मुंबई महानगरपालिका निवडणुकीला (BMC Election) अवघे १० दिवस बाकी असताना शिवसेना (उद्धव बाळासाहेब ठाकरे) ला मोठा धक्का बसला आहे. मुंबईच्या माजी महापौर आणि पक्षाच्या ज्येष्ठ नेत्यांपैकी एक असलेल्या शुभा राऊळ यांनी पक्षाच्या प्राथमिक सदस्यत्वाचा तसेच शिव आरोग्य सेनेच्या अध्यक्षपदाचा राजीनामा दिला आहे. निवडणुकीच्या तोंडावर हा राजीनामा पक्षासाठी धक्कादायक ठरला असून, त्यामुळे उद्धव ठाकरे गटाच्या अंतर्गत असंतोषाच्या चर्चांना उधाण आले आहे. राजीनामा दिल्यानंतर शुभा राऊळ यांनी भाजप नेते तथा राज्याचे मंत्री आशिष शेलार यांची मुंबईतील आमदार प्रवीण दरेकर यांच्या निवासस्थानी भेट घेतली. या भेटीमुळे शुभा राऊळ यांचा भाजपमध्ये प्रवेश होण्याच्या जोरदार चर्चा सुरू झाल्या आहेत. महायुतीच्या प्रचारात त्यांना महत्त्वाची जबाबदारी मिळण्याची शक्यता व्यक्त केली जात आहे. राजीनामा पत्रात शुभा राऊळ काय म्हणाल्या? आपल्या राजीनामा पत्रात शुभा राऊळ यांनी लिहिले आहे, “मी, शुभा उमेश राऊळ, हिंदुहृदयसम्राट स्व. बाळासाहेब ठाकरे साहेबांच्या विचारांवर आणि आपल्या नेतृत्वावर अढळ विश्वास ठेवून मनापासून शिवसेनेत कार्यरत राहिले आहे. तथापि, काही कारणास्तव मला शिवसेना अंतर्गत शिव आरोग्य सेनेच्या अध्यक्ष या पदाचा तसेच शिवसेना (उद्धव बाळासाहेब ठाकरे) पक्षाच्या प्राथमिक सदस्यत्वाचा राजीनामा सादर करत आहे, याची नोंद घ्यावी. आपणा सर्वाकडून मिळालेल्या आजपर्यंतच्या सहकार्याबद्दल मी आभार व्यक्त करत आहे.” राजीनामा देताना त्यांनी कोणतीही थेट टीका पक्षावर किंवा नेतृत्वावर केलेली नाही, मात्र “काही कारणास्तव” असा उल्लेख करून पक्षातील अंतर्गत कारणांचा संकेत दिला आहे. शुभा राऊळ कोण आहेत? शुभा राऊळ यांनी १० मार्च २००७ रोजी बृहन्मुंबई महानगरपालिकेच्या महापौरपदी निवड होऊन मुंबईच्या तिसऱ्या महिला महापौर होण्याचा मान मिळवला होता. त्या एकूण ३३ महिने (सुमारे अडीच वर्ष) महापौरपदी होत्या. दहिसर विधानसभा मतदारसंघातील भागाचे त्यांनी नगरसेविका म्हणून प्रतिनिधित्व केले. तसेच महाराष्ट्र सरकारच्या कोविड-१९ काळातील आयुष टास्क फोर्सच्या त्या सदस्य होत्या. शिवसेनेत त्यांचा दीर्घकाळ सक्रिय सहभाग राहिला असून, पक्षाच्या आरोग्य सेनेच्या त्या अध्यक्ष होत्या.
