्याच्यावर मोठी बोली लावली होती.
