Congress News : आगामी वर्षात पाच राज्यांमधील विधानसभा आणि २०२९मध्ये लोकसभा निवडणुका होणार आहेत. या निवडणुकांपूर्वीच काँग्रेसमध्येही संघटनात्मक बदलांच्या हालचाली सुरू झाल्या आहेत. यासाठी पक्ष नेतृत्वात बदल करून कार्यकर्त्यांमध्ये नवा उत्साह भरण्याचा काँग्रेसचा मानस आहे. अनुभवी नेतृत्वाला तरुणांच्या उत्साहाची जोड देऊन भाजपच्या रणनीतीला प्रत्युत्तर देण्याची तयारी काँग्रेसने केली असल्याची चर्चा आहे. काँग्रेसचे अध्यक्ष मल्लिकार्जुन खर्गे यांचे वय आणि प्रकृती स्वास्थ्य लक्षात घेता २०२९ च्या निवडणुकीपर्यंत त्यांच्यावरील कामाचा ताण कमी करण्यासाठी पक्षाला एका तरुण चेह-याची गरज भासत आहे. भाजपने जे.पी. नड्डा यांच्यासोबत नितीन नवीन यांची राष्ट्रीय कार्याध्यक्षपदी निवड केली. आता हेच मॉडेल काँग्रेस राबवू शकते. भाजपप्रमाणेच राष्ट्रीय कार्याध्यक्ष हे नवीन पद निर्माण करण्याबाबत काँग्रेस श्रेष्ठींमध्ये गंभीर चर्चा सुरू आहे. आगामी काळात तमिळनाडू, केरळ, आसाम, पश्चिम बंगाल आणि पॉडिचेरी या पाच महत्त्वाच्या राज्यांमध्ये विधानसभा निवडणुका होणार आहेत. या निवडणुका लक्षात घेता काँग्रेस पक्ष आता तरुण अध्यक्षाबाबत विचार करत असल्याची माहिती सूत्रांनी दिली आहे. पायलट, खर्गेंचे नाव आघाडीवर महत्त्वपूर्ण जबाबदारीसाठी राजस्थानचे माजी उपमुख्यमंत्री आणि प्रियंका गांधी यांचे निकटवर्तीय मानले जाणारे सचिन पायलट यांचे नाव या पदासाठी प्रबळ दावेदार म्हणून चर्चेत आहे. सचिन पायलट यांना राष्ट्रीय राजकारणात आणल्यास राजस्थानमधील अशोक गेहलोत आणि पायलट यांच्यातील वाद मिटण्यास मदत होईल. पायलट यांची दिल्लीच्या राजकारणात मोठी भूमिका निश्चित करण्यासाठी त्यांना हे पद दिले जाऊ शकते. तसेच कर्नाटकचे मंत्री आणि मल्लिकार्जुन खर्गे यांचे पुत्र प्रियांक खर्गे यांच्या नावाचाही विचार सुरू आहे.
