अजित पवारांच्या विमान अपघाताचा प्राथमिक अहवाल जाहीर Top 10 news: राज्याचे दिवंगत उमुख्यमंत्री अजित पवारांच्या विमानाला 28 जानेवारीला अपघात झाला. या घटनेच्या 1 महिन्यानंतर विमान अपघाताचा प्राथमिक अहवाल समोर आला. विमान अपघात चौकशी प्राधिकरणाकडून 22 पानांचा प्राथमिक अहवाल सादर करण्यात आला. बारामती विमानतळावर अजित पवारांचं विमान सकाळी 8 वाजून 46 मिनिटांनी कोसळल्याची माहिती मिळाल्याचं अहवालात नमूद करण्यात आलंय. सुरुवातीला हे विमान झाडावर आदळलं. त्यानंतर जमिनीवर कोसळलं. ही घटना घडली तेव्हा बारामती विमानतळावर 3 हजार मीटर दृश्यमानता होती,असं अहवालात नमूद करण्यात आलं. तर, उड्डाणापूर्वी पायलटनं मद्यपान केलं नव्हतं, असंही अहवालात म्हटलंय. मात्र, बारामती विमानतळावर सुविधा अपुऱ्या असल्याचा ठपका, या अहवालात ठेवण्यात आलाय. सुनेत्रा पवारांकडे असलेल्या खात्याची उत्तरं त्या देणार नाहीत राज्याच्या अर्थसंकल्पीय अधिवेशनाच्या दरम्यान एक मोठी माहिती समोर आली आहे. उपमुख्यमंत्री सुनेत्रा पवार यांच्याकडे असलेल्या तीनपैकी एकाही खात्याची उत्तरं या अधिवेशनात त्या स्वतः देणार नाहीत. त्यांच्या खात्यांशी संबंधित प्रश्नांची उत्तरं देण्याची जबाबदारी इतर मंत्र्यांवर सोपवण्यात आल्याची माहिती आहे. क्रीडा आणि अल्पसंख्याक खात्याची उत्तरं देण्याची जबाबदारी मंत्री दत्तात्रय भरणे यांच्यावर देण्यात आली आहे. तर राज्य उत्पादन शुल्क खात्याशी संबंधित प्रश्नांची उत्तरं देण्याची जबाबदारी ही मंत्री हसन मुश्रीफ यांच्यावर सोपवण्यात आली आहे. अजित पवार यांच्या अकाली निधनानंतर सुनेत्रा पवार यांनी उपमुख्यमंत्रीपदाची शपथ घेतली. उपमुख्यमंत्री सुनेत्रा पवार यांचं हे पहिलच अधिवेशन आहे. त्यामुळसभागृहात त्या काय बोलणार याकडे सगळ्यांचं लक्ष होतं. मात्र त्यांच्या खात्याची जबाबदारी आता इतर मंत्र्यांकडे देण्यात आल्याने सुनेत्रा पवार सभागृहात बोलण्याची शक्यता कमी आहे. लाडक्या बहिणींच्या खात्यात ₹३००० जमा होणार? लाडकी बहीण योजनेच्या लाभार्थ्यांसाठी महत्त्वाची बातमी आहे. आता फेब्रुवारी महिना संपला आहे तरीही महिलांच्या खात्यात मागच्या महिन्याचे पैसे जमा झाले आहे. याउलट फेब्रुवारीच्या शेवटच्या आठवड्यात जानेवारीचा हप्ता देण्यात आला होता. त्यामुळे फेब्रुवारीचा हप्ता लांबणीवर गेला आहे. दरम्यान, यानंतर आता मार्चच्या हप्त्याबाबतही चर्चा सुरु झाल्या आहेत. लाडकी बहीण योजनेत फेब्रुवारीचा हप्ता कधी येणार असा प्रश्न सर्वांनाच पडलेला आहे. फेब्रुवारीचा हप्ता हा मार्च महिन्यात दिला जाऊ शकतो. या महिन्यात कधीही महिांच्या खात्यात ₹१५०० रुपये येऊ शकतात. त्यामुळे महिलांच्या मनात अनेक प्रश्न निर्माण झाले आहेत. लाडकी बहीण योजनेत फेब्रुवारी- मार्चचा हप्ता एकत्र येणार का अशा चर्चा सुरु झाल्या आहेत. मध्यंतरी एकदा दोन हप्ते एकाच महिन्यात दिले होते. त्यामुळे यावेळेसदेखील महिलांच्या खात्यात ३००० रुपये एकत्र येण्याची शक्यता वर्तवली जात आहे. मात्र, हे पैसे कधी येणार याबाबत कोणतीही माहिती समोर आलेली नाही. लवकरच अधिकृत घोषणा केली जाईल, असं बोललं जात आहे. बंजारा समाजाचा ST प्रवर्गात समावेश होणार? बंजारा समाजाचा अनुसूचित जमाती (ST) प्रवर्गात समावेश करण्याच्या मागणीला अखेर अधिकृत स्वरूप मिळालंय. बंजारा समाजाचा अनुसूचित जमातीमध्ये समावेश करण्यासाठी एका समितीची घोषणा करण्यात आली आहे. सरकारच्या आदिवासी विकास विभागाने सहा सदस्यीय उच्चस्तरीय समिती स्थापन केली आहे. या समितीच्या अध्यक्षपदी उच्च न्यायालयाचे निवृत्त न्यायमूर्ती एम. एल. तहलियानी यांची नियुक्ती करण्यात आली आहे. बंजारा समाजाला ST प्रवर्गात समावेश करण्यात यावा अशी मागणी अनेक दशकांपासून केली जातेय. हैद्राबाद गॅझेटीयर’मधील उल्लेखाच्या आधारे समाजाने ही मागणी अधिक आक्रमकपणे रेटून धरली आहे. मराठा आरक्षणाच्या निर्णयानंतर बंजारा समाजानेही त्याच गॅझेटीयरचा संदर्भ देत, बंजारा समाजालाही न्याय द्या अशी मागणी केली जातेय. ही समिती बंजारा समाजातील उपवर्गांसह संपूर्ण समाजाचा ST प्रवर्गात समावेश करण्याच्या मागणीचा सखोल अभ्यास करेल मात्र, शासन निर्णयात समितीला अहवाल सादर करण्यासाठी कोणतीही कालमर्यादा निश्चित करण्यात आली नाहीये. दरम्यान ४ नोव्हेंबर २०२५ रोजी मुंबईत मुख्यमंत्र्यांच्या अध्यक्षतेखाली बंजारा समाजाच्या आरक्षणासंदर्भात उच्चस्तरीय बैठक पार झाली होती. कमी दृश्यमानता असताना देखील लँडिंग करणे म्हणजे पायलटची चूक : मिटकरी दिवंगत उपमुख्यमंत्री अजित पवार यांच्या विमानाचा 28 जानेवारी 2026 ला अपघात झाला होता. यामध्ये अजित पावर यांच्यासह पाच जणांचा मृत्यू झाला होता. या अपघातासंदर्भात हवाई उड्डाण मंत्रालयाच्या एएआयबी तपास यंत्रणेचा 22 पानांचा प्राथमिक अहवाल समोर आला आहे. त्यामध्ये कमी दृश्यमानता VFR नियमांचे संभाव्य उल्लंघन आणि अनकंट्रोल्ड एअरफिल्डवरील सुरक्षा त्रुटी याकडे गंभीर बोट ठेवण्यात आले आहे. दरम्यान, यावर विविध राजकीय नेत्यांनी प्रतिक्रिया दिल्या आहेत. यामध्ये राष्ट्रवादी काँग्रेसचे आमदार अमोल मिटकरी यांनी प्रतिक्रिया दिली आहे. कमी दृश्यमानता असताना देखील लँडिंगचा प्रयत्न केला असा हा अहवाल सांगतोय, म्हणजे पायलटची चूक आहे. हे अप्रत्यक्षपणे त्यांनी मान्य केलं आहे. डीजीसीएला सांगायचं आहे की, एखादा पालयट कसा असावा? दृश्यमानता किती असावी? आम्हाला अशी शंका आहे ती व्हीएसआर व्हेंअचर्सच्या ज्या चुका आहेत त्या चुका त्यांनी मान्य केल्या आहेत. डीजीसीए महाराष्ट्राच्या जनतेला दुधखुळं समजत आहे का? असा सवाल मिटकरींनी केला आहे. देशात होळीआधीच गॅसची दरवाढ देशातील तेल कंपन्या दर महिन्याच्या पहिल्या दिवशी एलपीजी गॅसच्या नवीन किंमती जाहीर करतात. आजदेखील १ मार्च रोजी एलपीजी गॅसच्या किंमती जाहीर करण्यात आल्या आहेत. आज एलपीजी गॅसच्या किंमतीत वाढ झाली आहे. त्यामुळे व्यावसायिकांच्या खिशाला चांगलाच फटका बसण्याची शक्यता आहे. एलपीजी गॅसच्या किंमती वाढल्या आहेत.त्यामुळे रेस्टॉरंट, हॉटेल आणि लहान व्यवासायिकांना फटका बसण्याची शक्यता आहे. आता तुम्हाला १९ किलो वजनाचा एलपीजी गॅस सिलेंडर १७६८.५० रुपयांना मिळणार आहे. याआधी हा दर १७४०.५० रुपये होता. या दरात २८ रुपयांनी वाढ झाली आहे. संपूर्ण देशभरात कमर्शियल एलपीजी गॅसच्या किंमती बदलल्या आहेत. या किंमतीत २८ रुपयांनी वाढ झाली आहे. दरम्यान, घरगुती गॅसच्या किंमतीत कोणताही बदल झालेला नाही. घरगुती गॅसच्या किंमती न बदलल्याने सर्वसामान्यांना, गृहिणींना दिलासा मिळाला आहे. आंध्र प्रदेशमध्ये फटाक्याच्या कारखान्यात भीषण स्फोट आंध्र प्रदेशातील काकीनाडा जिल्ह्यातील समलकोट मंडल येथील वेतलापलेम येथील एका फटाक्याच्या कारखान्यात भीषण स्फोट झाला आहे. यामध्ये 20 जणांचा मृत्यू झाल्याची माहिती मिळाली आहे. तर सहा जण गंभीर जखमी झाले आहेत. कारखान्यात 20 हून अधिक लोक उपस्थित होते. स्फोटाची माहिती मिळताच अग्निशमन दलाच्या पथकांनी घटनास्थळी धाव घेतली. आग विझवण्याचा प्रयत्न सुरू केला. स्थानिक रहिवाशांनीही मदत केली. जखमींना रुग्णवाहिकेने रुग्णालयात नेण्यात आले. गंभीर भाजलेल्यांपैकी अनेकांची प्रकृती गंभीर आहे. स्फोटात मृतदेहांचे तुकडे झाले आणि जवळच्या इमारतींचेही मोठे नुकसान झाल्याची माहिती मिळत आहे. इराणचे सुप्रीम लीडर यातुल्ला अली खामेनींचा मृत्यू जगाचं लक्ष लागून राहिलेल्या अमेरिका-इस्रायल आणि इराण यांच्यातील युद्धाबाबत महत्तवाची अपडेट समोर आली. अमेरिका आणि इस्रायलनं केलेल्या हल्ल्यात इराणेचे सर्वोच्च नेते अयातुल्ला अली खामेनी यांचा मृत्यू झाल्याचा दावा इस्रायलचे पंतप्रधान बेंजामिन नेतान्याहू यांनी केला. तसंच खामेनी यांचा मृतदेह देखील सापडल्याचा दावा करण्यात आला. दरम्यान अमेरिका आणि इस्रायलकडून इराणचे सर्वोच्च नेते अयातुल्ला अली खामेनी यांच्या कार्यालयांजवळ क्षेपणास्त्र डागण्यात आली. तसंच त्यांच्या घराजवळ बंकर बस्टिंग क्षेपणास्त्र डागण्यात आलं. त्यामुळे खामेनी यांचा मृत्यू झाल्याचा दावा इस्रायलचे पंतप्रधान नेतान्याहू यांनी केला. इस्रायलचे पंतप्रधान बेंजामिन नेतान्याहू यांनी केलेल्या घोषणेला अमेरिकेचे राष्ट्राध्यक्ष डोनाल्ड ट्रम्प यांनी दुजोरा दिला. इराणेचे सर्वोच्च नेते खामेनी यांचा मृत्यू झाल्याची घोषणा डोनाल्ड ट्रम्प यांनी केली. इतिहासातील अत्यंत वाईट व्यक्तींमधील एक असलेल्या खामेनी यांचा मृत्यू झाल्याचं ट्रम्प यांनी सोशल मीडियावर केलेल्या पोस्टमध्ये म्हटलंय. जन्नतफेम अभिनेत्री दुबईमध्ये अकडली अमेरिका आणि इस्त्राईलने संयुक्तपणे इराणवर हवाई हल्ला केल्याने जगभरात खळबळ उडाली आहे. या हल्ल्यास इराण देखील जशास तसे प्रत्युत्तर दिल्याने संघर्ष आणखी तीव्र झाला आहे. यामुळे युद्धजन्य परिस्थितीत निर्माण झाली आहे. या हल्ल्याचा परिणाम विविध राष्ट्रांवर होणार असल्याचे सांगितले जात आहे. विमानांची उड्डाणे रद्द करण्यात आल्याने याचा फटका भारतीय नागरिकांना बसला आहे. दुबईजवळ असलेल्या अमेरिकन सैन्याच्या तळावर हल्ले झाले आहेत. त्यामुळे दुबईत अनेक भारतीय नागरिक अडकल्याची माहिती समोर आली आहे. बॅालीवूडमधील लोकप्रिय अभिनेत्री देखील दुबईमध्ये अडकली असून, तिने सोशल मीडियावरून पोस्ट शेअर करत थेट पंतप्रधान नरेंद्र मोदी यांच्याकडे मदतीची मागणी केली आहे. अभिनेत्री सोनल चौहान दुबईमध्ये शुटिंगसाठी गेली असून, ती दुबई विमानतळावर अडकली आहे. तिने ट्वीट करत भारत सरकारकडे मदतीची मागणी केली आहे.
