विधान परिषदेसाठी महायुतीच्या फॉर्म्युल्यात बदल Top 10 News : स्थानिक स्वराज्य संस्थांच्या विधान परिषदेच्या 17 जागांसाठी निवडणूक जाहीर करण्यात आली आहे. विधान परिषदेसाठी 18 जून रोजी मतदान तर 22 जून रोजी मतमोजणी होणार आहे. निवडणुकीसाठी अर्ज भरण्याची शेवटची तारीख 1 जून असून 2 जून रोजी अर्जांची छाननी केली जाईल. तर अर्ज माघारीची मुदत 4 जूनपर्यंत असणार आहे. विधान परिषदेसाठी निवडणूक जाहीर झाल्यानंतर महायुतीकडून जोरदार तयारी सुरु आहे. विधान परिषदेच्या निवडणुकीसाठी महायुतीत बैठकांचे सत्र सुरु आहे. याचदरम्यान, एक महत्वाची माहिती समोर आली आहे. विधान परिषदेच्या निवडणुकीसाठी महायुतीमध्ये शिवसेनेला 4, तर राष्ट्रवादी काँग्रेसला फक्त एकच जागा मिळणार असल्याची सूत्रांची माहिती आहे. हिंगोली-परभणीच्या जागेसंदर्भात शिवसेना ही जागा लढण्याची शक्यता आहे. अशात, शिवसेनेच्या वाट्याला एकूण 4 जागा येणार आहेत. ज्यात, प्रामुख्याने आपल्या पारंपरिक जागा कायम राखण्यात शिवसेनेला यश आले आहे. पुढील पाच वर्षात शेतरस्ते बारमाही करणार महसूलमंत्री चंद्रशेखर बावनकुळे यांनी राज्यामध्ये मुख्यमंत्री बळीराजा पांणद रस्ता योजनेची सुरुवात झालेली आहे, अशी माहिती दिली. या योजनेमध्ये जे शेत रस्ते आहेत, त्या रस्त्यांची मोजणी करणे, रस्त्यावरील अतिक्रमण काढणे आणि रस्ता हा वादमुक्त करून घेणे, ही जबाबदारी राज्याचे मुख्यमंत्री देवेंद्र फडणवीस यांनी महसूल खात्याला दिलेली आहे. यामुळे शेतकऱ्यांना बारमाही रस्ता उपलब्ध होईल.. शेतकऱ्यांना रस्ता मिळाला नाही तर शेतकऱ्यांच्या शेतामध्ये दुबार पीक होणार नाही. शेतकऱ्यांच्या शेतात पाणी, दिवसाला 12 तास वीज आणि शेतापर्यंत रस्ता पोहोचला, तर शेतकऱ्यांचा पुत्र कधीही सरकारी नोकरी मागायला जाणार नाही, असं चंद्रशेखर बावनकुळे यांनी म्हटलं. फेरपरीक्षेचा पेपरही फुटल्याचा दावा; 21 जूनचा NEET पेपर 10 लाखांत? नीट पेपरफुटीच्या धक्क्यातून विद्यार्थी आणि पालक अजून सावरलेलेही नाहीत. तेच ‘री-नीट’ परीक्षेच्या नावाखाली देशात एक प्रचंड मोठा सायबर घोटाळा सुरू असल्याचं समोर आलंय. नीटच्या फेरपरिक्षेचा पेपर तब्बल 10 लाखात टेलिग्रामच्या माध्यमातून विकला जात असल्याचा धक्कादायक प्रकार समोर आलायं…अहमदाबाद सायबर गुन्हे शाखेकडे या संदर्भात तक्रार दाखल झालीय. टेलिग्रामवरील एका ग्रुपमध्ये सहभागी झाल्यावर नीट फेरपरीक्षेच्या प्रश्नपत्रिकेचं प्रलोभन दिलं जातं. पेपर हवा असल्यास 10 लाख रुपयांची मागणी केली जाते. सुरुवातीला मुख्य ग्रुपमध्ये सहभागी होण्यासाठी टोकन रक्कम म्हणून घेतली जाते. त्यानंतर अॅडमिनद्वारे पेपर मिळवण्यासंदर्भात एक मिटींग घेतली जाते. बँक अकाऊंट सापडू नये म्हणून विशिष्ट अॅप्लिकेशनचा वापर केला जातो. मुख्य ग्रुपमध्ये पेपर मिळवण्यासाठी सुरुवातीला 60 हजार घेतले जातात आणि नंतर 10 लाखांची मागणी केली जाते. 21 जूनला होणारा रि-नीटचा पेपर लीक झाल्याचा खळबळजनक दावा शुभम ठाकर या विद्यार्थ्यांनं केलाय. बीड पुन्हा हादरले! संतोष देशमुख प्रकरणाची पुनरावृत्ती बीड शहरात एका दुकानात काम करणाऱ्या उमेश दळवी या तरुणाला अमानुष मारहाण करण्यात आल्याचे फोटो सध्या सोशल मीडियावर मोठ्या प्रमाणात व्हायरल होत आहेत. हा तरुण बीड शहरातील एका गरीब कुटुंबातील असून, या दलित तरुणाला दोरीने बांधून मारहाण करत त्याचा खून करण्यात आल्याची खळबळजनक घटना घडली आहे. धक्कादायक म्हणजे मारहाण होण्यापूर्वी या तरुणाने आपल्या पत्नीला फोन करून, “मला या ठिकाणी मारणार आहेत,” अशी भीती व्यक्त केली होती. तरुण ज्या दुकानात काम करत होता, त्याच ठिकाणी त्याला बेदम मारहाण करून त्याचा जीव घेण्यात आल्याचे आता समोर आलंय. या संदर्भात शिवाजीनगर पोलीस ठाण्यात गुन्हा दाखल करण्याची प्रक्रिया सुरू आहे. रायगडच्या आंबेनळी घाटात भीषण अपघात, स्कॉर्पिओ दरीत कोसळली, आठ जणांचा मृत्यू Top 10 News : रायगडच्या आंबेनळी घाटात रविवारी रात्री भीषण अपघात घडल्याची घटना समोर आलीय. या घाटात एक स्कॉर्पिओ गाडी खोल दरीत कोसळून आठ जणांचा जागेवरच मृत्यू झाला आहे. प्राथमिक माहितीनुसार, महाबळेश्वर ते पोलादपूर दरम्यानच्या मार्गातील आंबेनळी घाटाच्या (Ambenali Ghat) परिसरात ही दुर्घटना घडली. गाडी खोल दरीत कोसळल्यामुळे मृत्युमुखी पडलेल्यांचे मृतदेह वर आणण्यासाठी अडचण येत आहे. आतापर्यंत आठ जणांचा मृत्यू झाल्याची माहिती आहे. आतापर्यंत दोन मृतदेह शोधण्यात यश मिळाले आहे. ही स्कॉर्पिओ गाडी आंबेनळी घाटात जवळपास 500 ते 700 फूट खोल दरीत कोसळली आहे. ही स्कॉर्पिओ गाडी साताऱ्यातील असल्याचे समजते. यामध्ये सातारा, आसगाव आणि कोरेगाव येथील पर्यटक असल्याची माहिती आहे. अद्याप अपघाताचे कारण आणि मृतांची ओळख पटलेली नाही. देशात पेट्रोल-डिझेलचे दर पुन्हा वाढले; गेल्या 10 दिवसांत चौथ्यांदा वाढ सर्वत्र महागाईचा भडका उडाला असताना त्यात पुन्हा काहीशी भर घालणारी बातमी समोर आली आहे. पेट्रोल आणि डिझेलच्या दरात पुन्हा एकदा दरवाढ झाली आहे. गेल्या दहा दिवसांत इंधनाच्या दरात दरवाढ होण्याची ही चौथी वेळ आहे. पेट्रोलच्या दरात 2.61 रुपयांनी आणि डिझेलच्या दरात 2.17 रुपयांनी वाढ झाली आहे. सर्वात महत्वाची बाब म्हणजे, गेल्या 10 दिवसांत पेट्रोल आणि डिझेलच्या दरात झालेली ही चौथी दरवाढ आहे. पहिली दरवाढ 15 मे रोजी सुमारे ₹3 ने झाली. त्यानंतर 19 मे ला 90 पैशांनी, पुन्हा 23 मे रोजी सुमारे 90 पैशांनी आणि आता आज पुन्हा एकदा लक्षणीय वाढ झाली आहे. एकूणच, गेल्या 10 दिवसांत पेट्रोल प्रति लिटर ₹7.35 ने आणि डिझेल प्रति लिटर ₹7.53 ने महाग झाले. सुप्रिया सुळे यांनी घेतली पंतप्रधान नरेंद्र मोदींची भेट राष्ट्रवादी काँग्रेस पार्टी शरदचंद्र पवार पक्षाच्या कार्याध्यक्षा आणि खासदार सुप्रिया सुळे यांची कन्या रेवती सुळे आणि नागपूरचे व्यावसायिक सारंग लखानी यांचा विवाह सोहळा मुंबईत 20 जून रोजी पार पडणार आहे. या विवाह सोहळ्याचं निमंत्रण खासदार सुप्रिया सुळे यांनी पंतप्रधान नरेंद्र मोदी यांना दिलं. सुप्रिया सुळे यांनी पंतप्रधान नरेंद्र मोदींची भेट घेतली. यावेळी सुप्रिया सुळे यांच्यासोबत अरुण लखानी आणि त्यांचे कुटुंबीय देखील उपस्थित होते. पंतप्रधान मोदींना निमंत्रण देण्यासाठी रेवती सुळे आणि सारंग लखानी हे देखील उपस्थित होते. सुप्रिया सुळे यांनी दिल्लीत पंतप्रधानांसह केंद्रीय गृहमंत्री अमित शाह , राजनाथ सिंग, लोकसभेचे विरोधी पक्षनेते राहुल गांधी , सोनिया गांधी , प्रियांका गांधी आणि भूपेंद्र यादव, काँग्रेस अध्यक्ष मल्लिकार्जुन खरगे यांची भेट घेतली. रेवती सुळे यांच्या लग्नाचे आमंत्रण देण्यासाठी सहपरिवार भेट झाल्याची समोर येतीय. “भारताला हवं ते सगळं मिळेल, आमच्यावर १०० टक्के विश्वास ठेवा” अमेरिकेच्या स्वातंत्र्यदिनाच्या २५० व्या वर्धापनदिनानिमित्त अमेरिकी दूतावासाने भारतात कार्यक्रमाचे आयोजन केले होते. या कार्यक्रमात अमेरिकेचे राष्ट्राध्यक्ष डोनाल्ड ट्रम्प फोनद्वारे उपस्थित राहिले. अमेरिकेचे राजदूत सर्जिओ गोर यांनी डोनाल्ड ट्रम्प यांना फोन लावला आणि स्पीकरद्वारे डोनाल्ड ट्रम्प यांनी भारतीयांशी संवाद साधला. यावेळी त्यांनी भारताचे पंतप्रधान यांचं कौतुक केलं, तर भविष्यत भारताला हवं ते सगळं मिळेल भारत अमेरिकेवर १०० टक्के अवलंबून राहू शकतो, असं म्हणत आश्वासनही दिलं. दरम्यान,तसेच त्यांनी यापूर्वी भारत आणि अमेरिकेचे इतके घनिष्ट संबंध कधीच नव्हते, तुम्ही माझ्यावर आणि माझ्या देशावर १०० टक्के अवलंबून राहू शकता असे म्हटले. IPL इतिहासातील सर्वात मोठा ट्विस्ट! पंजाब किंग्स टॉप-4 च्या शर्यतीतून बाहेर महिनाभरापूर्वी प्लेऑफसाठी सर्वात मजबूत दावेदार मानला जाणारा पंजाब किंग्स संघ अखेर टॉप-4 च्या शर्यतीतून बाहेर फेकला गेला. एकेकाळी प्लेऑफचं तिकीट जवळपास पक्कं मानली जाणारी पंजाब किंग्सची गाडी अखेर रुळावरून घसरली. 24 मे रोजी राजस्थान रॉयल्सने मुंबई इंडियन्सला पराभूत करताच पंजाबचं प्लेऑफचं स्वप्न एका क्षणात तुटलं आणि आयपीएल 2026 च्या टॉप-4 संघांचे चित्र स्पष्ट झाले. 24 मे रोजी लखनऊ सुपर जायंट्सविरुद्ध विजय मिळवत पंजाबने 15 गुणांपर्यंत मजल मारली खरी आणि आपल्या आशा जिवंत ठेवण्याचा प्रयत्न केला. पण, त्याच दिवशी दुसऱ्या सामन्यात राजस्थान रॉयल्सने मुंबई इंडियन्सला हरवून 16 गुणांसह प्लेऑफमध्ये धडक मारली. राजस्थानच्या या विजयामुळे पंजाबचे आव्हान अधिकृतपणे संपुष्टात आले. ‘मां बहन’चा ट्रेलर चर्चेत Top 10 News : माधुरी दीक्षित, तृप्ती डीमरी आणि रवीकिशन प्रमुख भूमिकेत असलेल्या क्राइम कॉमेडी ड्रामाचा ट्रेलर रिलीज झाला असून सोशल मीडियावर त्याची जोरदार चर्चा सुरू आहे. या चित्रपटात खतरनाक सस्पेन्ससोबत भरपूर कॉमेडीचा तडका पाहायला मिळणार आहे. काही दिवसांपूर्वीच या OTT चित्रपटाची घोषणा करण्यात आली होती. आता ट्रेलर समोर आल्यानंतर प्रेक्षकांची उत्सुकता आणखी वाढली आहे. ‘धक-धक गर्ल’ माधुरी दीक्षित नुकतीच ‘देशपांडे’ या वेबसीरिजमध्ये सिरीयल किलरच्या भूमिकेत दिसली होती. आता ती पुन्हा एकदा क्राइमच्या दुनियेत परतली आहे. मात्र, यावेळी क्राइमसोबत जबरदस्त कॉमेडीही पाहायला मिळणार आहे.2 मिनिटे 46 सेकंदांचा हा ट्रेलर सस्पेन्स, क्राइम आणि कॉमेडीने भरलेला आहे. सुरेश त्रिवेणी यांच्या दिग्दर्शनाखाली तयार झालेला ‘मां बहन’ हा चित्रपट थिएटरमध्ये नव्हे तर थेट नेटफ्लिक्सवर रिलीज होणार आहे. 4 जून 2026 पासून हा चित्रपट OTT वर स्ट्रीम होणार आहे.
