Rekha : सौदी अरेबिया येथे होणाऱ्या रेड सी आंतरराष्ट्रीय चित्रपट महोत्सवात बॉलिवूडची अभिनेत्री रेखाने सहभाग नोंदवला. या कार्यक्रमात रेखाला रेड सी मानद पुरस्कार प्रदान करण्यात आला. तसेच १९८१ मधील प्रसिद्ध चित्रपट ‘उमराव जान’ रीस्टोर्ड व्हर्जेन दाखवण्यात आले. पुरस्कार मिळाल्यानंतर रेखाने आनंद व्यक्त करत आपल्या भावना कवितेमधून व्यक्त केल्या. यावेळी उपस्थित असणाऱ्यांनी टाळ्या वाजवून त्यांच्या कवितेला दाद दिली. पुरस्कार मिळाल्यानंतर रेखाने एक सुंदर कविता सादर केली. तसेच आईबद्दलच्या हृदयस्पर्शी गोष्टीही सांगितल्या. रेड सी इंटरनॅशनल फिल्म फेस्टिव्हलमध्ये रेखा पूर्णपणे ‘उमराव जान’ लूकमध्ये दिसत होती. तिचा हा लूक सर्वांचे लक्ष वेधून घेणारा ठरला. यावेळी बोलताना आपल्या भावनाही अभिनेत्रीने व्यक्त केल्या. ‘चित्रपटांमुळेच मी जिवंत आहे.’ असे रेखा म्हणाली. रेखाने ‘उमराव जान’ चित्रपटातील ‘दिल चीज क्या है’ या प्रसिद्ध गाण्याच्या काही ओळीही ऐकवल्या. “ही मनाची सर्वात मोठी शांती आहे. मी याचा जिवंत पुरावा आहे.” असे तिने चित्रपटाबद्दल बोलताना सांगितले. तिची आई अभिनेत्री पुष्पवल्लीला आठवताना रेखा म्हणाली, ‘आई नेहमी म्हणायची की तुमच्या यशाबद्दल आणि भावनांबद्दल जास्त बोलू नका. लोकांना सांगून नव्हे तर स्वतः चांगले जीवन जगून लोकांना सांगा. त्यामुळे काय करावे आणि काय करू नये हे स्वतः निरीक्षण करून लोक शिकतील, असेही रेखा बोलताना म्हणाली. ‘उमराव जान’ चित्रपटाची कथा १८९९ च्या प्रसिद्ध उर्दू कादंबरी “उमराव जान अदा” वर आधारित आहे. या चित्रपटात रेखाने लखनौमधील गायिका आणि कवयित्रीची भूमिका साकारली होती. हा चित्रपट रेखाच्या चित्रपट कारकिर्दीतील सर्वात स्मरणीय आणि क्लासिक चित्रपटांपैकी एक म्हणून ओळखला जातो. हेही वाचा : विना नागरिकत्व मतदार यादीत नाव ; कोर्टाने सोनिया गांधी अन् दिल्ली पोलिसांना बजावली नोटीस
