आम्ही ‘कोंबडा’ मारत नाही, कोंबडे मारणारे वेगळे लोक
देवेंद्र फडणवीस यांचा विरोधकांना टोला

Top 10 News :  मुख्यमंत्री देवेंद्र फडणवीस यांनी महारेलच्या 145 रेल्वे उड्डाणपुलांच्या आराखड्याला मान्यता देत पुढील तीन वर्षांत सर्व पूल पूर्ण करण्याचा निर्धार व्यक्त केला. नागपुरात नऊ विकास प्रकल्पांच्या उद्घाटनावेळी त्यांनी महारेलच्या कामगिरीचे कौतुक केले. राज्य रेल्वे फाटकमुक्त करण्यासाठी उड्डाणपुलांचे जाळे उभारण्यावर सरकारचा भर असल्याचे त्यांनी सांगितले. यावेळी “आम्ही कोंबडा मारत नाही, सही करतो; कोंबडे मारणारे वेगळे लोक आहेत,” असा टोला त्यांनी लगावला. तसेच राज्यातील विकासकामांना अधिक वेग देण्याची ग्वाहीही फडणवीस यांनी दिली.

‘फडणवीस 2034 पर्यंतच मुख्यमंत्री’;
दिल्लीच्या चर्चांवर बावनकुळेंचा पलटवार

मुख्यमंत्री देवेंद्र फडणवीस यांना दिल्लीत पाठवले जाईल, या विरोधकांच्या दाव्यांवर भाजप प्रदेशाध्यक्ष चंद्रशेखर बावनकुळे यांनी जोरदार प्रत्युत्तर दिले. फडणवीस 2034 पर्यंत महाराष्ट्राचे नेतृत्व करतील, असा विश्वास त्यांनी व्यक्त केला. आदित्य ठाकरे आणि संजय राऊत यांनी केलेल्या विधानांना त्यांनी ‘अफवांचा बाजार’ असे संबोधले. दरम्यान, मंत्री दत्ता भरणे यांनीही फडणवीस 2029 पर्यंत मुख्यमंत्री राहावेत, अशी इच्छा व्यक्त केली. राज्याच्या विकासासाठी त्यांच्या नेतृत्वाची गरज असल्याचेही त्यांनी नमूद केले.

लाडकी बहीण’ योजनेतून 92 लाख नावे वगळली;
बीड जिल्हा अव्वल

राज्य सरकारची महत्वकांक्षी मुख्यमंत्री ‘माझी लाडकी बहीण’ योजनेतून ई-केवायसी आणि पडताळणी प्रक्रियेनंतर 92 लाखांहून अधिक महिलांची नावे वगळण्यात आल्याची माहिती समोर आली आहे. महिनाभरापूर्वी सरकारने सुमारे 80 लाख लाभार्थ्यांची नावे कमी होणार असल्याचे सांगितले होते. मात्र, ताज्या आकडेवारीनुसार हा आकडा आणखी वाढला आहे. या वगळण्यात आलेल्या लाभार्थ्यांमध्ये सर्वाधिक संख्या बीड जिल्ह्यातील असल्याचे समोर आले आहे. या घडामोडीमुळे योजनेच्या अंमलबजावणी आणि लाभार्थी पडताळणी प्रक्रियेबाबत पुन्हा चर्चा सुरू झाली आहे.

माथेरान घाटात भीषण अपघात!
20 पर्यटकांचा टेम्पो पलटी; 8 जण गंभीर जखमी

रायगडातील माथेरान घाट रस्त्यावर काल सायंकाळी पर्यटकांना घेऊन जाणारा महिंद्रा कॅरी टेम्पो एस-टर्न वळणावर पलटी होऊन भीषण अपघात झाला. टेम्पोमध्ये 20 पर्यटक प्रवास करत होते. यापैकी आठ जण गंभीर जखमी झाले असून त्यांच्यावर नेरळ येथील सुदिन नर्सिंग होममध्ये उपचार सुरू आहेत. प्राथमिक माहितीनुसार, चालकाचे वाहनावरील नियंत्रण सुटल्याने टेम्पो सिमेंटच्या कठड्यावर आदळून उलटला. स्थानिक नागरिक, पोलीस आणि आपत्कालीन यंत्रणांनी तत्काळ बचावकार्य करून सर्व जखमींना रुग्णालयात दाखल केले.

मान्सून पुन्हा सक्रिय!
पुढील 12 तासांत 14 राज्यांत वादळी पावसाचा अलर्ट Top 10 News : 

भारतीय हवामान विभागाने पुढील 12 तासांत 14 राज्यांमध्ये वादळी पाऊस, विजांचा कडकडाट आणि ताशी 75 किमी वेगाने वारे वाहण्याचा इशारा दिला आहे. उत्तर प्रदेश, बिहार, महाराष्ट्र, राजस्थान, मध्य प्रदेश, पश्चिम बंगाल, आसामसह अनेक राज्यांमध्ये मुसळधार पावसाची शक्यता आहे. ईशान्य भारत आणि बिहारमध्ये पुढील 2-3 दिवस अतिमुसळधार पावसाचा अंदाज आहे. दरम्यान, पुणे, घाटमाथा आणि कोकणात पावसाने तात्पुरती विश्रांती घेतली असून, 15 जुलैपर्यंत अरबी समुद्रातील मच्छीमारांना समुद्रात न जाण्याचा सल्ला देण्यात आला आहे.

तमिळनाडूत ‘ऑपरेशन L’ची चर्चा!
AIADMK चे 10आमदार TVKमध्ये जाणार?

तमिळनाडूच्या राजकारणात मोठ्या घडामोडी घडण्याची शक्यता असून मुख्यमंत्री सी. जोसेफ विजय यांच्या नेतृत्वाखालील तमिळगा वेत्री कळघम (TVK) पक्ष अधिक मजबूत होण्याचे संकेत आहेत. समोर आलेल्या माहितीनुसार विरोधी पक्ष AIADMK चे सुमारे 10 आमदार 15 ऑगस्टपूर्वी राजीनामा देऊन TVK मध्ये प्रवेश करू शकतात. या रणनीतीला ‘ऑपरेशन L’ असे नाव देण्यात आले आहे. पोटनिवडणुकांची घोषणा होण्यापूर्वी पक्षांतराची प्रक्रिया पूर्ण करण्याचा प्रयत्न सुरू असल्याच सांगण्यात येतंय.

US-इराण युद्ध भडकले!
140 लष्करी ठिकाणांवर हल्ले

अमेरिका आणि इराणमधील संघर्ष अधिक तीव्र झाला असून पश्चिम आशियात युद्धजन्य परिस्थिती निर्माण झाली आहे. अमेरिकेने इराणच्या 140 लष्करी ठिकाणांवर हल्ले केल्याचा दावा केला, तर इराणने बहारीन, कतार, कुवेत, जॉर्डन आणि ओमानमधील अमेरिकी तळांना लक्ष्य केल्याचे म्हटले. होर्मुझ सामुद्रधुनी बंद केल्याचा इराणचा दावा असला तरी अमेरिका सागरी वाहतूक सुरू असल्याचे सांगत आहे. दरम्यान, ओमानजवळील व्यापारी जहाजावरील हल्ल्यात एक भारतीय नागरिक बेपत्ता झाला असून त्याचा शोध सुरू आहे.

बँकॉकच्या पबमध्ये मध्यरात्री भीषण आग
भीषण आगीत २७ जण होरपळले

थायलंडची राजधानी बँकॉकमधील एका पबमध्ये मध्यरात्री लागलेल्या भीषण आगीत 27 जणांचा होरपळून मृत्यू झाला, तर 63 जण जखमी झाले. यापैकी 22 जणांची प्रकृती गंभीर असल्याने मृतांचा आकडा वाढण्याची भीती व्यक्त होत आहे. आग लागल्यानंतर काही क्षणांतच संपूर्ण इमारत ज्वाळांनी वेढली. अनेक जण जीव वाचवण्यासाठी धावले, तर काही टॉयलेटमध्ये अडकून मृत्युमुखी पडले. बचाव पथकाने तातडीने मदतकार्य सुरू केले असून आगीचे कारण आणि अग्निसुरक्षा व्यवस्थेची चौकशी सुरू आहे.

विम्बल्डनवर पुन्हा सिन्नरचे राज्य!
झ्वेरेव्हचा पराभव करत सलग दुसरे विजेतेपद

इटलीचा अव्वल मानांकित टेनिसपटू यानिक सिन्नरने विम्बल्डन 2026 पुरुष एकेरीचे सलग दुसऱ्यांदा विजेतेपद पटकावले. सेंटर कोर्टवरील अंतिम सामन्यात त्याने जर्मनीच्या अलेक्झांडर झ्वेरेव्हचा 6-7, 7-6, 6-3, 6-4 असा पराभव केला. फिटनेसच्या समस्येमुळे फ्रेंच ओपनला मुकल्यानंतर सिन्नरने दमदार पुनरागमन करत हंगामातील पहिले ग्रँड स्लॅम जिंकले. हे त्याच्या कारकिर्दीतील पाचवे ग्रँड स्लॅम आणि दुसरे विम्बल्डन जेतेपद ठरले. उपांत्य फेरीत त्याने नोव्हाक जोकोविचलाही सरळ तीन सेटमध्ये पराभूत केले होते.

‘मला कॅन्सर झाला होता’;
मेधा मांजरेकरांची भावनिक पोस्ट Top 10 News : 

ज्येष्ठ अभिनेत्री मेधा मांजरेकर यांनी सोशल मीडियावर भावनिक पोस्ट करत स्वतःला कॅन्सर झाल्याची माहिती दिली. उपचारांचा महत्त्वाचा टप्पा पूर्ण झाल्यानंतर त्यांनी या कठीण प्रवासात साथ देणारे कुटुंबीय, मित्र, डॉक्टर आणि परिचारिकांचे आभार मानले. “मी हा प्रवास कधीच एकटीने केला नाही,” असे सांगत त्यांनी पती महेश मांजरेकर आणि मुलींच्या पाठिंब्याचा विशेष उल्लेख केला. श्रद्धा, कुटुंब आणि मित्रांच्या प्रेमामुळेच हा कठीण काळ पार करता आल्याचे त्यांनी आपल्या पोस्टमध्ये नमूद केले.