पुणेकरांनो, घराबाहेर पडा! ३ वर्षांच्या प्रतीक्षेनंतर आज ‘महामतदान तब्बल तीन वर्षांपासून रखडलेल्या महापालिका निवडणुकांसाठी अखेर आज मतदान होत असून, तब्बल ३५ लाख ५१ हजार ४६९ मतदान आपला मतदानाचा हक्क बजावणार आहेत. १६३ जागांसाठी तब्बल ११५३ उमेदवार आपले नशीब आजमावत आहेत. या निवडणुकीसाठी प्रशासनाकडून ४०११ मतदान केंद्रे निश्चित केली असून, सकाळी ७.३० ते सायंकाळी ५.३० पर्यंत मतदानाची वेळ असणार आहे. शहरात सुमारे ९०६ संवेदनशील मतदान केंद्रे असून, संपूर्ण शहरात मोठा पोलीस बंदोबस्त तैनात करण्यात आला आहे. सर्व केंद्रांसाठी साहित्य वाटपाचे कामही पूर्ण झाले आहे. २०१७ च्या निवडणुकीत पुण्यात ५५ टक्के मतदान झाले होते. हा टक्का वाढविण्यासाठी प्रशासनास विशेष प्रयत्न करावे लागणार आहेत. शहराला पोलीस छावणीचे स्वरूप महापालिका निवडणुकीसाठी आज मतदान होत असून त्यासाठी पार्श्वभूमीवर शहरात कडक बंदोबस्त तैनात केला आहे. शहर, तसेच उपनगरात १२ हजार पोलिसांचा फौजफाटा तैनात असून, ९० संवेदनशील मतदान केंद्रावर अतिरिक्त बंदोबस्त असेल. अनुचित घटना रोखण्यासाठी शीघ्र कृती दल (क्विक रिस्पाॅन्स टीम), तसेच वरिष्ठ अधिकाऱ्यांबरोबर विशेष पथक (स्ट्रायकिंग फोर्स) गस्त घालेल.शहर, उपनगरात तीन हजार ९८३ मतदान केद्रे आहेत. प्रत्येक केंद्रावर एक पोलीस कर्मचारी राहणार आहेत. शहरातील ९१३ इमारतीत मतदान होणार आहे. तेथे दोन पोलीस कर्मचारीअसतील. प्रत्येक मतदान केंद्राच्या परिसरात वरिष्ठ अधिकाऱ्यांसह पोलीस निरीक्षक गस्त घालतील. मतदान शांततेत पार पाडण्यासाठी स्थानिक पोलीसासह गुन्हे शाखेची पथके तैनात असतील. मतदान सुरळीत पार पडावे यासाठी तीन हजार ४३९ प्रतिबंधात्मक कारवाया केल्या आहेत. पुणे महापालिकेचा ‘महामुकाबला’! ४ हजार केंद्रांवर मतदान यंत्रे सज्ज महापालिका निवडणुकीसाठी प्रशासकीय तयारी पूर्ण झाली आहे. शहरातील सर्व ४ हजार ११ मतदान केंद्रांवर दुपारी अधिकारी पोहचले. यावेळी अधिकाऱ्यांनी मतदान केंद्रे मतदानासाठी सज्ज केली.प्रशासनाने १५ क्षेत्रीय कार्यालयानिहाय निवडणुकीचे साहित्य नेण्याची व्यवस्था केली होती. याठिकाणी अधिकारी-कर्मचाऱ्यांना अंतिम प्रशिक्षण देण्यात आले त्यानंतर साहित्याचे वाटप करण्यात आले. यामध्ये ईव्हीएम मशीन, व्हीव्हीपॅट, कंट्रोल युनिट आदींचा समावेश होता. यानंतर मतदान केंद्रनिहाय कर्मचारी केंद्रावर रवाना झाले. या पथकामध्ये पोलिसांचाही समावेश होता. यावेळी कर्मचाऱ्यांना सूचना देण्यात आल्या. मतदान केंद्रांवर कर्मचारी पोहचल्यानंतर त्याची माहिती त्यांनी झोनल अधिकाऱ्यांना कळविली. यानंतर अधिकारी-कर्मचारी यांनी मतदान केंद्र सज्ज केले. आवश्यक ते सूचना फलक लावले. मतदारांचा गोंधळ कायम! अनेकांची नावे गायब तब्बल नऊ वर्षांनी पुणेकर महापालिका निवडणुकीसाठी मतदान करणार आहेत. मात्र, गेल्या दीड वर्षात आधी लोकसभा आणि त्यानंतर विधानसभा मतदारसंघांसाठी मतदान केलेल्या शेकडो पुणेकरांची नावे मतदार यादीतून गायब आहेत. त्यातच मतदार याद्यांच्या चुकीच्या विभाजनामुळे एकाच कुटुंबातील मतदारांची नावे वेगवेगळ्या प्रभागात आली आहेत. अनेक ठिकाणी एकाच कुटुंबातील मतदारांची नावे पाच वेगवेगळ्या केंद्रांवर आली आहेत.त्यामुळे नावे शोधताना नाव आणि मतदान केंद्र शोधताना नागरिकांची चांगलीच दमछाक पाहायला मिळत आहे. महापालिका प्रशासनाने महापालिका निवडणुकीसाठी शहरातील ९५ टक्के मतदारांना वोटर स्लिपचे वाटप केले असल्याचा दावा केला आहे. मात्र, प्रत्यक्षात शहराच्या अनेक भागांत अद्यापही प्रशासनाच्या वोटर स्पिप पोहोचलेल्या नाहीत. त्यातच मतदारांना नाव शोधण्यासाठी उपलब्ध करून देण्यात आलेल्या मोबाइल ऍप मध्येही नावे सापडत नसल्याने नागारिक हवालदिल झाले आहेत. प्रत्येक मतदान केंद्रावर वेब-कास्टिंग मतदानाच्या दिवशी संपुर्ण प्रक्रियेवर लक्ष ठेवण्यासाठी राज्य निवडणूक आयोगाच्या निर्देशाप्रमाणे सर्व मतदान केंद्रे वेब कास्टिंगद्वारे जोडण्यात आली आहेत. तसेच संपुर्ण प्रक्रियेवर बारकाईने लक्ष ठेवून तात्काळ समन्वय करण्यासाठी नियंत्रण कक्ष उभारण्यात आला असून समन्वयासाठी समन्वय अधिकारी नियुक्ती करण्यात आली आहे. मतदान प्रक्रिया मुक्त, निर्भय व पारदर्शक वातावरणात पार पाडण्यासाठी पिंपरी चिंचवड महापालिका यंत्रणा सज्ज असून मतदारांनी आपला संविधानिक हक्क बजावण्यासाठी उत्स्फुर्तपणे मतदान करून इतर पात्र मतदारांना मताधिकार बजावण्यासाठी प्रोत्साहित करावे, असे आवाहन आयुक्त तथा निवडणूक अधिकारी श्रावण हर्डीकर यांनी केले आहे. दिव्यांग मतदारांसाठी महापालिकेचा मोठा प्लॅन पिंपरी चिंचवड महापालिका सार्वत्रिक निवडणुकीसाठी गुरूवारी (दि. १५) मतदान होत असून, त्या अनुषंगाने मतदार सोयी सुविधा व दिव्यांग मतदार कक्षाच्या वतीने शहरातील ८ क्षेत्रीय कार्यालयांतर्गत ३२ प्रभागांमधील सर्व मतदान केंद्रांवर विविध सोयी-सुविधा उपलब्ध करून देण्यात आल्या आहेत. मतदान केंद्रांवर सर्व मतदारांच्या सोयीसाठी पिण्याच्या पाण्याची व्यवस्था, प्रकाश व्यवस्था, शौचालयांची सुविधा तसेच दिव्यांग मतदारांसाठी रॅम्पची व्यवस्था करण्यात आली आहे. सर्व मतदान केंद्रांवर स्वयंसेवकांची नेमणूक करण्यात आली असून, एकूण ४५३ व्हीलचेअर्स प्रभागनिहाय वाटप करण्यात आले आहेत. ज्या मतदान केंद्रांवर १० पेक्षा अधिक खोल्या आहेत, त्या ठिकाणी किमान दोन व्हीलचेअर्स उपलब्ध करून देण्यात येणार आहेत. राज्यातील 29 महानगरपालिकांसाठी आज मतदान राज्यातल्या 29 महानगरपालिकांसाठी आज मतदान होणार आहे. सकाळी साडेसात ते साडेपाच दरम्यान नागरिकांना मतदान करता येणार आहे. राज्यातल्या एकूण 2 हजार 869 जागांसाठी ही निवडणूक होतेय. तर एकूण 3 कोटी 48 लाख 79 हजार 337 मतदार आज मतदानाचा हक्क बजावणार आहेत. यासाठी 39 हजार 92 मतदान केंद्रांची व्यवस्था करण्यात आली. राज्यात एकूण 15 हजार 908 उमेदवार रिंगणात आहेत. मुंबई वगळता राज्यातल्या इतर सर्व महापालिकांमध्ये बहुसदस्यीय प्रभाग रचना आहे. बहुतांश प्रभाग हे 4 सदस्यीय असून काही प्रभाग 3 किंवा 5 सदस्यीय आहे. त्याठिकाणी मतदारांना जितक्या सदस्यांचा प्रभाग तितकी मतं द्यावी लागणार आहे. त्यांच्या ईव्हीएमवर 4 वेगवेगळ्या रंगांच्या मतपत्रिका असतील. या निवडणुकीचा निकाल उद्या म्हणजेच 16 नोव्हेंबरला लागणार आहे. माध्यम प्रतिनिधींना मतदान केंद्रात सोडण्यास आयोगाकडून मनाई मुंबईत राज्य निवडणूक आयोगाचा अजब कारभार समोर आला आहे. माध्यम प्रतिनिधींना मतदान केंद्रात सोडण्यास राज्य निवडणूक आयोगाकडून मनाई करण्यात आली आहे. त्यामुळे मतदानाच्या ऐनवेळी निवडणूक आयोगाच्या या निर्णयामुळे अनेक सवाल उपस्थित होत आहे. अधिकृत प्रवेशिका असतानाही मतदान केंद्रात माध्यम प्रतिनिधींना प्रवेश बंदी घालण्यात आली आहे. केवळ रांगेच चित्रीकरण करण्यास परवानगी असल्याची निवडणूक आयोगाची भूमिका आहे. मुंबई वगळता इतरत्र मात्र माध्यम प्रतिनिधींची कुठेही अडवणूक केली जात नाही. त्यामुळे राज्य निवडणूक आयोगाच्या कारभारावर पुन्हा एकदा प्रश्नचिन्ह उपस्थित होत आहे. हा निर्णय अत्यंत गंभीर आणि चिंताजनक – थरूर अमेरिकेचे अध्यक्ष डोनाल्ड ट्रम्प यांनी इराणशी व्यापार करणाऱ्या देशांवर अतिरिक्त २५ टक्के कर लादण्याची घोषणा केल्यानंतर एका दिवसानंतर, काँग्रेस खासदार शशी थरूर यांनी हा निर्णय अत्यंत गंभीर आणि चिंताजनक असल्याचे म्हटले. थरूर यांनी इशारा दिला की जर हे कर पूर्णपणे लागू केले गेले तर भारताला अमेरिकेत होणाऱ्या निर्यातीवर एकूण ७५ टक्क्यांपर्यंत कर लागू होऊ शकतो, ज्यामुळे भारतीय कंपन्यांना अमेरिकन बाजारपेठेत टिकून राहणे जवळजवळ अशक्य होईल. असं म्हटलं. अमेरिकेच्या या निर्णयामुळे भारतातील अनेक कामगार-केंद्रित उद्योगांवर, ज्यात रत्ने आणि दागिने, सागरी उत्पादने, कोळंबी आणि चामडे यासर्वांवर गंभीर परिणाम होतील अशी चिंता थरूर यांनी व्यक्त केली. “यावेळी, गोळी चुकणार नाही” इराणमध्ये सुरू असलेल्या निदर्शनांमध्ये, अमेरिकेचे राष्ट्राध्यक्ष डोनाल्ड ट्रम्प यांना जीवे मारण्याची धमकी देण्यात आलीय. इराणच्या सरकारी वृत्तवाहिनीने ट्रम्प यांना धमकी देणारा संदेश प्रसारित केला. वृत्तवाहिनीकडून जुलै २०२४ मध्ये पेनसिल्व्हेनियातील बटलर येथे ट्रम्प यांच्या निवडणूक रॅलीचे चित्र प्रसारित केले, जिथे गोळीबाराचा प्रयत्न झाला होता. या प्रतिमेसोबत स्क्रीनवर , “यावेळी, गोळी चुकणार नाही.” असा एक संदेश होता. इराणने अमेरिकेच्या राष्ट्राध्यक्षांना थेट दिलेला हा सर्वात उघड आणि आक्रमक इशारा आहे. ही घटना अशा वेळी घडली आहे जेव्हा डोनाल्ड ट्रम्प प्रशासन इराणविरुद्ध लष्करी कारवाईच्या पर्यायांवर विचार करत आहे. इराणी अधिकाऱ्यांनी आरोप केला आहे की अमेरिका देशातील चालू अंतर्गत अशांततेचा वापर संभाव्य लष्करी हस्तक्षेपासाठी करण्याचा प्रयत्न करत आहे.
