मुंबई :  मुंबई महापालिकेने हंगामी अर्थसंकल्प सादर करावा, या शिवसेना नेते अनिल परबांच्या मागणीवरून भाजपचे नेते आशिष शेलार यांनी त्यांच्यावर जोरदार हल्लाबोल केला आहे. यावेळी बोलताना,’ज्यांच्या सरकारने शासन निर्णयाद्वारे महापालिका आयुक्तांकडे सर्व अधिकार सोपवले, आता तेच नेते स्वत:च्या सरकारने दिलेल्या अधिकारांवर मर्यादा आणण्याची मागणी करत आहेत, अशी प्रतिक्रिया आशिष शेलारांनी दिली.

खरं तर, शनिवारी मुंबई महानगर पालिकेचा अर्थसंकल्प सादर केला जाणार आहे. पण मुंबई महापालिकेच्या निवडणूका लांबणीवर पडल्याने सर्व प्रशासकीय अधिकार आयुक्तांना देण्यात आले आहेत. त्यामुळे मुंबई प्रशासनाने केवळ हंगामी अर्थसंकल्प सादर करावा, अशी मागणी शिवसेना नेते अनिल परब यांनी केली. याबाबत विचारलं असता आशिष शेलारांनी टोलेबाजी केली आहे.

‘मुंबई महापालिकेने हंगामी अर्थसंकल्प सादर करावा’ या अनिल परबांच्या मागणीबाबत विचारले असता आशिष शेलार यांनी , “अनिल परब यांच्यावर तथ्यांची पडताळणी न करता बोलण्याची वेळ आली आहे.कारण ७ मार्चला महापालिकेच्या सभागृहाचे सर्व अधिकार संपले होते. त्यानंतर तत्कालीन राज्य सरकारने शासन निर्णय जारी केला. या शासननिर्णयाद्वारे ठाकरे सरकारने महापालिका सभागृहाचे, महापालिकेचे, स्थायी समितीचे, सर्व समित्यांचे, सर्व अधिकार हे महापालिका आयुक्ताला दिले. याचा उल्लेख राज्य सरकारने स्वत: शासननिर्णयात केला आहे. त्यावेळी उद्धव ठाकरे यांचं सरकार होतं.”असे म्हटले.

तसेच पुढे बोलताना, “उद्धव ठाकरे यांच्या स्वाक्षरीने जारी केलेल्या शासननिर्णयाद्वारे सर्व अधिकार आयुक्तांना दिले होते. त्यामुळे हंगामी अर्थसंकल्प सादर करण्याचा प्रश्न येतोच कुठे? स्वत:च्या सरकारने दिलेल्या अधिकारांवर मर्यादा आणण्याची मागणी करणं म्हणजे उलटे सूर्यनमस्कार घालण्यासारखं आहे. उलटे सूर्यनमस्कार घालायला अनिल परबांना जमतील असं मला वाटत नाही. त्यांनी उलटा सूर्यनमस्कार घालूही नये,” असा टोला आशिष शेलारांनी लगावला.