चेन्नई  – सनातन धर्माविषयी मी केलेल्या वक्तव्याचा भाजपाकडून गैर अर्थ काढण्यात आल्याने माझ्यावर देशभरातून टीका होत आहे. काही जणांनी न्यायालयात जाण्याचीही धमकी दिली आहे. या सर्व वादाला मी सामोरा जाणार असून कायदेशीररित्या मी माझी बाजू मांडणार आहे, अशा शब्दांत तामिळनाडूचे मुख्यमंत्री एमके स्टॅलिन यांचे पुत्र उदयनिधी स्टॅलिन यांनी आपले स्पष्टीकरण दिले आहे.

उदयनिधी यांनी सनातन धर्माबाबत दिलेल्या कथित वादग्रस्त विधानावरून वाद वाढत आहे. भाजप नेत्यांसह “इंडिया’ आघाडीतील अनेक नेते आपला निषेध नोंदवत आहेत. त्यामुळे निर्माण झालेल्या वादाचे पडसाद अजूनही उमटतच आहेत.

यावेळी उदयनिधी यांनी पंतप्रधान नरेंद्र मोदींवरही जोरदार हल्ला चढवला. मणिपूर हिंसाचारावरील प्रश्नांना सामोरे जावे लागू नये, म्हणून मोदी जगभर फिरत आहेत. मोदींनी भाजपाच्या माध्यमातून दिलेली गेल्या नऊ वर्षांपासूनची सर्व आश्वासने पोकळ आहेत. सध्या संपूर्ण देश भाजप सरकारविरोधात एकजुटीने प्रश्न उपस्थित करत आहे की, मोदींनी आमच्या कल्याणासाठी काय केले?

उदयनिधी असेही म्हणाले की, मोदी आणि कंपनी लक्ष विचलित करण्यासाठी सनातनच्या वक्तव्याचा विपर्यास करत आहेत. भाजप नेत्यांनी सनातन धर्म परिषदेतील माझ्या भाषणाला ‘नरसंहार भडकावणारे’ असे संबोधले. केंद्रीय मंत्री अमित शहा आणि भाजपशासित राज्यांचे मुख्यमंत्री फेक न्यूजच्या आधारे माझ्यावर कारवाई करण्याची मागणी करत आहेत हे आश्‍चर्यकारक आहे. माझ्या विरोधात अफवा पसरवल्याबद्दल त्यांच्यावर फौजदारी गुन्हे दाखल करावेत हे मला माहीत आहे, असे उदयनिधी म्हणाले.

तामिळनाडूचे दिवंगत नेते आणि द्रविड मुन्नेत्र कळघम पक्षाचे संस्थापक कांजीवरम नटराजन अन्नादुराई यांच्या राजकीय उत्तराधिकारींपैकी एक उदयनिधी स्टॅलिन म्हणाले की, सर्वांना माहित आहे की आम्ही कोणत्याही धर्माचे शत्रू नाही आहोत. मी अन्नादुराई यांची धर्मांबद्दलची टिप्पणी उद्धृत करू इच्छितो, जी आजही प्रासंगिक आहे. कोणताही धर्म जर लोकांना समतेकडे घेऊन जात असेल आणि बंधुत्वाची शिकवण देत असेल, तर मी सुद्धा अध्यात्मवादी आहे.

कोणत्याही धर्माने जातींच्या नावावर लोकांमध्ये फूट पाडली, त्यांना अस्पृश्‍यता आणि गुलामगिरी शिकवली, तर त्या धर्माला विरोध करणारा मी पहिला व्यक्ती असेन. जे लोक धर्म सर्व समान आहेत, असे मानतात, त्या सर्व धर्मांचा द्रमुक आदर करतो. यापैकी काहीही किंचितही समजूत न घेता, मोदी अँड कंपनी संसदीय निवडणुकांना सामोरे जाण्यासाठी माझ्या वक्तव्याचे भांडवल करत आहेत.