Nawab Malik – राष्ट्रवादीचे नेते आणि माजी मंत्री नवाब मलिक हे देखील राज्य हिवाळी अधिवेशनात सत्ताधारी अजित पवार गटाच्या बाकावर बसले. सुटकेनंतर प्रथमच मलिक हिवाळी अधिवेशनाला उपस्थित राहिले आहेत. अधिवेशनाला ते कोणत्या गटात बसणार अशा चर्चा सुरू झाल्यानंतर त्यांनी आपण तटस्थ राहणार असल्याची भूमिका जाहीर केली होती. मात्र आता सत्ताधारी बाकावर बसून त्यांनी या चर्चांना पूर्णविराम दिला आहे. दरम्यान, नवाब मलिक यांनी यावर प्रतिक्रिया दिली आहे. मी राष्ट्रवादीमध्ये आहे. अधिवेशनात विधानभवनाच्या दरम्यान राजकीय मुद्द्यावर बोलणार नाही. माझ्या मतदार संघाच्या समस्या सभागृहात मांडणार आहे. आमच्यात कोणतीही फाटाफूट नाही आम्ही एकच आहोत, असे आमदार नवाब मलिक म्हणाले. ते राष्ट्रवादीच्या कार्यालयात बसले होते. राष्ट्रवादीत पडलेल्या फुटीनंतर बहुतांश आमदार हे उपमुख्यमंत्री अजित पवार यांच्या नेतृत्वाखालील गटात सामील झाले आहेत. मात्र सर्वोच्च न्यायालयाकडू जामिनावर सुटका झाल्यानंतर नवाब मलिक नक्की कोणत्या गटात जाणार, याबाबत चर्चांना उधाण आले होते. यादरम्यान, नवाब मलिक यांनी यापूर्वी आपण तटस्थ राहणार असल्याची भूमिका जाहीर केली होती.
