Aman Khan : विजय हजारे ट्रॉफी २०२५-२६ स्पर्धेत धावांचा पाऊस पडत असताना एक नकोसा विश्वविक्रम नोंदवला गेला. पुडुचेरीचा कर्णधार आणि चेन्नई सुपर किंग्सचा नवा खेळाडू अमन खानने (Aman Khan) झारखंडविरुद्धच्या सामन्यात १० षटकांत १२३ धावा दिल्या. लिस्ट ए क्रिकेटच्या इतिहासातील हा आतापर्यंतचा सर्वात महागडा स्पेल ठरला आहे. यापूर्वी हा नकोसा विक्रम अरुणाचल प्रदेशच्या मिबोम मोसूच्या नावावर होता, ज्याने बिहारविरुद्ध ९ षटकांत ११६ धावा दिल्या होत्या. २९ डिसेंबर रोजी अहमदाबाद येथे झालेल्या या सामन्यात पुडुचेरीने नाणेफेक जिंकून प्रथम गोलंदाजी निवडली. मात्र झारखंडच्या फलंदाजांनी अमन खानसह इतर गोलंदाजांना लक्ष्य करत ५० षटकांत ७ बाद ३६८ धावा उभारल्या. कुमार कुशाग्रच्या शतकाचा (१०५ धावा) आणि अनुकूल रॉयच्या नाबाद ९८ धावांचा मोठा वाटा होता. अनुकूल रॉयने नंतर गोलंदाजी करताना २ बळी घेऊन प्लेयर ऑफ द मॅच पुरस्कार पटकावला. प्रत्युत्तरात पुडुचेरीचा डाव ४१.४ षटकांत २३५ धावांवर आटोपला आणि त्यांना १३३ धावांनी पराभव स्वीकारावा लागला. अमन खानने फलंदाजी करताना २४ चेंडूत २८ धावा केल्या, मात्र त्याची गोलंदाजी (१/१२३, इकॉनॉमी १२.३) सामन्यातील मुख्य चर्चेचा विषय ठरली. २९ वर्षीय अमन खान मुंबईतून घरगुती क्रिकेटची सुरुवात करणारा अष्टपैलू खेळाडू आहे. त्याने मुंबईकडून लिस्ट ए पदार्पण केले, मात्र सातत्यपूर्ण संधी मिळवण्यासाठी पुडुचेरीकडे स्थलांतर केले. सध्या तो पुडुचेरीचा कर्णधार आहे. आयपीएलमध्ये तो कोलकाता नाइट रायडर्स (२०२२) आणि दिल्ली कॅपिटल्स (२०२३) संघाकडून खेळला आहे. नुकत्याच झालेल्या आयपीएल २०२६ लिलावात चेन्नई सुपर किंग्सने त्याला ४० लाख रुपयांना करारबद्ध केले. हा नकोसा विक्रम अमनसाठी धक्कादायक ठरला असला तरी, त्याच्या अष्टपैलू क्षमतेवर CSKने विश्वास टाकला आहे. आगामी आयपीएल हंगामात महेंद्रसिंग धोनीच्या मार्गदर्शनाखाली तो कशी कामगिरी करतो, याकडे क्रिकेट चाहत्यांचे लक्ष लागले आहे. विजय हजारे ट्रॉफीमध्ये धावांच्या महापुरात गोलंदाजांना लक्ष्य केले जात असतानाच असे विक्रम स्पर्धेला आणखी चर्चेचे बनवत आहेत.
