करोनाच्या पार्श्वभूमीवर सुरक्षेसाठी असलेले पोलीस आणि वाहन पोलीस विभागाला वापरण्यास दिली परवानगी

नगर – माझ्या सुरक्षतेपक्षा देशाची सुरक्षा महत्वाची असून करोना विषाणूचा प्रादुर्भाव रोखण्यासाठी मृद व जलसंधारण मंत्री शंकरराव गडाख यांनी आपल्या सुरक्षेसाठी असलेले पोलीस कर्मचारी व ते वापरत असलेले पोलीस वाहने वापन्यासाठी परवानगी दिली आहे. याबाबत प्रभारी पोलीस अधीक्षक सागर पाटील यांना पत्र दिले आहे.

ना. गडाख यांनी दिलेल्या पत्रात म्हटले आहे की, देश आणि महाराष्ट्र करोना व्हायरसच्या संकटाचा सामना करत असुन राज्याचे मुख्यमंत्री उध्दव ठाकरे यांनी महाराष्ट्रात राष्ट्रहितासाठी संचारबंदी लागु केली आहे. याचे काटेकोरपणे पालन करणे हे प्रत्येक नागरिकाचे कर्तव्य आहे. आपल्या भागातील संचारबंदीची प्रभावी अंमलबजावणी होण्यासाठी संपुर्ण पोलीस यंत्रणा आटोकाट प्रयत्न करत आहे. त्यामुळे पोलीस यंत्रणेवर आलेला अधिकचा ताण पाहता मंत्री म्हणून माझ्या सुरक्षेसाठी असलेले पोलीस कर्मचारी व ते वापरत असलेले पोलीस वाहन आपण शहर व परिसरातील संचारबंदीच्या अमलबजावणीसाठी वापरण्यास माझी काहीही हरकत नाही.

आज माझ्या सुरक्षेपेक्षा देशाची तसेच राज्याची व येथील जनतेची सुरक्षा महत्वाची आहे. राज्याचा मंत्री म्हणून माझे ते कर्तव्य आहे. मी आजपासून माझे सुरक्षेसाठी असलेले पोलीस कर्मचारी व ते वापरत असलेले पोलीस वाहन करोना व्हायरस प्रार्दुभाव रोखण्यासाठी करण्यात येणाऱ्या उपाययोजनेत वापरण्यास आपणास याद्वारे परवानगी देत असल्याचेही पत्रात म्हटले आहे.