Ganeshotsav 2022 : पोलीस बांधवानी घेतला मिरवणुकीत नाचण्याचा मनमुराद आनंद
शिक्रापूर (प्रतिनिधी) – पोलिसांना कोणतेच सण, उत्सव साजरे करण्याचा आनंद घेता येत नसतो. प्रत्येकवेळी कोणत्याही उत्सवावेळी पोलिसांची सुट्टी देखील रद्द होत त्यांना बंदोबस्तावर हजर रहावे लागते. मात्र, शिक्रापूर पोलीस स्टेशनच्या पोलिसांनी पोलीस स्टेशनमध्ये बसवलेल्या गणपतीचे मोठ्या उत्साहात विसर्जन करीत आनंद लुटला.
शिक्रापूर पोलीस स्टेशन येथे सर्व पोलिसांच्या वतीने गणेशोत्सवानिमित्त विधिवत गणरायाची प्राणप्रतिष्ठा करण्यात आली होती. दररोज पोलीस अधिकारी, कर्मचारी, पत्रकारांच्या हस्ते आरती करीत गणेशोत्सव साजरा केला. आता सर्वत्र गणेश विसर्जन कार्यक्रम होणार असल्याने पोलिसांना बंदोबस्तावर हजर रहावे लागणार आहे. त्यामुळे गुरूवारी (दि.8) पोलीस स्टेशनच्या गणपतीचे विसर्जन करण्यात आले.
यावेळी सर्व पोलिसांनी फेटे बांधत गणपतीची पारंपारिक वाद्याच्या तालात मिरवणूक काढत जल्लोषात विसर्जन करण्यात आले. यावेळी पोलीस निरीक्षक हेमंत शेडगे, सहायक पोलीस निरीक्षक विक्रम साळुंके, नितीन अतकरे, वैभव पवार, वैभव स्वामी, पोलीस उपनिरीक्षक राजेश माळी, अधिकारी कर्मचारी, महिला कर्मचारी सहभागी झाले होते.
