IPL 2026 Schedule Change CSK vs GT : आयपीएल २०२६ चे २ आठवड्यांहून अधिक काळ सामने झाल्यानंतर बीसीसीआयने सोमवारी १३ एप्रिल रोजी एक प्रसिद्धीपत्रक जारी करून वेळापत्रकातील बदलांची माहिती दिली. चेन्नई सुपर किंग्स आणि गुजरात टायटन्स यांच्यातील दोन सामन्यांच्या ठिकाणांची (Venues) आपापसात अदला-बदली करण्यात आली आहे. विशेष म्हणजे सामन्यांच्या तारखा आणि वेळेत कोणताही बदल करण्यात आलेला नाही. नेमका काय झाला बदल? मूळ वेळापत्रकानुसार, २६ एप्रिल रोजी दुपारी ३.३० वाजता अहमदाबादच्या नरेंद्र मोदी स्टेडियमवर सामना होणार होता. मात्र, आता हा सामना याच दिवशी आणि याच वेळी चेन्नईच्या एम.ए. चिदंबरम स्टेडियमवर खेळवला जाईल. तसेच, २१ मे रोजी चेन्नईत होणारा ‘रिव्हर्स फिक्सचर’ सामना आता चेन्नईऐवजी अहमदाबादच्या नरेंद्र मोदी स्टेडियमवर संध्याकाळी ७.३० वाजता खेळवला जाईल. म्हणजेच, जे सामने अहमदाबादमध्ये होणार होते ते चेन्नईत आणि चेन्नईत होणारे सामने अहमदाबादमध्ये हलवण्यात आले आहेत. अहमदाबादमधील निवडणुकांचे सावट – बीसीसीआयला हा निर्णय निवडणुकांमुळे घ्यावा लागला आहे. २६ एप्रिल रोजी अहमदाबादसह गुजरातच्या अनेक भागांत स्थानिक स्वराज्य संस्थांच्या निवडणुका होणार आहेत. निवडणुकांच्या काळात पोलीस सुरक्षा आणि इतर यंत्रणांच्या उपलब्धतेअभावी अहमदाबादमध्ये सामना आयोजित करणे कठीण होते. हीच सुरक्षा अडचण लक्षात घेऊन बोर्डाने सामन्यांची ठिकाणे बदलण्याचा निर्णय घेतला आहे. हेही वाचा – Praful Hinge Record : कोण आहे प्रफुल्ल हिंगे? विदर्भाच्या पोट्ट्याने पदार्पणाच्या पहिल्याच ओव्हरमध्ये राजस्थानच्या ३ विकेट्स घेत रचला इतिहास संघीय कामगिरीचा आढावा – यंदाच्या हंगामात चेन्नई आणि गुजरात या दोन्ही संघांची सुरुवात खडतर झाली आहे. ऋतुराज गायकवाडच्या नेतृत्वाखालील चेन्नईला सलग तीन पराभवांचा सामना करावा लागला, तर चौथ्या सामन्यात त्यांनी विजयाचे खाते उघडले. दुसरीकडे, शुबमन गिलच्या गुजरात टायटन्सनेही सुरुवातीचे दोन सामने गमावले होते, परंतु सलग दोन विजयांसह ते आता फॉर्मात परतले आहेत.
