Top 10 news: राज्यातील सर्व ग्रामपंचायती राहणार बंद! राज्यभरातील गावगाड्यांचा कारभार येत्या शुक्रवारी म्हणजेच 20 फेब्रुवारी रोजी बंद राहणार आहे. राज्यभरातील ग्रामपंचायत स्तरावरील विविध मागण्यांसाठी 20 फेब्रुवारी रोजी राज्यव्यापी आंदोलन करण्यात येणार आहे. अखिल भारतीय सरपंच परिषदेने याबाबतची माहिती दिली आहे. या दिवशी राज्यभरातील सर्व ग्रामपंचायती बंद ठेवण्याचा निर्णय घेण्यात आला आहे. समोर आलेल्या माहितीनुसार, राज्यभरातील ग्रामपंचायती २० फेब्रुवारीला बंद राहणार आहेत. राज्यातील १६ हजारांहून अधिक ग्रामपंचायतींची मुदत संपत असल्याने किंवा संपल्यानंतर शासकीय कर्मचारी प्रशासक म्हणून नियुक्त करण्यात आल्याने गावांच्या विकासकामांना मोठा फटका बसल्याचा आरोप अखिल भारतीय सरपंच परिषद यांनी केला आहे. शासनाच्या या धोरणाविरोधात २० फेब्रुवारी रोजी राज्यातील सर्व ग्रामपंचायती एकदिवसीय लाक्षणिक संपावर जाणार असल्याची घोषणा परिषदेचे संस्थापक-अध्यक्ष जयंत पाटील यांनी केली. ‘पुन्हा टिपू सुलतान थडग्यातून बाहेर आला…’ महाराष्ट्रात सध्या टिपू सुलतानभोवती राजकीय वारे फिरत आहेत. शिवसेनेचे मुखपत्र असलेल्या “सामना” ने टिपू सुलतानच्या वादावरून भाजप आणि काँग्रेस दोघांवरही निशाणा साधलाय. मालेगाव महानगरपालिकेच्या उपमहापौर कार्यालयात टिपू सुलतानचे चित्र बसवण्यापासून या प्रकरणाची सुरुवात झाली, ज्यामुळे जोरदार वाद निर्माण झाला. दरम्यान, काँग्रेसचे प्रदेशाध्यक्ष हर्षवर्धन सपकाळ यांनी टिपू सुलतानची तुलना छत्रपती शिवाजी महाराजांशी करून वादाला आणखी खतपाणी घातले. दरम्यान , सामनाने आरोप केला की भाजपने या मुद्द्याला हिंदू-मुस्लिम वळण दिले आहे. काँग्रेसचे प्रदेशाध्यक्ष हर्षवर्धन सपकाळ यांच्यावरही टीका करण्यात आली. मुख्यमंत्री देवेंद्र फडणवीस आणि भाजपच्या प्रतिक्रियांचा संदर्भ देत संपादकीयात म्हटले आहे की, “त्यांनी काँग्रेसवर जोरदार टीका केली. सामनाने असाही प्रश्न केला की, जर टिपूबद्दल इतका राग असेल तर पाकिस्तानसोबतच्या क्रिकेट सामन्यावर मौन का आहे? तसेच भारत-पाकिस्तान क्रिकेटविरुद्ध कोणतेही निषेध का दिसत नाहीत आणि अशा प्रसंगी भाजपचे रक्त का उकळत नाही.असा सवाल देखील उपस्थित केलाय.. राज ठाकरेंचा मोठा निर्णय! नुकत्याच झालेल्या महानगरपालिका निवडणुकीत राज ठाकरे यांच्या मनसेला दारुण पराभव स्विकारावा लागला. २९ महानगरपालिकांपैकी तब्बल 22 ठिकाणी राज ठाकरेंच्या मनसेला खातेही उघडता आले नाही. विशेषत: कधीकाळी 29 नगरसेवक असलेल्या पुणे महानगरपालिकेत एकही जागा मनसेने जिंकली नाही. पुण्यामध्ये झालेल्या या मोठ्या पराभवानंतर राज ठाकरेंनी आता सर्वात मोठा अन् महत्त्वाचा निर्णय घेतला आहे. काल पुण्यात झालेल्या बैठकीत राज ठाकरे यांनी मोठ्या निर्णयाची घोषणा केलीय. या पुढे दर आठवड्याला स्वत: राज ठाकरे पुण्यातील पदाधिकाऱ्यांकडून आढावा घेणार आहेत. दर आठवड्याला राज ठाकरे स्वतः कारभाराची हजेरी घेणार असल्याने पुण्यातील मनसे नेत्यांचे टेन्शन चांगलेच वाढले आहे. एकनाथ शिंदे जेलमध्ये जातील-गणेश नाईक महापालिका निवडणुकीत सुरु झालेला गणेश नाईक आणि एकनाथ शिंदे यांच्यात संघर्ष अद्याप थांबण्याचं नाव घेत नाही. एका विशेष मुलाखतीत गणेश नाईकांनी भ्रष्टाचाराचा आरोप करत शिंदेंना जेलमध्ये जावं लागेल, असा खळबळजनक दावा केलाय. दरम्यान गणेश नाईकांनी एकनाथ शिंदेंचे पुत्र खासदार श्रीकांत शिंदेंचेंही राजकीय अस्तित्व संपवण्याचा इशारा दिलाय.यावर श्रीकांत शिंदेंनी प्रत्युत्तर दिलंय.ज्यांच्या घरात तीन माजी आहेत. त्यांनी आम्हाला माजी करण्याची भाषा करू नये, असा टोला श्रीकांत शिंदेंनी लगावलाय. दरम्यान, ठाणे जिल्हा परीषदेवर भाजपची सत्ता आणणार, असा निर्धार गणेश नाईकांनी बोलून दाखवलाय. ठाणे आणि नवी मुंबईतील वर्चस्वासाठी नाईक-शिंदेंमधील संघर्ष विकोपाला गेलाय. अगदी एकमेकांचे नामोनिशाण मिटवण्याची भाषा दोन्ही पक्षाच्या नेत्यांकडून केली जात असल्यानं महायुतीत वादाची ठिणगी पडलीय. महायुतीतील हा अंतर्गत वाद आणखी किती चिघळणार? नाईक-शिंदेंमधील वर्चस्वाच्या लढाईत नेमकं कोण बाजी मारणार? हे पाहणं महत्त्वाचं आहे… राज्यातील पहिले ड्रोन क्लस्टर पुण्यात होणार Top 10 news: औद्योगिक क्षेत्राला नवे बळ देणारा महत्वाकांक्षी प्रकल्प पुण्यात साकारला जाणार आहे. ड्रोन क्षेत्राला चालना देण्यासाठी राज्यातील पहिले सामायिक सुविधा केंद्र पुण्यात सुरू करण्यासाठी एमसीसीआयएने पुढाकार घेतलाय. यासाठी उद्योग विभागाकडे प्रस्ताव मंजूरसाठी पाठवला जाणार असल्याचं बोललं जातंय. ड्रोन क्लस्टर म्हणजे ड्रोन आणि त्याच्या सुट्या भागांसाठी आवश्यक असे आरेखन, संशोधन, चाचणी आणि संबंधित तंत्रज्ञानाशी निगडित उद्योगांना एकाच ठिकाणी उपलब्ध करून देण्याची अशी सुविधा होय. ही सुविधा उपलब्ध करून देण्यासाठी व जागेचा खर्च वाचवून जास्तीतजास्त रक्कम यंत्रसामग्री व सॉफ्टवेअरमध्ये गुंतवता यावी यासाठी चेंबरच्या पिंपरी औद्योगिक वसाहतीमधील शाखेत हा प्रकल्प साकारणार आहे. यामुळे संरक्षण, कृषी, आपत्ती व्यवस्थापन, सर्वेक्षण आणि वाहतूक क्षेत्रातील ड्रोनचा वाढता वापर लक्षात घेता या क्लस्टरमुळे राज्यातील ड्रोन क्षेत्रातील उद्योगांना चालना मिळणार आहे. ‘या’ लाडक्या बहिणींचे ₹१५०० कायमचे बंद लाडकी बहीण योजनेच्या लाभार्थ्यांसाठी टेन्शन वाढवणारी बातमी समोर आली आहे. लाडकी बहीण योजनेत काही महिलांचा लाभ आता कायमचा बंद होणार आहे. लाडकी बहीण योजनेत लाखो महिलांना यापुढे दर महिन्याला १५०० रुपये मिळणार नाहीयेत. त्यांना एक चूक महागात पडली आहे. लाडकी बहीण योजनेत महिलांना ईकेवायसी करण्यास सांगितले आहे. केवायसी करणे अनिवार्य होते. मात्र, अनेक महिलांनी अजूनही केवायसी केले नाही. केवायसी न केल्यामुळे त्यांचा लाभ बंद केला जाणार आहे. महिलांना यापुढे पैसे मिळणार नाहीयेत. केवायसी करण्याची शेवटची तारीख ३१ डिसेबंर २०२५ होती. त्याआधी ज्यांनी केवायसी केले आहे. त्यांनाच योजनेचा लाभ मिळणार आहे. इतर महिलांचा लाभ बंद केला जाणार आहे. लाडकी बहीण योजनेत अनेक महिलांनी केवायसी केले आहे. मात्र, केवायसी करताना त्यांच्याकडून काही चुका झाल्या आहेत. यामुळे त्यांचा लाभ बंद झालेला आहे. आता त्यांना चुक सुधारण्याची संधी देण्यात आली आहे. त्यांना पुन्हा केवायसी करण्यास सांगितले आहे. दरम्यान, यामध्ये महिलांची घरोघरी जाऊन पडताळणी केली जाणार आहे. यामध्ये ज्या महिला अपात्र ठरतील त्यांचा लाभ कायमचा बंद केला जाणार आहे. यासाठी ३१ मार्चपर्यंत मुदत देण्यात आली आहे. त्यामुळे तोपर्यंत तुम्हाला केवायसीमधील चुका दुरुस्त करायच्या आहेत. अन्यथा तुमचाही लाभ बंद केला जाईल. रेल्वे प्रवाशांसाठी सोईस्कर असलेलं UTS अॅप बंद होणार रेल्वेने प्रवाशांच्या सोयीसाठी एक मोठा बदल जाहीर केलाय. येत्या 1 मार्च 2026 पासून जुन्या ‘UTS-on Mobile’ (UTS) ॲपची सेवा टप्प्याटप्प्याने बंद करण्यात येणार असून, त्याऐवजी प्रवाशांना आता ‘RailOne’ या अधिकृत ॲपचा वापर करावा लागणार आहे. पहिल्या टप्प्यात दक्षिण रेल्वेच्या माहितीनुसार, UTS ॲप बंद करण्याची प्रक्रिया सुरू झालीय. सीझन तिकीट (पास) बुकिंग/नूतनीकरण आणि नवीन यूजर नोंदणी बंद करण्यात आलीय. दुसऱ्या टप्प्यात प्लॅटफॉर्म तिकीट बुकिंग आणि आर-वॉलेट (R-Wallet) टॉप-अप सेवाही बंद करण्यात आलीय. जरी हे ॲप अद्याप स्टोअरवर उपलब्ध असले, तरी त्याचे अपडेटेड व्हर्जन वापरणाऱ्यांना आर-वॉलेट रिचार्ज किंवा तिकीट बुक करता येणार नाही. तसेच दक्षिण रेल्वेने स्पष्ट केले आहे की, UTS ॲपवरील तुमचा शिल्लक आर-वॉलेट बॅलन्स पूर्णपणे सुरक्षित राहील. हे पैसे लॅप्स होणार नाहीत, तर ते तुमच्या ‘RailOne’ ॲपवर वापरण्यासाठी उपलब्ध करून दिले जातील. ड्रॅगनकडून अण्वस्त्रांची निर्मिती ? जग सध्या अनेक आघाड्यांवर युद्ध आणि तणावाचा सामना करत आहे. या वातावरणात, प्रमुख देश त्यांच्या लष्करी आणि संरक्षण प्रणालींना सतत बळकटी देत आहेत. दरम्यान, न्यूयॉर्क टाईम्समधील एका अहवालात असा दावा करण्यात आला आहे की चीन नैऋत्य प्रांत सिचुआनमध्ये आपल्या अण्वस्त्रांच्या पायाभूत सुविधा वेगाने विकसित करत आहे. या अहवालात उपग्रह प्रतिमांवर आधारित बांधकामांचा उल्लेख करण्यात आलाय. अहवालानुसार, सिचुआन प्रांतातील झिटोंग आणि पिंगटोंग भागात असलेल्या अण्वस्त्र सुविधांचा विस्तार आणि आधुनिकीकरण करण्यात आलंय. पिंगटोंग साइट प्लुटोनियम कोर उत्पादनात सहभागी असल्याचं मानलं जातंय. ३६० फूट उंच वेंटिलेशन स्टॅक अपग्रेड करणे आणि सुरक्षा पायाभूत सुविधा मजबूत करणे याबद्दल माहिती समोर आलीय. पाकिस्तानी चाहत्यांनी फोडले पुन्हा टीव्ही! टी-२० विश्वचषकात कोलंबोत झालेल्या हायव्होल्टेज सामन्यात भारताने पाकिस्तानचा धुव्वा उडवला. पाकिस्तानचा पराभव करत भारताने आपला दबदबा सिद्ध केला. इशान किशनच्या वादळी फलंदाजीनंतर गोलंदाजांनी भेदक मारा केल्यामुळे भारताने पाकिस्तानचा दारूण पराभव केला. विश्वचषकात पाकिस्तानविरोधात हा ८ वा विजय आहे. टीम इंडियाच्या विजयानंतर भारतामध्ये जल्लोष जोरात सुरू होता. पण दुसरीकडे पाकिस्तानमध्ये टीव्ही फुटत होते. भारताकडून पराभव होताच पाकिस्तानच्या चाहत्यांचा राग अनावर झाला. पाकिस्तानच्या चाहत्यांनी पुन्हा एकदा टीव्ही फोडले. याचे व्हिडिओ व्हायरल झाले आहे. भारताने पाकिस्तानचा पराभव करताच सोशल मीडियावर मिम्सचा पाऊस आलाय. सोशल मीडियावर पाकिस्तानची खिल्ली उडवली. ‘शेवंता’ कडून चाहत्यांना सुखद धक्का Apurva Nemlekar मनोरंजन सृष्टीतून आनंदाची बातमी समोर आली आहे. प्रसिद्ध टिव्ही अभिनेत्रीने लग्नगाठ बांधली आहे.’रात्रीचा खेळ चाले’ या मालिकेत ‘शेवंता’ची भूमिका करणारी अभिनेत्री अपूर्वा नेमळेकर विवाह बंधनात अडकली आहे. तिने सोशल मीडियावर पोस्ट करून चाहत्यांना हा सुखद धक्का दिला आहे. तिने आपल्या नवीन आयुष्याला सुरूवात केली आहे. अपूर्वा नेमळेकरच्या जोडीदाराचे नाव तनुज गोवळकर असे आहे. आता अपूर्वा गोवळकरांची सून झाली आहे. तिने इन्स्टाग्रामवर लग्न सोहळ्याचे तीन फोटो शेअर केले आहे. या फोटोंमध्ये दोघांचा रोमँटिक अंदाज पाहायला मिळत आहे. या सोहळ्याला तिचे कुटुंब आणि जवळचे मित्र मंडळी उपस्थित होते.
