BCCI Central Contract A+ category removal : भारतीय क्रिकेट नियामक मंडळ (BCCI) आपल्या केंद्रीय करारात (Central Contract) मोठा बदल करण्याच्या विचारात आहे. येणाऱ्या नवीन रिटेनरशिप सायकलमध्ये ‘A+’ (ए प्लस) ही सर्वोच्च श्रेणी पूर्णपणे काढून टाकली जाण्याची शक्यता आहे. बीसीसीआयचे सचिव देवजीत सैकिया यांनी यासंदर्भात संकेत दिले असून, निवड समितीनेही या प्रस्तावावर शिक्कामोर्तब केल्याचे समजते. का घेतला जातोय हा निर्णय? देवजीत सैकिया यांनी या निर्णयामागचे महत्त्वाचे कारण स्पष्ट केले आहे. ते म्हणाले, “आम्ही एक श्रेणी कमी करण्याचा विचार करत आहोत, कारण ‘ए प्लस’ श्रेणीसाठी जे निकष ठरवण्यात आले आहेत, त्यात सध्याचे खेळाडू बसत नाहीत. या श्रेणीसाठी खेळाडूने तिन्ही फॉरमॅटमध्ये (कसोटी, वनडे आणि टी-२०) खेळणे आवश्यक आहे. मात्र, सध्या अनेक वरिष्ठ खेळाडू तिन्ही फॉरमॅट खेळत नाहीत.” रोहित, विराट आणि जडेजाला फटका? सध्याच्या ‘ए प्लस’ श्रेणीमध्ये रोहित शर्मा, विराट कोहली, जसप्रीत बुमराह आणि रवींद्र जडेजा या चौघांचा समावेश आहे. या खेळाडूंना वर्षाला ७ कोटी रुपये मानधन मिळते. मात्र, रोहित आणि विराटने टी-२० आंतरराष्ट्रीय क्रिकेटमधून निवृत्ती घेतल्यामुळे ते आता तिन्ही फॉरमॅट खेळत नाहीत. केवळ जसप्रीत बुमराह हा एकमेव खेळाडू सध्या तिन्ही फॉरमॅटमध्ये सक्रिय आहे. त्यामुळे ही श्रेणी रद्द झाल्यास या सुपरस्टार खेळाडूंच्या मानधनावर परिणाम होऊ शकतो. रोहित शर्मा आणि विराट कोहली सारख्या स्टार खेळाडूंच्या रिटेनरशिपवर परिणाम होणार सध्याची वेतन रचना कशी आहे? बीसीसीआय खेळाडूंना चार वेगवेगळ्या श्रेणींमध्ये मानधन देते: ग्रेड A+ : ७ कोटी रुपये वार्षिक ग्रेड A : ५ कोटी रुपये वार्षिक ग्रेड B : ३ कोटी रुपये वार्षिक ग्रेड C : १ कोटी रुपये वार्षिक हेही वाचा – Padma Awards 2026 : रोहित शर्मा आणि हरमनप्रीत कौरला ‘पद्मश्री’ पुरस्कार जाहीर! विश्वविजेत्या कर्णधारांचा मोठा बहुमान २०२४-२५ मधील बीसीसीआयचे केंद्रीय करार: ग्रेड A+: रोहित शर्मा, विराट कोहली, जसप्रीत बुमराह, रवींद्र जडेजा. ग्रेड A: मोहम्मद सिराज, केएल राहुल, शुभमन गिल, हार्दिक पांड्या, मोहम्मद शमी, ऋषभ पंत. ग्रेड B: सूर्यकुमार यादव, कुलदीप यादव, अक्षर पटेल, यशस्वी जयस्वाल, श्रेयस अय्यर. ग्रेड C: रिंकू सिंग, तिलक वर्मा, ऋतुराज गायकवाड, संजू सॅमसन, अर्शदीप सिंग, सर्फराज खान आणि इतर तरुण खेळाडू.
