राज्यात सणासुदीत FDA ची धडक कारवाई;
30 परवाने निलंबित, 50 टन साठा जप्त

Top 15 News : गणेशोत्सव आणि गौराईच्या सणाच्या पार्श्वभूमीवर अन्न व औषध प्रशासनाने राज्यभरात धडक कारवाई केली. अन्न सुरक्षा आयुक्त तुकाराम मुंढे यांच्या मार्गदर्शनाखाली झालेल्या कारवाईत मिठाई, दूधजन्य पदार्थ, खाद्यतेल, ड्रायफ्रूट्स, नमकीन आणि इतर अन्नपदार्थांचा 50 टन साठा जप्त करण्यात आला. या साठ्याची किंमत सुमारे 1 कोटी 19 लाख रुपये आहे. तसेच मुंबई, कोकण, पुणे आणि संभाजीनगर विभागातील 30 अन्न आस्थापनांचे परवाने निलंबित करण्यात आले. 26 आस्थापनांवर कारवाई करत 22 एफआयआर दाखल, 30 जणांना अटक आणि 3 आस्थापने सील करण्यात आली.

आमदारांशी उद्धटपणा भोवणार!
अधिकाऱ्यांवर होणार थेट शिस्तभंगाची कारवाई

महाराष्ट्र सरकारने आमदार आणि खासदारांशी संबंधित प्रशासकीय कामकाजाबाबत नवी मार्गदर्शक तत्त्वे जारी केली आहेत. लोकप्रतिनिधींच्या पत्रांकडे दुर्लक्ष करणाऱ्या किंवा त्यांचा अवमान करणाऱ्या अधिकाऱ्यांवर शिस्तभंगाची कारवाई होऊ शकते.काल जारी केलेल्या नियमांनुसार, लोकप्रतिनिधींच्या पत्रांवर कार्यवाही करून जास्तीत जास्त दोन महिन्यांत अंतिम उत्तर देणे बंधनकारक आहे. अधिकाऱ्यांनी फोनवर आदरयुक्त भाषा वापरणे, कार्यक्रमांच्या निमंत्रणात अचूक नावे देणे आणि प्रोटोकॉलनुसार बैठक व्यवस्था करणे आवश्यक आहे. दर महिन्याच्या पहिल्या आणि तिसऱ्या गुरुवारी दोन तास लोकप्रतिनिधींच्या भेटीसाठी राखीव ठेवण्याचे निर्देशही देण्यात आले आहेत.

महाराष्ट्रात पुन्हा पावसाचा अंदाज;
७ जिल्ह्यांना येलो अलर्ट

महाराष्ट्रात परतीच्या पावसाला सुरुवात झाली असून काही भागांत उन्हाचा चटका कायम आहे. हवामान विभागाच्या अंदाजानुसार आज कोकण, मध्य महाराष्ट्र आणि मराठवाड्यातील काही भागांत पावसाची शक्यता आहे. रायगड, रत्नागिरी, नाशिक घाटमाथा, पुणे, सातारा, कोल्हापूर आणि सांगली या जिल्ह्यांना विजांच्या कडकडाटासह पावसाचा येलो अलर्ट देण्यात आला आहे. दुपारनंतर मेघगर्जनेसह वादळी पावसाच्या सरी कोसळू शकतात. दुसरीकडे, राज्यातील काही शहरांमध्ये तापमान ३५ अंशांच्या पुढे गेले आहे. सोलापुरात ३६.६ अंश कमाल तापमानाची नोंद झाली असून अमरावती, छत्रपती संभाजीनगर आणि अकोलाही तापमान वाढले आहे.

SIR वर संजय गायकवाडांचा काँग्रेसला टोला;
म्हणाले, “उगाच राजकारण करू नये”

शिवसेनेचे बुलढाण्याचे आमदार संजय गायकवाड यांनी SIR प्रक्रियेवरून विरोधकांवर टीका केली. त्यांच्या विधानसभा मतदारसंघात SIRपूर्वी मोठ्या प्रमाणात दुबार आणि कथित बोगस मतदार असल्याचा दावा त्यांनी केला. SIR प्रक्रियेमुळे मतदारसंख्या कमी झाली असून, निवडणूक आयोगाचे काम योग्य असल्याचे गायकवाड म्हणाले. बीएलओ घराघरात जाऊन पडताळणी करत असल्याने खरी मतदार यादी तयार होत असल्याचा दावाही त्यांनी केला. निवडणूक आयुक्त ज्ञानेश कुमार यांच्या राजीनाम्याच्या मागणीवरून त्यांनी विरोधकांवर निशाणा साधला. रोहित पवारांवरही त्यांनी खोचक टीका केली. दरम्यान, दुष्काळाच्या पार्श्वभूमीवर कुंभमेळा थांबवण्याची गरज नसल्याचेही गायकवाड यांनी स्पष्ट केले.

वृक्षारोपणासाठीही परवानगी का? ;
सयाजी शिंदेंचा वन विभागाला सवाल Top 15 News :

अभिनेते सयाजी शिंदे यांनी महाराष्ट्रातील वृक्षारोपणाच्या परवानगी प्रक्रियेवर नाराजी व्यक्त केली आहे. नागपूर जिल्ह्यातील बेला ग्रामपंचायतीने सह्याद्री देवराई फाऊंडेशनच्या सहकार्याने गावालगत देवराई उभारण्यासाठी वन विभागाकडे जागेची मागणी केली. मात्र, संबंधित जागा राखीव वनक्षेत्र असल्याचे सांगत वन विभागाने परवानगी नाकारल्याचे शिंदे यांनी म्हटले आहे. विशेष म्हणजे, या जागेवर झाडे नसून अतिक्रमण करून शेती केली जात असल्याचा त्यांचा आरोप आहे. काही दिवसांपूर्वी शिंदे यांनी मुख्यमंत्री देवेंद्र फडणवीस यांची भेट घेतली होती. मुख्यमंत्र्यांनी जिल्हाधिकाऱ्यांना फाऊंडेशनला नियमांनुसार सहकार्य करण्याचे निर्देश दिल्याचेही शिंदे यांनी सांगितले.

 दिवाळीपर्यंत शेतकऱ्यांच्या खात्यात मदत जमा होणार;
चंद्रशेखर बावनकुळेंचा दावा

महसूल मंत्री चंद्रशेखर बावनकुळे यांनी अर्धापूर तालुक्यातील दुष्काळी भागाची पाहणी केली. यावेळी महायुती सरकार शेतकऱ्यांच्या पाठीशी खंबीरपणे उभं असल्याचं त्यांनी सांगितलं. दिवाळीपर्यंत शेतकऱ्यांच्या खात्यात कोरड्या दुष्काळाची मदत जमा होईल, असा विश्वास बावनकुळे यांनी व्यक्त केला. तसेच, दुष्काळग्रस्त भागातील पंचनामे करण्यात आल्यास त्याचा शेतकऱ्यांना मदत मिळण्यासाठी फायदा होईल, असंही त्यांनी स्पष्ट केलं.

पर्ससीन मासेमारीविरोधात कठोर बडगा;
मत्स्य विभागाची सलग तिसरी कारवाई

सिंधुदुर्गातील तारामुंबरी आणि कुणकेश्वर परिसरात अवैध पर्ससीन मासेमारीविरोधात मत्स्यव्यवसाय विभागाने सलग तिसरी मोठी कारवाई केली. रत्नागिरीची ‘इब्राहिम युसूफ’ नौका जप्त करून देवगड बंदरात आणण्यात आली. तपासणीदरम्यान नौकेत २० परप्रांतीय खलाशी आढळले. किनाऱ्यालगत अवैध मासेमारी केल्याप्रकरणी महाराष्ट्र सागरी मासेमारी अधिनियमांतर्गत कारवाई सुरू आहे. दरम्यान, ‘हरिकृपा-१’ ही मिनी पर्ससीन नौका पथकाला पाहताच निघून गेली. या नौकेवरही कायदेशीर कारवाई प्रस्तावित आहे. तीन ते चार वाव पाण्यात अवैध मासेमारी होत असल्याची माहिती मिळाल्यानंतर ही कारवाई करण्यात आली.

 भिवंडीत स्वीकृत नगरसेवकांच्या ९ जागांसाठी ३७ अर्ज;
अंतिम नावांकडे लक्ष

भिवंडी-निजामपूर महानगरपालिकेतील ९ स्वीकृत नगरसेवकांच्या जागांसाठी ३७ अर्ज दाखल झाले आहेत. १६ ते २८ सप्टेंबरदरम्यान अर्ज प्रक्रिया पार पडली. महापालिकेत ९० निवडून आलेले नगरसेवक असल्याने नियमानुसार नऊ स्वीकृत नगरसेवकांची निवड होणार आहे. पक्षांच्या संख्याबळानुसार काँग्रेसला ३, भाजपला २, राष्ट्रवादी काँग्रेस, शिवसेना, समाजवादी पक्ष आणि कोणार्क विकास आघाडीला प्रत्येकी एक जागा मिळणार आहे. त्यामुळे ३७ अर्जांमधून अंतिम नऊ नावं कोणती, याकडे राजकीय वर्तुळाचे लक्ष लागले आहे. आगामी महासभेत या नावांची अधिकृत घोषणा होणार आहे.

ज्ञानेश कुमारांच्या राजीनाम्यासाठी काँग्रेस आक्रमक
रत्नागिरीत काँग्रेसचे आंदोलन

मुख्य निवडणूक आयुक्त ज्ञानेश कुमार यांच्या कार्यपद्धतीविरोधात रत्नागिरीत काँग्रेसने आंदोलन केलं. जिल्हाध्यक्ष सोनलक्ष्मी घाग यांच्या नेतृत्वाखाली जिल्हाधिकारी कार्यालयाबाहेर निदर्शने करण्यात आली. मतदार याद्यांच्या विशेष सखोल पुनरीक्षण प्रक्रियेत पात्र मतदारांची नावे वगळली जात असल्याचा आरोप काँग्रेसने केला. निवडणूक आयोगाच्या कार्यपद्धतीवर प्रश्न उपस्थित करत ज्ञानेश कुमार यांच्या राजीनाम्याची मागणी करण्यात आली. तसेच निवडणूक आयोग सत्ताधाऱ्यांच्या फायद्यासाठी काम करत असल्याचा आरोप काँग्रेस नेत्यांनी केला. यासंदर्भातील निवेदन जिल्हाधिकाऱ्यांना देण्यात आलं.

नरेंद्र पवारांचा अटकपूर्व जामीन अर्ज फेटाळला
आरोपी,तपास अधिकाऱ्यांचा युक्तिवाद ऐकल्यानंतर निर्णय Top 15 News :

भिवंडीतील पडघा पोलीस ठाण्यात दाखल सामूहिक अत्याचार प्रकरणात भाजपचे माजी आमदार नरेंद्र पवार यांना न्यायालयाकडून धक्का बसला आहे. भिवंडी अतिरिक्त जिल्हा सत्र न्यायालयाने त्यांचा अटकपूर्व जामीन अर्ज फेटाळला. न्यायाधीश एन. के. कारंडे यांनी याबाबत निर्णय दिला. यापूर्वी २३ सप्टेंबरला आरोपींचा अंतरिम जामीन अर्जही फेटाळण्यात आला होता. २४ सप्टेंबरला आरोपी आणि तपास अधिकाऱ्यांचा युक्तिवाद ऐकल्यानंतर न्यायालयाने निर्णय राखून ठेवला होता. अखेर काल न्यायालयाने नरेंद्र पवारांचा अटकपूर्व जामीन अर्ज नामंजूर केला.

टाटा सन्सच्या लिस्टिंगला ब्रेक? ;
दोन कंपन्यांच्या विलिनीकरणाचा प्लॅन

टाटा ग्रुपमध्ये सुरू असलेल्या घडामोडींमध्ये आता टाटा सन्सच्या फेररचनेचा मुद्दा चर्चेत आला आहे. टाटा ट्रस्टने टाटा सन्सला शेअर बाजारात लिस्ट करण्यापासून रोखण्यासाठी दोन कंपन्यांच्या विलिनीकरणाचा प्रस्ताव दिल्याचे वृत्त आहे. त्यानुसार टाटा इलेक्ट्रॉनिक्स सिस्टीम सोल्यूशन्स आणि टाटा कन्सल्टिंग इंजिनिअर्स यांचे टाटा सन्समध्ये विलिनीकरण करण्याचा प्रस्ताव आहे. टाटा ट्रस्टकडे टाटा सन्समध्ये 66 टक्के हिस्सा आहे. प्रस्तावित फेररचनेमुळे टाटा सन्सला आरबीआयच्या एनबीएफसी आणि सीआयसी नियमांच्या कक्षेबाहेर आणण्याचा प्रयत्न केला जाणार असल्याचे सांगितले जात आहे. मात्र, यासाठी आरबीआयची मंजुरी आवश्यक असेल.

पश्चिम बंगालमध्ये TMCला धक्का;
१०० हून अधिक कार्यकर्ते काँग्रेसमध्ये

पश्चिम बंगालच्या मालदा जिल्ह्यात तृणमूल काँग्रेसला धक्का बसला आहे. महिषबाथानी परिसरात १०० हून अधिक TMC कार्यकर्त्यांनी काँग्रेसमध्ये प्रवेश केला. यामध्ये १३ पंचायत सदस्य, एक पंचायत समिती सदस्य आणि पक्षाच्या स्थानिक पदाधिकाऱ्यांचा समावेश आहे. पोटनिवडणुकांच्या पार्श्वभूमीवर झालेल्या या पक्षप्रवेशामुळे काँग्रेसची स्थानिक ताकद वाढल्याचे पक्षाकडून सांगण्यात आले. दरम्यान, पश्चिम बंगालमधील नंदीग्राम आणि रेजीनगर मतदारसंघांत ६ ऑक्टोबरला मतदान, तर ९ ऑक्टोबरला मतमोजणी होणार आहे. त्यामुळे या पक्षांतराची राजकीय चर्चा रंगली आहे.

अमेरिका-चीन ट्रेड ट्रूस;
भारतासाठी धोका की संधी?

अमेरिका आणि चीनमधील व्यापार तणावाला मोठा ब्रेक लागला आहे. डोनाल्ड ट्रम्प आणि शी जिनपिंग यांच्या चर्चेनंतर दोन्ही देशांनी सुमारे 60 अब्ज डॉलरच्या वस्तूंवरील आयात शुल्क कमी करण्याचा निर्णय घेतला. चीन मका, गहू, मांस, डेअरी आणि वैद्यकीय उपकरणांवरील शुल्क कमी करणार आहे, तर अमेरिका चीनमधील घरगुती वस्तू, खेळणी आणि इतर उत्पादनांवरील टॅरिफ कमी करणार आहे. या करारामुळे चीन पुन्हा अमेरिकन बाजारात मजबूत होऊ शकतो. त्यामुळे ‘चीन प्लस वन’ धोरणातून भारताला मिळणाऱ्या संधींवर परिणाम होण्याची शक्यता आहे. मात्र कृषी आणि हायटेक क्षेत्रात भारतासाठी संधी कायम आहेत.

विथ्या रामराजची ऐतिहासिक कामगिरी;
४२ वर्षे जुना पी.टी. उषांचा विक्रम मोडला

भारतीय धावपटू विथ्या रामराजने आशियाई क्रीडा स्पर्धेत ४०० मीटर हर्डल्समध्ये कांस्यपदक जिंकत इतिहास रचला. तिने ५४.७५ सेकंदांची वेळ नोंदवत पी.टी. उषांचा ४२ वर्षे जुना ५५.४२ सेकंदांचा राष्ट्रीय विक्रम मोडला. विक्रम मोडल्यानंतर विथ्याने मैदानातच नाचून आनंद साजरा केला. या स्पर्धेतील तिचं हे दुसरं पदक असून यापूर्वी तिने मिश्र ४x४०० मीटर रिलेमध्ये रौप्यपदक जिंकलं होतं. ४०० मीटर हर्डल्समध्ये सलग दुसऱ्यांदा कांस्यपदक जिंकत तिने भारताचं या प्रकारातील पदकांचं सातत्य कायम ठेवलं.

श्रुती मराठेने दिलं विद्याधर जोशींना उत्तर;
म्हणाली, “घरी बसून प्रश्नांची उत्तरं मिळत नाहीत” Top 15 News :

पुण्यातील ‘कलावंत ढोलताशा पथका’वर अभिनेते विद्याधर जोशी यांनी सोशल मीडियावर प्रश्न उपस्थित केले. विसर्जन मिरवणुकीत कलाकार किती वेळ वादन करतात आणि रील्समध्ये दिसतो तितक्याच जोशात ते वादन करतात का, असा सवाल त्यांनी केला. यावर अभिनेत्री श्रुती मराठेने उत्तर दिलं. “दीड महिन्यांची प्रॅक्टिस, ११ दिवसांत १४ वेळा वादन आणि शेवटच्या दिवशी जवळपास साडेसात तासांची विसर्जन मिरवणूक एवढं आम्ही करतो,” असं तिने सांगितलं. यावर विद्याधर जोशी यांनी तिच्या उत्तराबद्दल आभार मानत आपला प्रश्न स्पष्ट झाल्याचं म्हटलं.