राज्यभरात मान्सूनचा जोर वाढणार;
जुन्नरमध्ये ढगफुटीसदृश पाऊस

Top 10 News :  गेल्या दिवसांच्या प्रदीर्घ विश्रांतीनंतर मान्सूनने महाराष्ट्रात पुन्हा प्रगती केलीय. रायगड जिल्ह्यातील अलिबागपर्यंत मान्सूनने काल धडक मारल्याची माहिती भारतीय हवामानशास्त्र विभागाने दिली. मुंबईत पुढील 24 ते 48 तासांसाठी हवामान विभागाने ‘यलो अलर्ट’ जारी केला आहे. राज्यात मोसमी पाऊस सक्रिय होण्यासाठी अनुकूल स्थिती असून 24 ते 27 जून दरम्यान कोकण किनारपट्टीसह राज्यातील अंतर्गत भागातील काही प्रदेशात पावसाचा जोर वाढण्याचा अंदाज आहे. मोसमी पावसाच्या प्रतीक्षेत असलेल्या पुण्यात तुफानी पाऊस बरसला. जुन्नर तालुक्यातील कुमशेत परिसरात मुसळधार पाऊस झाला. या मुसळधार पावसामुळे रस्ते, ओढे आणि नाल्यांना नद्यांचं स्वरूप आलं होतं. त्यामुळे स्थानिक नागरिकांचं जनजीवन विस्कळीत झालं. या पावसामुळे मोठ्या प्रमाणात नुकसान होण्याची भीती व्यक्त केली जात आहे.

“पक्ष बदलला असला तरी….”;
हाती धनुष्यबाण घेतल्यानंतर ओमराजेंची पहिली पोस्ट

गेल्या काही दिवसांपासून ज्या अॅापरेशन टायगरची चर्चा होती. अखेर या अॅापरेशमधील सहा बंडखोर खासदारांचा उपमुख्यमंत्री एकनाथ शिंदे यांच्या नेतृत्वाखालील शिवसेनेत काल अधिकृत पक्षप्रवेश झाला.यावेळी एकनाथ शिंदे यांनी तुफान फटकेबाजी करत सहा टायगर खऱ्या शिवसेनेत दाखल झाल्याचे विधान केले. आता शिंदेंच्या शिवसेनेत गेल्यानंतर ओमराजे निंबाळकर यांनी  सोशल मीडियावर पहिली पोस्ट शेअर केली. या पोस्टमध्ये त्यांनी शिंदेंच्या शिवसेनेत प्रवेश का केला याचं कारण सांगितलंय. “माझी खरी निष्ठा कोणत्याही पदाशी किंवा पक्षाशी नसून माझ्या मतदारसंघातील जनतेशी आहे. निवडणुकीत तुम्ही माझ्यावर दाखवलेला विश्वास हेच माझे सर्वात मोठे बळ आहे. आजचा निर्णयही त्याच विश्वासाला न्याय देण्यासाठी घेतला आहे. मला खात्री आहे की, या निर्णयामुळे आपल्या भागाच्या विकासाला अधिक गती मिळेल आणि आपण सर्व मिळून आपल्या जिल्ह्याला प्रगतीच्या नव्या उंचीवर घेऊन जाऊ.” असं पक्ष प्रवेशाचे कारण ओमराजे यांनी सोशल मीडियावर पोस्टमध्ये सांगितलं आहे.

आणखी एक बंडखोर शिंदेसेनेत
परंतु थेट पक्षात प्रवेश नाही

विधान परिषद निवडणुकीतील नवनिर्वाचित आमदार गोकुळ गिते यांनी मुख्यमंत्री एकनाथ शिंदे यांची भेट घेतली असून ते शिंदे गटात (शिवसेनेत) सामील झाले आहेत. मात्र, त्यांचा थेट पक्षात प्रवेश झालेला नाही. गोकुळ गिते हे थेट शिवसेनेत प्रवेश न करता, येणाऱ्या काळात शिवसेनेचे ‘सहयोगी सदस्य’ म्हणून काम पाहणार आहेत. काही तांत्रिक कारणांमुळे त्यांचा थेट पक्षप्रवेश झालेला नाही. गोकुळ गिते यांनी सांगितले की, ते मुख्यमंत्री एकनाथ शिंदे यांच्या कामाच्या पद्धतीमुळे आणि त्यांच्या स्टॅमिनामुळे पूर्वीपासूनच प्रभावित होते, म्हणूनच त्यांनी हा निर्णय घेतला. निवडणुकीत महायुतीच्या उमेदवाराचा पराभव झाला असून गोकुळ गिते विजयी झाले आहेत.

माझ्या नादी लागलात तर हॉस्पिटलमध्ये जाल नाहीतर स्मशानात
शिंदे गटात जाताच संजय दिना पाटील आक्रमक

माझं ठाकरे गटाच्या कार्यकर्त्यांशी कोणतंही वैर नाही, त्यांच्यामुळे मी खासदार झालो आहे. पण कोणी माझ्या कुटुंबाकडे आणि माझ्याकडे वाकड्या नजरेने पाहिलं तर त्यांनी स्वत:चा मेडिक्लेम आणि लाईफ इन्शुरन्स काढून ठेवावा. माझ्या नादाला लागाल तर एकतर तुम्ही हॉस्पिटलमध्ये जाल नाहीतर स्मशानात जाल, असा आक्रमक भाषेत ठाकरे गटाचे फुटीर खासदार संजय दिना पाटील यांनी विरोधकांना इशारा दिला. संजय दिना पाटील यांनी काल एकनाथ शिंदे यांच्या उपस्थितीत शिवसेनेत प्रवेश केला. यानंतर त्यांनी प्रसारमाध्यमांशी बोलताना ‘ऑपरेशन तुडवा’ राबवण्याच्या तयारीत असलेल्या ठाकरे गटाच्या नेत्यांना सावधानतेचा इशारा दिला.

लातूर जिल्ह्यातल्या सर्व शाळा सकाळच्या सत्रात
जिल्हाधिकाऱ्यांचे सर्वच शाळांना आदेश

एल निनोच्या प्रभावाचा मोठा फटका, लातूरमध्ये बसताना पाहायला मिळतोय, जून महिना संपत आला तरीही जिल्ह्यात पावसाचा थेंब नाही. उन्हाचा पारा 36ते 37 अंश सेल्सिअस वर नोंदतो आहे. दरम्यान उन्हाचा पारा लक्षात घेता, जिल्हाधिकाऱ्यांनी जिल्ह्यातील सर्व शाळांच्या वेळेत बदल करण्याचे आदेश दिले आहेत , लातूर जिल्ह्यातील शाळेच्या वेळेत बदल करण्यात आलाय, सकाळी 8 ते दुपारी 12:30 वाजेपर्यंत शाळा सुरू ठेवाव्यात असे आदेश जिल्हाधिकाऱ्यांनी काढले आहेत, दरम्यान 15 जून पासून सर्व शाळा नियमितपणे सुरू झाल्या आहेत, मात्र उन्हाचा पारा लक्षात घेता, जिल्हाधिकाऱ्यांनी हे आदेश काढले आहेत. त्यामुळे इंग्रजी माध्यमांसह खाजगी, अनुदानित संस्था, जिल्हा परिषद यासह इतर सर्व शाळेच्या वेळेत बदल करण्यात आला.

TMC च्या ६० आमदारांनी ममता बॅनर्जीना अध्यक्षपदावरून हटवलं ;
अभिषेक बॅनर्जींनाही केलं सस्पेंड

पश्चिम बंगालमध्ये राजकीय घडामोडींना वेग आला आहे. न्यूटाउन येथे आज सायंकाळी पार पडलेल्या बैठकीत तृणमूल काँग्रेसमधील बंडखोर गटाने ममता बॅनर्जी यांना पक्षाच्या अध्यक्षा पदावरून हटवण्याचा निर्णय घेतलाय. त्यांच्या जागी हावडा मध्य मतदारसंघाचे आमदार अरूप रॉय यांची नवीन अध्यक्ष म्हणून नियुक्ती करण्यात आलीय. याशिवाय, अभिषेक बॅनर्जी यांना पक्षाच्या अखिल भारतीय सरचिटणीस पदावरून निलंबित केल्याची घोषणाही करण्यात आली.काल पश्चिम बंगाल विधानसभेचे अर्थसंकल्पीय अधिवेशन पार पडलं. अधिवेशनानंतर तृणमूल काँग्रेसच्या बंडखोर आमदारांनी न्यूटाउनमधील एका हॉटेलमध्ये बैठक घेतली. या बैठकीला पक्षाचे ६० आमदार उपस्थित होते. तसेच कोलकात्यातील जवळपास ७० माजी नगरसेवकांनीही सहभाग घेतला होता. याच बैठकीत ३० सदस्यीय समिती स्थापन करण्याचा निर्णय घेण्यात आलाय.

जागतिक टेक मार्केटमध्ये भारतीयांचा दबदबा
कुणाल शाह यांची व्हॉट्सॲप सीईओपदी नियुक्ती

जागतिक तंत्रज्ञान क्षेत्रात आणि सिलिकॉन व्हॅलीमध्ये भारतीय बुद्धिमत्तेचा दबदबा सातत्याने वाढतच चालला आहे. तंत्रज्ञान जगतातील दिग्गज कंपनी ‘मेटा’ने एक अत्यंत महत्त्वपूर्ण घोषणा केली आहे. भारतीय फिनटेक क्षेत्रात क्रांती घडवून आणणारे ‘क्रेड’ कंपनीचे संस्थापक कुणाल शाह यांची व्हॉट्सॲपचे नवीन मुख्य कार्यकारी अधिकारी म्हणून नियुक्ती करण्यात आली आहे. गुगल, मायक्रोसॉफ्ट आणि युट्यूबनंतर आता व्हॉट्सॲपची धुराही भारतीय नेतृत्वाकडे सोपवण्यात आली आहे. दरम्यान , कुणाल शाह यांच्याअगोदर सत्या नडेला हे २०१४ सालापासून मायक्रोसॉफ्टचे नेतृत्व करत आहेत.तर सुंदर पिचाई हे सध्या अल्फाबेट आणि गुगलचे सीईओ आहेत. त्यासोबतच हैदराबादमध्ये एका तेलुगू हिंदू कुटुंबात जन्मलेले शंतनू नारायण २००५ पासून ‘अ‍ॅडोबी’चे नेतृत्व करत आहेत.तसेच नील मोहन हे युट्यूबचे सीईओ म्हणून काम करतात.

होर्मुज खुलं पण जहाजांसाठी इराणच्या दोन अटी
जागतिक तेल, वायू पुरवठ्यावर होणार परिणाम

अमेरिका आणि इराण यांच्यातील करारानंतर, जगातील सर्वात महत्त्वाच्या सागरी मार्गांपैकी एक असलेला होर्मुझचा (Hormuz )सामुद्रधुनी व्यावसायिक जहाज वाहतुकीसाठी पुन्हा खुला झाला आहे. इराणने आता त्यातून जाणाऱ्या सर्व जहाजांवर नवीन अटी लागू केल्या आहेत. या नियमाचा जागतिक तेल आणि वायू पुरवठ्यावर परिणाम होऊ शकतो. नवीन नियमांनुसार, आता कोणत्याही देशाच्या जहाजांना या सामुद्रधुनीतून जाण्यासाठी पूर्व-नोंदणी, सरकारी परवानगी आणि भक्कम विमा आवश्यक आहे. याशिवाय, कोणतेही जहाज या मार्गातून जाऊ शकत नाही. या नियमाचा मुख्य उद्देश सुरक्षा आणि निगराणी मजबूत करणे हा आहे.

Lionel Messi ने इतिहास रचला!
वर्ल्ड कपमध्ये हा विक्रम जगातील पहिला खेळाडू ठरला

फिफा फुटबॉल वर्ल्ड कप २०२६ मध्ये लिओनेल मेस्सीने पहिल्याच सामन्यात हॅटट्रिक करून अनेक विक्रम मोडले. अर्जेंटिनाचे नेतृत्व करताना ऑस्ट्रियाचा सामना करायला उतरला, तेव्हाही त्याने ऐतिहासिक कामगिरी केली. खरं तर हा विक्रम तो १०व्या मिनिटाला सहज करू शकला असता, परंतु पेनल्टी हुकल्याने चाहत्यांना थोडी प्रतीक्षा करावी लागली. मात्र, या महान फुटबॉलपटूने त्याला G.O.A.T का म्हटले जाते, हे पुन्हा जगाला दाखवून दिले. वर्ल्ड कप स्पर्धा इतिहासात सर्वाधिक ८ गोल सहाय्य करण्याच्या विक्रमातही डिएगो मॅराडोना यांच्याशी त्याने बरोबरी केली आहे. ३१ व्या मिनिटाला ऑस्ट्रियाच्या बचावपटूंनी पुन्हा एकदा त्यांचा जलवा दाखवला अन् मेस्सीचा आणखी एक गोल अडवला. ३८व्या मिनिटाला मेस्सीने पेनल्टी बॉक्स बाहेरून भन्नाट गोल केला आणि अखेर विक्रम नोदंवला. मेस्सी वर्ल्ड कप इतिहासात सर्वाधिक १७ गोल करणारा खेळाडू बनला.. मागील सामन्यात अल्जेरियाविरुद्ध तीन गोल करून त्याने जर्मनीच्या मिरोस्लाव्ह क्लोजशी ( १६) बरोबरी केली होती.

‘तोडलंस राणी तोडलंस’
अवधूत गुप्तेने केली ‘सारेगमप’ची घोषणा Top 10 News : 

काही दिवसांपूर्वीच झी मराठीकडून अभिनेते आदेश बांदेकर यांच्या ‘होम मिनिस्टर’ कार्यक्रमाची घोषणा करण्यात आली. पण आता प्रेक्षकांना सुरांच्या दुनियेत घेऊन जाणारं सरप्राइज मिळणार आहे. गायक संगीतकार आणि दिग्दर्शक अवधूत गुप्ते यांनी ‘सा रे ग म प’ कार्यक्रमाची घोषणा केलीय.त्यामुळे प्रेक्षकांमध्ये पुन्हा एकदा उत्सुकता निर्माण झालीय. झी मराठीवर आता ‘होम मिनिस्टर’ कार्यक्रमानंतर ‘सा रे ग म प’ कार्यक्रम पुन्हा सुरु होणार आहे. यासंदर्भात झी मराठी वाहिनीने त्यांच्या सोशल मिडीयावर एक प्रोमो शेअर केला आहे. यात अवधूत गुप्ते स्टुडीओमध्ये बसलेले दिसतायत. एक मुलगी गाणं गाताना दिसतेय. तिचं गाणं ऐकून अवधूत गुप्ते ‘तोडलंस राणी तोडलंस’ म्हणताना दिसतोय. आंतरराष्ट्रीय संगीत दिवसाचं निमित्त साधत अवधूत गुप्ते यांनी ‘सा रे ग म प’ कार्यक्रमाची घोषणा केलीय.सध्या कार्यक्रमाचा फक्त प्रोमो समोर आला आहे. कार्यक्रमाची वेळ आणि तारिख जाहीर करण्यात आली नाही.