मुंबई : मुंबई महानगरपालिकेच्या (BMC) आगामी रणसंग्रामासाठी महाराष्ट्राच्या राजकारणात अत्यंत महत्त्वाची आणि ऐतिहासिक घडामोड घडली आहे. गेल्या अनेक वर्षांपासूनची प्रतीक्षा संपवत अखेर उद्धव ठाकरे आणि राज ठाकरे यांनी एकत्र येण्याचा निर्णय घेतला आहे. शिवसेना (UBT) आणि महाराष्ट्र नवनिर्माण सेना (MNS) यांच्यातील युतीचा मार्ग आता पूर्णपणे मोकळा झाला असून, जागावाटपाचा कळीचा मुद्दाही यशस्वीपणे निकाली काढण्यात आला आहे. ‘मातोश्री’वर खलबते – मिळालेल्या माहितीनुसार, उद्धव ठाकरे यांचे निवासस्थान असलेल्या ‘मातोश्री’वर दोन्ही पक्षांच्या वरिष्ठ नेत्यांची सुमारे अडीच तास महत्त्वाची बैठक पार पडली. या बैठकीत अत्यंत सकारात्मक चर्चा झाली. विशेषतः दादर, शिवडी, वरळी आणि मुलुंड यांसारख्या मराठी बहुल भागांतील जागांवरून दोन्ही पक्षांत असलेला पेच आता सुटला आहे. सूत्रांनी दिलेल्या माहितीनुसार, जागावाटपाचा फॉर्म्युला निश्चित झाला असून लवकरच उद्धव ठाकरे आणि राज ठाकरे यांच्या संयुक्त पत्रकार परिषदेत या युतीची अधिकृत घोषणा केली जाईल. महाविकास आघाडीचा विस्तार? या युतीमध्ये राष्ट्रवादी काँग्रेस (शरदचंद्र पवार) पक्षालाही सोबत घेण्यासाठी चर्चा सुरू असल्याचे समजते. जर हे तिन्ही पक्ष एकत्र आले, तर मुंबईच्या निवडणुकीत महायुतीसमोर मोठे आव्हान उभे राहू शकते. निवडणुकीचे वेळापत्रक – मतदान: १५ जानेवारी २०२६ निकाल: १६ जानेवारी २०२६ एकूण जागा: २३६ (नव्या सीमांकनानुसार ९ जागा वाढल्या) बहुमताचा आकडा: ११९ महिला आरक्षण: १२७ जागा महिलांसाठी आरक्षित महिला आणि आरक्षणाचा फॅक्टर ठरणार कळीचा – यावेळची निवडणूक अनेक दिग्गजांसाठी धोक्याची ठरू शकते. एकूण २३६ पैकी १२७ जागा महिलांसाठी आरक्षित करण्यात आल्या आहेत. यात अनुसूचित जाती आणि जमातीच्या महिलांसाठी विशेष आरक्षण असल्याने अनेक प्रस्थापित नगरसेवकांचे वॉर्ड बदलले आहेत. निवडणूक आयोगाने १ जुलै २०२५ पर्यंतच्या अद्ययावत मतदार यादीनुसार प्रक्रिया राबवण्याचे ठरवले असून, मुंबईतील सुमारे १.०३ कोटी मतदार आपला कौल देणार आहेत. ठाकरे बंधूंच्या या नव्या ‘केमिस्ट्री’मुळे मुंबईच्या सत्तेची चावी कुणाकडे जाणार, याकडे आता संपूर्ण राज्याचे लक्ष लागले आहे.
