नगर (प्रतिनिधी) -गेल्या दहा वर्षापासून नगर शहराच्या शैक्षणिक, सांस्कृतिक, सामाजिक क्षेत्रात विविध उपक्रम राबवून नगर शहराविषयी तळमळ व आस्था वाढवणाऱ्या नगर जल्लोष परिवार ट्रस्टच्या वतीने करोना लॉकडाऊन कालावधीत स्वतःचा जीव धोक्यात घालून उत्कृष्ट कामगिरी करणाऱ्या करोना योद्धांचा गौरव करण्यात आला असून त्यांना चेंज मेकर्स अवॉर्ड पुरस्काराने सन्मानित करण्यात आले आहे. अशी माहिती जल्लोष ट्रस्ट परिवाराचे अध्यक्ष सागर बोगा यांनी दिली.

मनपा आयुक्त श्रीकांत मायकलवार, आय लव नगरचे नरेंद्र फिरोदिया, साईदीप हॉस्पिटलचे डॉ. दीपक, मनपा अभियंता परिमल निकम, जिल्हा शैल्य चिकित्सक डॉ. मुरंबीकर, डॉ. अनिल बोरगे, दोन राष्ट्रपती पदक प्राप्त कलाकार शिक्षक डॉ. अमोल बागूल, घर घर लंगर सेवा उपक्रमाचे प्रणेते हरजितसिंह वधवा आदींना नगर जल्लोष ट्रस्ट परिवाराच्या वतीने यंदाचे चेंज मेकर्स अवॉर्ड-2020 शहराच्या 530 व्या स्थापनादिनी प्रदान करण्यात आला.

आय लव नगरच्या माध्यमातून नरेंद्र फिरोदिया यांनी हजारो कुटुंबांना किराणा मालाचे वितरण व करोना प्रतिबंध जनजागृतीचे विशेष काम केले. डॉ. दीपक यांनी आपले हॉस्पिटल करोना रुग्ण तपासणीसाठी व विलगीकरणासाठी प्रशासनाच्या ताब्यमात दिले. अशी सेवा देण्यासाठी पुढे आलेले नगर जिल्ह्यातील हे पहिले हॉस्पिटल आहे. त्यांना करोना वॉरियर्स हा पुरस्कार अध्यक्ष सागर बोगा, शिल्पकार प्रमोद कांबळे, प्रदीप पंजाबी, बालाजी वल्लाल यांच्या हस्ते देण्यात आला.

कलाकार शिक्षक अमोल बागूल यांनी नगर तहसील फ्लाईंग स्कॉड, स्टडी फ्रॉम होम पॅटर्न, राष्ट्राचे शिल्पकार, पोलिसांना रात्रीचे पाणीवाटप, मास्क बनवून मोफत वितरण आदी उपक्रमांच्या माध्यमातून आपले योगदान दिले. घर घर लंगर सेवेच्या माध्ममातून ला. हरजितसिंग वधवा यांनी अनेक व्यक्ती व संस्थांच्या माध्यमातून सुमारे 3 लाखापेक्षा जास्त कुटुंबियांपर्यंत मोफत भोजन सेवा व किराणा किट पुरवली.

मनपा अभियंता परिमल निकम यांनी कम्युनिटी किचन या लॉकडाउन काळात हॉटेल संजोगचे प्रदीप पंजाबी यांच्या सहकार्यने अविरत चालू ठेवले. प्रशासनाचे सर्व निमम पाळून सोशल डिस्टन्सिंग, सॅनिटायझरचा वापर करून नगर जल्लोष सदस्यांच्या हस्ते मान्यवरांच्या कार्यालयात जाऊन सन्मान करण्यात आला.

करोनाची रुग्णसंख्या वाढत असल्याने जिल्हाधिकारी, मनपा आयुक्त, जिल्हा पोलीस उपअधीक्षक, जिल्हा शैल्य चिकित्सक हे पुरस्कार हे संकट निवळल्यावर स्वीकारणार असल्याचे बोगा यांनी सांगितले.

कार्यक्रमासाठी रत्नाकर श्रीपत, अजय म्याना, संतोष दरांगे, सचिन बोगा, अक्षय अंबेकर, सुनील मानकर, राकेश बोगा, गणेश साळी, दीपक गुंडू, रोहित लोहार, महेश बल्ला, नीलेश मिसाळ, योगेश म्याकल, प्रशांत भंडारी, सुमित ईप्पलपेल्ली, विकास जाधव, विराज म्याना, ज्ञानेश्वर भगत, राहुल आडेप आदींनी परिश्रम घेतले.