वॉशिंग्टन: अमेरिकेने कॅरिबियन सागरात ड्रग्ज तस्करी करणाऱ्या एका बोटीवर क्षेपणास्त्र हल्ला करून ती नष्ट केल्याचा दावा केला आहे. या कारवाईत ड्रग्जची तस्करी करणाऱ्या ६ दहशतवाद्यांना ठार केल्याचे सांगण्यात आले आहे. अमेरिकेचे संरक्षण मंत्री पीट हेगसेथ यांनी शुक्रवारी ही माहिती दिली, तसेच या हल्ल्याचा व्हिडिओ सोशल मीडियावर शेअर केला आहे. अमेरिकेने ड्रग्ज तस्करांवरील मोहिम तीव्र केली असून, हा त्यांचा दहावा हल्ला होता.

६ तस्करांचा खात्मा; आतापर्यंत ४६ तस्कर ठार
या ताज्या हल्ल्यामुळे ड्रग्ज कार्टेलविरुद्ध अमेरिकेने चालवलेल्या या मोहिमेत ठार झालेल्या तस्करांची एकूण संख्या आता किमान ४६ झाली आहे. हेगसेथ यांनी सोशल मीडियावर पोस्ट करत सांगितले की, ही बोट ट्रेन डी अरागुआ (TdA) नावाच्या संघटित दहशतवादी टोळीद्वारे (DTO) चालवली जात होती.

Overnight, at the direction of President Trump, the Department of War carried out a lethal kinetic strike on a vessel operated by Tren de Aragua (TdA), a Designated Terrorist Organization (DTO), trafficking narcotics in the Caribbean Sea.

The vessel was known by our… pic.twitter.com/lVlw0FLBv4

— Secretary of War Pete Hegseth (@SecWar) October 24, 2025

संरक्षण मंत्र्यांचे कठोर वक्तव्य –
संरक्षण मंत्री हेगसेथ यांनी आपल्या पोस्टमध्ये स्पष्ट केले की, “अध्यक्ष ट्रम्प यांच्या निर्देशानुसार, युद्ध विभागाने ‘ट्रेन डी अरागुआ’ (TdA) द्वारे चालवल्या जाणाऱ्या एका जहाजावर घातक तीव्र हल्ला केला. हे जहाज कॅरिबियन सागरात अंमली पदार्थांची तस्करी करत होते. आमच्या गुप्त माहितीनुसार, हे जहाज अवैध अंमली पदार्थांच्या तस्करीमध्ये सामील होते, ज्ञात नार्को-तस्करी मार्गावर होते आणि ड्रग्जने भरलेले होते. हल्ल्याच्या वेळी जहाजावर ६ पुरुष नार्को-दहशतवादी होते. हा हल्ला आंतरराष्ट्रीय जलक्षेत्रात आणि रात्रीच्या वेळी केलेला पहिला हल्ला होता. या हल्ल्यात सर्व सहा दहशतवादी मारले गेले असून, कोणतीही अमेरिकन सैनिक जखमी झालेले नाही.”

नार्को-दहशतवाद्यांना स्पष्ट इशारा –
हेगसेथ यांनी ड्रग्ज तस्करांना स्पष्ट आणि कठोर शब्दात इशारा दिला आहे. ते म्हणाले, “जर तुम्ही आमच्या गोलार्धात अंमली पदार्थांची तस्करी करणारे नार्को-दहशतवादी असाल, तर आम्ही तुम्हाला अल-कायदाप्रमाणेच मानू. दिवस असो वा रात्र, आम्ही तुमच्या नेटवर्कची ओळख पटवू, तुमच्या लोकांवर लक्ष ठेवू, तुमचा पाठलाग करू आणि तुम्हाला मारून टाकू.”

या मोहिमेची गती वाढली असून, सप्टेंबरमध्ये सुरू झालेल्या या हल्ल्यांची वारंवारता आता वाढली आहे. सुरुवातीला दर काही आठवड्यांनी एक हल्ला होत होता, पण आता एका आठवड्यात तीन हल्ले झाले आहेत. या आठवड्यातील दोन हल्ले पूर्वेकडील पॅसिफिक महासागरातही करण्यात आले आहेत, ज्यामुळे अमेरिकेच्या लष्करी कारवाईचे क्षेत्र वाढले आहे.