हा पक्षप्रवेश शिंदेंसाठी ‘गेमचेंजर’ ठरणार? Top 10 News: राज्यातील विधानसभा निवडणुकीला साडेतीन वर्षे अद्याप शिल्लक आहेत. असं असतानाच राजकीय स्पर्धा आतापासूनच सुरू झाली आहे. विधानसभेसाठी एकनाथ शिंदे यांनी बेरजेचे राजकारण सुरू केले आहे. म्हणूनच पंढरपुरात भगीरथ भालके आणि अनिल सावंत यांना पक्ष प्रवेश देण्यात येत आहे. एकनाथ शिंदे यांनी आतापासूनच टार्गेट विधानसभा हे लक्ष्य ठेवले आहे. पंढरपुरात एकनाथ शिंदे यांच्या शिवसेनेत प्रवेश करत असलेले भगीरथ भालके, अनिल सावंत यांनी थेट विधानसभेचे रणशिंग फुंकले आहे. 2029 सालचा पंढरपूरचा आमदार शिंदेंच्या विचाराचा होईल अशी घोषणा भालके यांनी केली आहे. त्यामुळे पंढरपुरात राजकीय चुरस आत्तापासूनच सुरू झाल्याचं पाहायला मिळतंय. खरातचा मुक्काम आयुष्यभर कारागृहात ? नाशिकमधील विकृत भोंदूबाबा अशोक खरात याची गेल्या काही दिवसांपासून पोलिसांच्या विशेष तपास पथकाकडून रोज चौकशी सुरु आहे. या चौकशीत आतापर्यंत अनेक धक्कादायक माहिती समोर आली आहे. आता अशोक खरातवर कठोर कारवाई करण्याच्या हालचाली सुरु करण्यात आल्या आहेत. अशोक खरातकडून दोन-तीन नेत्यांच्या फोटोवर फुली मारण्यात आली होती. मात्र दिवंगत उपमुख्यमंत्री अजित पवार यांच्या फोटोवर फुली नसल्याची माहिती समोर आली आहे. अशोक खरात प्रकरणात सरकारला महत्वाचे पुरावे हाती लागले आहेत. त्यामुळे अशोक खरातचा मुक्काम आयुष्यभर कारागृहात राहील, अशी तगडी केस उभी करण्याचे प्रयत्न सरकारकडून सुरु आहेत, अशी केंद्रीय गृहमंत्रालयाच्या उच्चस्तरीय सूत्रांची माहिती आहे. सातबाऱ्यावरील पीक नोंदींसाठी नवीन नियमावली ई-पीक पाहणी प्रकल्पाच्या अंमलबजावणीत होत असलेली दिरंगाई आणितांत्रिक गोंधळ दूर करण्यासाठी महसूल व वन विभागाने मोठा निर्णय घेतला आहे. नव्या शासन परिपत्रकाद्वारे सर्वच संबंधित यंत्रणांना स्पष्ट इशारा देण्यात आला असून, आता केवळ कागदी प्रक्रिया न चालता प्रत्यक्ष मैदानात उतरून १०० टक्के अचूक नोंदणी करणे बंधनकारक करण्यात आले आहे. जिल्हाधिकाऱ्यांपासून ते गावपातळीवरील कर्मचाऱ्यांपर्यंत सर्वांना जबाबदारी निश्चित करण्यात आली आहे. नवीन निर्णयानुसार पीक पाहणीची संपूर्ण कार्यपद्धती बदलण्यात आली आहे. विनापरवाना पुतळा उभारल्यास FIR दाखल होणार सोलापूर जिल्ह्यात विनापरवाना पुतळा उभारल्यास थेट एफआयआर दाखल करून 4 तासात पुतळा हटवणार, असा मोठा निर्णय जिल्हा प्रशासनाने घेतला आहे. यासह विनापरवाना उभारण्यात आलेल्या पुतळ्याची माहिती लपवल्यास सात दिवसात पोलीस पाटलाचे निलंबन देखील होणार असल्याची माहिती आहे. जिल्ह्यातील विनापरवाना उभारण्यात येणाऱ्या पुतळ्यांच्या प्रकरणावर जिल्हाधिकारी, पोलीस अधीक्षक, जिल्हा परिषदेचे सीईओ यांचे संयुक्त परिपत्रक जारी करण्यात आला आहे. दरम्यान, घटनेची पूर्वकल्पना न दिल्यास ग्रामपंचायत सदस्यांच्या विरोधात देखील अपत्रतेचा प्रस्ताव सादर केला जाणार असल्याची माहिती आहे. मागील महिन्याभरात सोलापूर जिल्ह्यात विना परवानगी बसवण्यात आलेल्या पुतळा प्रकारनंतर प्रशासनाकडून हे परिपत्रक जारी करण्यात आले आहे. त्यामुळे अलीकडे घडलेल्या महापुरुषांच्या पुतळ्यांच्या प्रकरणावरून सोलापूर जिल्हा प्रशासनाने ठोस पावले उचलत थेट कारवाईचे निर्देश दिले आहे. सह्याद्री एक्सप्रेसवर दरोडा Top 10 News: सातारा जिल्ह्यातील कराडमध्ये मध्यरात्री सह्याद्री एक्सप्रेसवर दरोडा पडला आहे. रेल्वेच्या सिग्नलमध्ये बिघाड करून दरोडा घालण्यात आला. कराड तालुक्यातील शेणोली स्टेशन परिसरातील घटनेने खळबळ उडाली आहे. मिरज लोहमार्ग पोलिसांकडून या घटनेचा तपास सुरू करण्यात आला आहे. कोल्हापूरहून पुण्याला निघालेल्या सह्याद्री एक्सप्रेस शेणोली स्टेशनजवळआली असता दरोडा पडला. सातारा आणि सांगली जिल्हा हद्दीपासून काही अंतरावर घटना घडली आहे. सिग्नलशी संशयितांनी छेडछाड करत सिग्नल बंद पडला होता. सिग्नल बंद असल्याने रेल्वे थांबली त्यानंतर दरोडेखोर रेल्वेमध्ये शिरले त्यांनी प्रवाशांचे सोने आणि मोबाईल फोन लुटून नेले. काही प्रवाशांनी चोरट्यांना रोखण्याचा प्रयत्न केला, पण हत्यारांचा धाक दाखवत त्यांना लूटले.घटनेनंतर माहिती समजताच मिरज लोहमार्ग रेल्वे पोलिसांनी तपास सुरू केला आहे. या घटनेनंतर सह्याद्री एक्स्प्रेस विलंबाने पुण्याच्या दिशेने रवाना झाली. बँकेच्या कर्मचाऱ्यांची शेतकऱ्याला मारहाण पुणे जिल्हा मध्यवर्ती सहकारी बँकेच्या मलठण शाखेतील एका कर्मचाऱ्याचा मारहाणीचा व्हिडिओ सध्या सोशल मीडियात प्रचंड व्हायरल होत आहे. हा कर्मचारी याच बँकेचा असल्याचं ही समोर आलं आहे. जो व्हिडिओ व्हायरल झाला आहे, त्या व्हिडिओमध्ये मात्र संबंधित बँक कर्मचारी वरिष्ठांकडे तक्रार करणाऱ्या शेतकऱ्याला जमिनीवर पाडून मारताना दिसत आहे. शिवाय अतिशय वाईट भाषेमध्ये त्याला शिवीगाळ देखील करताना दिसत आहे. हा व्हिडीओ व्हायरल झाल्यानंतर शेतकरी वर्गात प्रचंड संताप व्यक्त केला जात आहे. या कर्मचाऱ्या विरुद्ध तातडीने कडक कारवाई केली जावी अशी मागणी ही केली जात आहे. अमेरिका आणि इराणची शांती वार्ता फिस्कटली Top 10 News: Top 10 News: गेल्या अनेक तासांपासून पाकिस्तानमधील इस्लामाबादमध्ये अमेरिका आणि इराण यांच्यात शांती वार्ता सुरु होती. या शांती वार्ताकडे संपूर्ण जगाचं लक्ष लागलं होतं. अमेरिका आणि इराणच्या शिष्टमंडळात पाकिस्तानमध्ये साधारण 21 तास चर्चा झाली. परंतु आता ही वार्ता फिस्कटल्याची माहिती समोर आली आहे. पाकिस्तानमधील इस्लामाबाद येथे अमेरिका आणि इराण यांच्यात सुरू असलेल्या शांतता चर्चेसंदर्भात प्रसारमाध्यमांना संबोधित करताना, अमेरिकेचे उपराष्ट्रपती जे.डी. व्हान्स यांनी सांगितले की, या चर्चेतून कोणताही निष्कर्ष निघालेला नाही. आम्ही येथे प्रामाणिक हेतूने आलो होतो. परंतु इराण कराराच्या अटी स्वीकारण्यास तयार नाही, असंही जे.डी. व्हान्स म्हणाले. तसेच आम्ही अमेरिकेला परत जात आहे, जिथे मी राष्ट्राध्यक्ष डोनाल्ड ट्रम्प यांना या परिस्थितीची माहिती देईन, असं जे.डी.व्हान्स यांनी माहिती दिली. तर अमेरिकेच्या अवास्तव मागण्यांमुळे चर्चा निष्फळ ठरल्याचा दावा इराणकडून करण्यात आला आहे. सलग 3 पराभवानंतर चेन्नईचा पहिला विजय चेन्नईच्या एम. ए. चिदंबरम स्टेडियमवर खेळल्या गेलेल्या आयपीएल 2026 मधील 18 व्या सामन्यात यजमान चेन्नई सुपर किंग्सने अखेर विजयाचा गुलाल उधळलाय. सलग तीन पराभवांच्या धक्क्यातून सावरत, ऋतुराज गायकवाडच्या नेतृत्वाखाली चेन्नईने दिल्ली कॅपिटल्सचा 23 धावांनी पराभव केला आणि स्पर्धेत दमदार पुनरागमन केलं. या विजयाचा खरा शिल्पकार ठरला तो म्हणजे यष्टीरक्षक फलंदाज संजू सॅमसन, ज्याने आपल्या बॅटने दिल्लीच्या गोलंदाजांचा अक्षरशः धुव्वा उडवला. चेन्नई सुपर किंग्स संघाला आरसीबी, पंजाब किंग्स आणि राजस्थान रॉयल्सकडून मोठ्या पराभवांना सामोरं जावं लागल होत. दिल्लीने आपला सलग दुसरा सामना गमावला. सीएसकेने 20 षटकांत दोन गडी गमावून 212 धावा केल्या. पण दिल्ली कॅपिटल्स निर्धारित षटकांत केवळ 189 धावाच करू शकली. यामध्ये केवळ ट्रिस्टन स्टब्सने 60 धावांची खेळी केली. या विजयासह, चेन्नई सुपर किंग्सने गुणतालिकेत 10 व्या स्थानावरून 9 व्या स्थानावर झेप घेत दोन गुणांच खात उघडलय. आशा भोसले रुग्णालयात दाखल भारतीय संगीत क्षेत्रातील दिग्गज गायिका आशा भोसले यांना मुंबईतील ब्रीच कँडी हॉस्पिटलमध्ये दाखल करण्यात आले आहे. त्यांच्यावर तज्ज्ञ डॉक्टरांच्या देखरेखीखाली उपचार सुरू आहेत. ही माहिती समजताच देशभरातील त्यांच्या चाहत्यांमध्ये काळजीचे वातावरण पसरले आहे. दरम्यान, त्यांच्या प्रकृतीबाबत त्यांची नात जनाई भोसले हिने अधिकृत प्रतिक्रिया देत सद्यस्थिती स्पष्ट केली आहे. आशा भोसले यांना रुग्णालयात का दाखल करावे लागले, याबाबत जनाई भोसले हिने महत्त्वाची माहिती दिली आहे. जनाईने सांगितले की, कमालीचा थकवा जाणवत असल्यामुळे आणि छातीत संसर्ग झाल्यामुळे आशाताईंना रुग्णालयात भरती करण्याचा निर्णय घेण्यात आला. सध्या त्यांच्यावर योग्य ते उपचार सुरू आहेत. सर्व काही लवकरच ठीक होईल आणि प्रकृतीत सुधारणा होताच आम्ही तुम्हाला त्याबद्दलची सकारात्मक माहिती देऊ, असा विश्वास जनाईने व्यक्त केला आहे. ‘बिग बॉस’च्या घरातलं धक्कादायक एव्हिक्शन ‘बिग बॉस मराठी’चा सहावा सीझन सध्या अंतिम टप्प्यात आलाय. एककीडे घराला टॉप सहा स्पर्धक मिळालेत. तर, दुसरीकडे एका सदस्यानं घरातून एग्झिट घेतलीय. यंदाच्या सीझनचा शेवटचा भाऊचा धक्का काल पार पडला. त्यावेळी जिला टीआरपी क्वीन म्हणून ओळखलं जातं आणि जिनं घरात आल्यापासूनच सर्वांना आपल्या तालावल नाचवलं, ती राखी सावंत घराबाहेर गेली. खरं तर, या आठवड्यात राखी सावंतसोबत विशाल कोटियन, राकेश बापट, अनुश्री माने आणि दिपाली सय्यद हे स्पर्धक नॉमिनेट झाले होते. तर, रेवा कौरासे ही कॅप्टन असल्यामुळे सेफ होती, तर तन्वी कोलतेनं ‘तिकीट टू फिनाले’ जिंकल्यामुळे तीसुद्धा सेफ होती. अशातच फिनालेच्या अगदी जवळ येऊन राखी सावंतचा ‘बिग बॉस मराठी’चा प्रवास संपला. ‘बिग बॉस मराठी’च्या घरात गेल्यापासूनच राखी सावंत काही ना काही करुन घरात धुमाकूळ घालत होती. राखीनं आपल्या कट कारस्थानांनी घरातील सर्व सदस्यांच्या नाकी नऊ आणले होते. त्यामुळं टीआरपी क्वीन घरातून बाहेर पडल्यानंतर आता बिग बॉसच्या घरात काय बदल होणार? हे पाहणं उत्सुकतेचं ठरणार आहे.
