महाराष्ट्रात पावसाचा जोर वाढणार;
विदर्भ-मराठवाड्यासह कोकणात यलो अलर्ट

Top 15 News :  महाराष्ट्रात आज विदर्भ, मराठवाडा आणि कोकणात विजांच्या कडकडाटासह जोरदार पावसाचा इशारा देण्यात आला आहे. हवामान विभागाने या भागांना यलो अलर्ट दिला असून, काही ठिकाणी वादळी वाऱ्यासह मुसळधार पावसाची शक्यता आहे. धाराशिव, लातूर, नांदेड, यवतमाळ, वर्धा, नागपूर, चंद्रपूर, गोंदिया आणि गडचिरोली जिल्ह्यांत पावसाचा जोर वाढू शकतो. रायगड, रत्नागिरी आणि सिंधुदुर्गातही जोरदार सरी अपेक्षित आहेत. नाशिक, पुणे, सातारा, सांगली, कोल्हापूर, अहिल्यानगर आणि सोलापूर जिल्ह्यांत तुरळक ठिकाणी मेघगर्जनेसह पावसाचा अंदाज आहे. बहुतांश भागांत ढगाळ वातावरण राहणार असून, हलक्या ते मध्यम सरी पडण्याची शक्यता आहे.

धार्मिक मिरवणुकांत फटाक्यांवर हायकोर्टाची बंदी;
ध्वनीप्रदूषण करणाऱ्यांवर कठोर कारवाईचे आदेश

मुंबई उच्च न्यायालयाने धार्मिक सण-उत्सव आणि मिरवणुकांदरम्यान होणाऱ्या ध्वनीप्रदूषणाची गंभीर दखल घेत सार्वजनिक ठिकाणी फटाके वाजवण्यास बंदी घातली आहे. ध्वनीप्रदूषणाच्या मर्यादेचे उल्लंघन करणाऱ्यांवर कठोर कारवाई करून उपकरणे जप्त करण्याचे आदेश न्यायालयाने दिले. ध्वनिक्षेपकांसाठी परवानगी बंधनकारक असून, मंडळांना ती दर्शनी भागात लावावी लागणार आहे. ढोल-ताशा पथकांमध्ये हातोड्याने वाजवण्यात येणाऱ्या सिलेंडरवरही बंदी घालण्यात आली आहे. परवानगी देताना अनामत रक्कम घेण्याच्या सूचनाही न्यायालयाने दिल्या आहेत. ध्वनीप्रदूषणाच्या तक्रारी रोखण्यासाठी उपाययोजना काय, असा सवाल न्यायालयाने राज्य सरकारला केला. सरकारने मुंबईतील 91 पोलीस ठाण्यांमार्फत भरारी पथकांकडून कारवाई होत असल्याचे सांगितले.

दुष्काळावर सरकार अ‍ॅक्शन मोडवर;
फडणवीसांसह दोन्ही उपमुख्यमंत्र्यांचा पाहणी दौरा

राज्यातील दुष्काळी परिस्थितीच्या पार्श्वभूमीवर सरकार अ‍ॅक्शन मोडवर आले आहे. मुख्यमंत्री देवेंद्र फडणवीस आज लातूर, धाराशिव आणि सोलापूर जिल्ह्यांचा दौरा करून शेतकऱ्यांच्या बांधावर जाऊन पिकांची पाहणी करणार आहेत. उपमुख्यमंत्री एकनाथ शिंदे अमरावती, अकोला आणि बुलढाणा जिल्ह्यांत दुष्काळी परिस्थितीचा आढावा घेतील. शेतकऱ्यांच्या बांधावर जाऊन पंचनामे करण्याचे निर्देश त्यांनी मंत्र्यांना दिले आहेत. दरम्यान, दुष्काळासंदर्भातील पहिली अधिसूचना शनिवारपूर्वी काढण्यात येणार असल्याचे फडणवीसांनी सांगितले. केंद्राकडे आर्थिक मदतीचा प्रस्ताव पाठवला जाणार असून, केंद्राच्या मदतीची प्रतीक्षा न करता राज्य सरकारकडून उपाययोजना सुरू राहतील, असेही त्यांनी स्पष्ट केले आहे.

‘मंडळांना आरोपी करा, 1 कोटींची मदत द्या’
लालबागचा राजा-काळाचौकी दुर्घटनांवर सदावर्ते आक्रमक

मुंबईतील लालबागचा राजा आणि काळाचौकी महागणपती परिसरातील दुर्घटनांवरून प्रसिद्ध वकील गुणरत्न सदावर्ते यांनी मोठी मागणी केली आहे. लालबागच्या राजाच्या दर्शनासाठी जळगावहून आलेल्या जयदीप मेघराज नेमाडे या तरुणाचा हृदयविकाराच्या झटक्याने मृत्यू झाला. तर काळाचौकी महागणपती मंडपाजवळ पाच जणांना विजेचा शॉक लागला, त्यात दोघांचा मृत्यू झाला. या प्रकरणी सदावर्ते यांनी होम सेक्रेटरी, पोलीस महासंचालक आणि काळाचौकी पोलिसांकडे तक्रार दाखल केली आहे. मृतांच्या कुटुंबीयांना प्रत्येकी एक कोटी रुपयांची नुकसानभरपाई द्यावी, तसेच संबंधित गणेश मंडळांना आरोपी करावे, अशी मागणी त्यांनी केली आहे.

कृषिमंत्री दत्तात्रय भरणे आज पुणे जिल्ह्याच्या दौऱ्यावर;
दौंड, बारामती, पुरंदरमध्ये पीक पाहणी

राज्यातील दुष्काळी परिस्थितीच्या पार्श्वभूमीवर कृषिमंत्री दत्तात्रय भरणे आज पुणे जिल्ह्यातील पीक परिस्थितीची पाहणी करणार आहेत. या दौऱ्यात ते दौंड, बारामती आणि पुरंदर तालुक्यांतील विविध गावांना भेटी देऊन शेतकऱ्यांच्या बांधावर जाऊन पिकांची पाहणी करतील. यंदा पावसाअभावी अनेक भागांतील पिकांची अवस्था बिकट झाली असून, शेतकऱ्यांना मोठ्या अडचणींचा सामना करावा लागत आहे. या पार्श्वभूमीवर कृषिमंत्री थेट शेतकऱ्यांशी संवाद साधून परिस्थितीचा आढावा घेणार आहेत. दरम्यान, राज्यात दुष्काळ जाहीर करण्याच्या मागणीवरून विरोधक आक्रमक झाले आहेत. त्यामुळे भरणे यांच्या पाहणी दौऱ्याकडे सर्वांचे लक्ष लागले आहे.

 ‘गुन्ह्यात तथ्य आढळल्यास कारवाई झालीच पाहिजे’;
चित्रा वाघ यांचा नरेंद्र पवार प्रकरणावर मोठा दावा Top 15 News : 

भाजप महिला मोर्चाच्या प्रदेशाध्यक्षा चित्रा वाघ यांनी भिवंडीतील नरेंद्र पवार प्रकरणावर प्रतिक्रिया दिली आहे. माजी आमदार नरेंद्र पवार यांच्याविरोधात एका महिलेच्या तक्रारीवरून सामूहिक अत्याचाराचा गुन्हा दाखल झाला असून, पोलिसांचा तपास सुरू आहे. याबाबत बोलताना चित्रा वाघ यांनी घटना धक्कादायक असल्याचे सांगितले. पोलिसांनी प्रकरणाची दखल घेतली असून निष्पक्ष तपासातून सत्य समोर येईल, असे त्यांनी म्हटले. गुन्ह्यात तथ्य आढळल्यास दोषी कोणाही असो, त्याच्यावर कारवाई झाली पाहिजे, असेही वाघ यांनी स्पष्ट केले. भाजपा अशा कृत्याला पाठीशी घालणार नाही, अशी भूमिका त्यांनी मांडली.

 मेट्रोच्या ट्रायलला वर्ष पूर्ण, सेवा अद्याप सुरू नाही;
राष्ट्रवादीचं अनोखं आंदोलन

ठाणे शहराची भविष्यातील लाईफलाईन मानल्या जाणाऱ्या मेट्रो मार्गिकेच्या ट्रायल रनला २२ सप्टेंबरला एक वर्ष पूर्ण झाले. मात्र, अद्याप मेट्रो सेवा सुरू झालेली नसल्याने राष्ट्रवादी काँग्रेस-शरदचंद्र पवार पक्ष आक्रमक झाला आहे. पक्षाच्या कार्यकर्त्यांनी मेट्रो मार्गाला पुष्पहार अर्पण करून आणि नारळ फोडून अनोखे आंदोलन केले. ‘बाप्पा राज्यकर्त्यांना सुबुद्धी दे, ठाणेकरांना मेट्रोत बसू दे’, अशा घोषणा देत सरकारचा निषेध करण्यात आला. मेट्रोचे काम संथगतीने सुरू असून बांधकामाचा दर्जा आणि नियोजनावरही कार्यकर्त्यांनी प्रश्न उपस्थित केले. घोडबंदर परिसरातील वाहतूक कोंडी दूर करण्यासाठी मेट्रो सेवा तातडीने सुरू करण्याची मागणी यावेळी करण्यात आली.

 ‘महाराष्ट्राला न लाभलेला मुख्यमंत्री’!
पुण्यातील ‘अजित सृष्टी’तून उलगडला अजित पवारांचा जीवनप्रवास

पुण्यातील कात्रज परिसरातील भारती विद्यापीठाजवळ उभारण्यात आलेला ‘अजित सृष्टी’ हा गणेशोत्सवातील देखावा चर्चेचा विषय ठरला आहे. ‘महाराष्ट्राला न लाभलेला मुख्यमंत्री’ या संकल्पनेवर आधारित या देखाव्यात अजित पवार यांच्या काटेवाडीतील बालपणापासून राजकीय प्रवासातील महत्त्वाचे टप्पे छायाचित्रांच्या माध्यमातून मांडण्यात आले आहेत. अजित पवार यांचा संघर्ष, कामाची पद्धत आणि जनतेशी असलेले नाते उलगडण्याचा प्रयत्न करण्यात आला आहे. अजितदादांचे निष्ठावंत कार्यकर्ते युवराज बेलदारे यांनी मंडळाच्या माध्यमातून हा देखावा साकारला आहे. देखावा पाहण्यासाठी नागरिकांची मोठी गर्दी होत असून, कात्रज परिसरात तो आकर्षणाचा केंद्रबिंदू ठरत आहे.

 देवरीत आदिवासी समाजाचा भव्य आक्रोश मोर्चा;
२२ मागण्यांसाठी हजारो जण रस्त्यावर

गोंदिया जिल्ह्यातील देवरी शहरात आदिवासी समाजाच्या वतीने विविध २२ मागण्यांसाठी भव्य आक्रोश मोर्चा काढण्यात आला. हजारो आदिवासी महिला, विद्यार्थी आणि नागरिक या मोर्चात सहभागी झाले होते. आंदोलकांनी देवरीच्या उपविभागीय अधिकारी कार्यालयावर धडक देत प्रशासनाला मागण्यांचे निवेदन सादर केले. आदिवासी आरक्षणाचे संरक्षण, आश्रमशाळा आणि वसतिगृहांमध्ये मूलभूत सुविधा उपलब्ध करून देण्याची मागणी करण्यात आली. तसेच वनहक्क आणि शेतजमिनींचे प्रश्न सोडवणे, आदिवासी शेतकऱ्यांना कर्जमाफी देणे, महिला आणि युवकांना रोजगाराच्या संधी उपलब्ध करून देणे, यांसह विविध मागण्या आंदोलकांनी प्रशासनासमोर मांडल्या.

बावनकुळेंच्या वक्तव्यावर युवक काँग्रेस आक्रमक;
अमरावतीत प्रतीकात्मक पुतळ्याचे दहन

काँग्रेस नेते राहुल गांधी यांच्याबाबत महसूलमंत्री चंद्रशेखर बावनकुळे यांनी केलेल्या वक्तव्याच्या निषेधार्थ अमरावतीत युवक काँग्रेसने आंदोलन केले. जिल्हाधिकारी कार्यालयासमोर कार्यकर्त्यांनी बावनकुळे यांच्या प्रतीकात्मक पुतळ्याला चपलांनी बदडत त्याचे दहन केले. यावेळी भाजप आणि बावनकुळे यांच्या विरोधात जोरदार घोषणाबाजी करण्यात आली. आक्षेपार्ह वक्तव्य करणाऱ्या नेत्यांविरोधात कारवाईची मागणीही कार्यकर्त्यांनी केली. तसेच अशा नेत्यांसाठी मनोरुग्णालय उभारून त्यांना तेथे दाखल करण्याचा इशारा युवक काँग्रेसच्या कार्यकर्त्यांनी दिला. आंदोलनादरम्यान कार्यकर्त्यांनी सरकारविरोधातही जोरदार घोषणाबाजी करत आपला संताप व्यक्त केला.

राज्यसभेच्या १० जागांसाठी १६ ऑक्टोबरला मतदान;
यूपीच्या गणितावर भाजप-सपाची प्रतिष्ठा पणाला Top 15 News : 

उत्तर प्रदेशातील राज्यसभेच्या १० जागांसाठी १६ ऑक्टोबरला निवडणूक होणार आहे. सध्या या १० जागांपैकी भाजपकडे ८, तर समाजवादी पक्ष आणि बसपकडे प्रत्येकी एक जागा आहे. उत्तर प्रदेश विधानसभेत सध्या ३९७ आमदार असून, एका राज्यसभा जागेसाठी ३७ प्रथम पसंतीची मते आवश्यक आहेत. विद्यमान संख्याबळानुसार भाजपच्या नेतृत्वाखालील एनडीएकडे २९४ आमदार, तर सपाकडे १०१ आणि काँग्रेसकडे २ आमदार आहेत. या गणितानुसार भाजपला आठ आणि सपाला दोन जागा मिळण्याचे समीकरण असल्याचे वृत्त आहे. बसपकडे विधानसभेत आमदार नसल्याने त्यांच्यासमोर आव्हान आहे.

बंगालच्या उपसागरात ‘डीप डिप्रेशन’;
13 राज्यांना पावसाचा अलर्ट

बंगालच्या उपसागरात तयार झालेले डीप डिप्रेशन आज आंध्र प्रदेश-ओडिशा किनारपट्टीवर धडकण्याची शक्यता आहे. त्यामुळे ओडिशा, आंध्र प्रदेश, छत्तीसगड आणि तेलंगणात मुसळधार ते अतिमुसळधार पावसाचा इशारा देण्यात आला आहे. काही भागांत ताशी 75 किलोमीटर वेगाने वारे वाहण्याची शक्यता आहे. IMDने आज केरळ, राजस्थान, झारखंड, ओडिशा, आंध्र प्रदेश, छत्तीसगड, तेलंगणा, सिक्कीम, महाराष्ट्र, गुजरात, पश्चिम बंगाल, आसाम आणि मेघालय या 13 राज्यांना पावसाचा अलर्ट दिला आहे. समुद्राची स्थिती खराब राहण्याची शक्यता असल्याने मच्छीमारांना समुद्रात न जाण्याचा सल्ला देण्यात आला आहे. काही भागांत पूरस्थिती निर्माण होण्याची शक्यताही आहे.

रशियन तेलावर अमेरिकेच्या १००% टॅरिफची चर्चा;
जेमी डायमन यांचा भारतासाठी स्पष्ट संदेश

अमेरिकेचे अध्यक्ष डोनाल्ड ट्रम्प यांनी लिंडसे ओ. ग्रॅहम कायद्यात रूपांतरित केला. या कायद्यानुसार रशियन तेल आणि वायूच्या प्रमुख खरेदीदारांवर १०० टक्क्यांपर्यंत टॅरिफ लावण्याचा अधिकार अमेरिकेला मिळाला आहे. या पार्श्वभूमीवर जेपी मॉर्गनचे सीईओ जेमी डायमन यांनी भारत आणि जागतिक तेल बाजाराला शिक्षा करू नये, असे म्हटले. मुंबईतील जेपी मॉर्गनच्या गुंतवणूक परिषदेदरम्यान बोलताना त्यांनी रिफायनरींना विशिष्ट प्रकारच्या कच्च्या तेलाची गरज असल्याचे सांगितले. तसेच युक्रेनला मदत करण्याचे इतर मार्ग शोधण्याची गरज असल्याचे त्यांनी नमूद केले.

श्रेयसची 16 धावांची ‘मॅचविनिंग’ खेळी;
भारताचा जपानवर 2 धावांनी थरारक विजय

सुझुकी कपमधील भारत आणि जपान यांच्यातील एकमेव टी-20 सामना पावसामुळे प्रत्येकी पाच षटकांचा झाला. भारताने प्रथम फलंदाजी करत 4 गडी गमावून 32 धावा केल्या. श्रेयस अय्यरने 12 चेंडूंत 16 धावा करत महत्त्वाची खेळी केली. लक्ष्याचा पाठलाग करताना जपानला 5 षटकांत 3 गडी गमावून 30 धावाच करता आल्या. त्यामुळे भारताने सामना 2 धावांनी जिंकला. वॉशिंग्टन सुंदरने 2 षटकांत 13 धावा देत 2 विकेट घेतल्या. मात्र, कठीण खेळपट्टीवर स्ट्राइक रोटेट करत संघाला 32 धावांपर्यंत नेल्याबद्दल श्रेयसला सामनावीर पुरस्कार देण्यात आला.

लावणीसम्राज्ञी शकुंतलाताई नगरकर यांचं निधन;
वयाच्या ६६व्या वर्षी घेतला अखेरचा श्वास Top 15 News : 

महाराष्ट्राच्या लोककलेचा मानबिंदू आणि ज्येष्ठ लावणीसम्राज्ञी शकुंतलाताई नगरकर यांचे वयाच्या ६६व्या वर्षी निधन झाले. गेल्या काही काळापासून त्या कर्करोगाशी झुंज देत होत्या. अहमदनगर जिल्ह्यातील शेतकरी कुटुंबात १९६० मध्ये जन्मलेल्या शकुंतलाताईंना आई छबूबाई नगरकर यांच्याकडून लावणीचा वारसा मिळाला. अवघ्या १२व्या वर्षी त्यांनी कलाक्षेत्रात पदार्पण केले. १९७४ मध्ये मुंबईतील लालबागच्या हनुमान थिएटरमधून त्यांच्या लावणी कारकिर्दीला सुरुवात झाली. कथकचे शास्त्रोक्त शिक्षण घेत त्यांनी बैठकीच्या लावणीला नवी ओळख मिळवून दिली. ‘लावणी के रंग’ आणि ‘लव्ह अँड लावणी’सारख्या प्रयोगांतून त्यांनी लावणी नव्या पिढीपर्यंत पोहोचवली. विविध पुरस्कारांनीही त्यांचा गौरव झाला होता.