वाई – श्रावण महिन्यात कृष्णा नदीच्या स्नानाची पर्वणी काही वेगळीच असते. शेवटच्या श्रावणी सोमवारी वाई तालुक्यातील प्रत्येक गावातील ग्रामदेवतांच्या पालख्या स्नानासाठी कृष्णा नदीवर येतात. त्यामुळे गणपती घाटावर भक्तांची प्रचंड गर्दी होते. भाविकांच्या गर्दीने गणपती घाटाला यात्रेचे स्वरूप येते.
आज वर्षानुवर्षे ही परंपरा चालू असून शेवटच्या श्रावणी सोमवारच्या निमित्ताने वाई तालुक्यातील ग्रामस्थ आपल्या कुलदैवतांना पालखीत बसवून वाजत-गाजत कृष्णातीरी आणून विधिवत पूजा करून स्नान घालून पुन्हा गुलालाची उधळण करीत आपल्या गावी मार्गस्थ होतात.
श्रावण महिन्याचे औचित्य साधून या देवतांच्या पालख्या दरवर्षी दक्षिणकाशीची गंगा म्हणून प्रसिध्द असणाऱ्या कृष्णामाईच्या स्नानाला येण्याची फार पूर्वीपासूनची प्रथा आहे. पूर्वी वाजत-गाजत बैल गाडीतून वाईच्या गणपती घाटावर कृष्णा नदीत स्नानाला आणले जात असे. हा सोहळा पाहण्यासाठी गणपती घाटावर वाईकरांची मोठी गर्दी झालेली असते. गणपती घाटावर तालुक्यातील मानाच्या पालख्यांचा रुबाब वेगळाच असतो.
आपल्या ग्रामदेवतेबरोबर घरातील देवसुध्दा यावेळी कृष्णा स्नानाला आणले जातात. विधिवत स्नान घालून जलाभिषेक करून कृष्णा नदीची आरती करण्यात येवून पुन्हा गुलालाची उधळण करीत गणपती घाटावर सोनजाई मठातील पथकाने ढोल-लेझीमचे ताल धरल्यामुळे घाटावरील वातावरण भक्तिमय झाले होते.
फार पूर्वी बैल गाड्यांतून कुलदैवतांना आणले जात असे, परंतु काळानुरूप सध्या ट्रक या टेम्पोमधून वाई शहराच्या वेशीपर्यंत आणले जाते, त्यानंतर मिरवणुकीने सर्व पालख्या कृष्णा नदीवर स्नानासाठी येतात. गाव-गावांतील मानाच्या पालख्या यात सहभागी झालेल्या असतात. वाई शहरातून पालख्यांची मिरवणूक काढण्यात येते व शेवटी कृष्णा नदीवर पालख्या स्नानासाठी येतात. भाविकांच्या गर्दीने संपूर्ण घाटाला यात्रेचे स्वरूप आले होते.
महागणपती घाट व काशीविश्वेश्वराचे दर्शन घेवून भाविक आपल्या ग्रामदेवतेला पालखीत ठेवून मिरवणुकीने आपल्या गावी निघून गेले. गणपती घाटाशेजारी असणाऱ्या काशीविश्वेश्वर व फुलेनगर येथील भद्रेश्वर मंदिरातसुध्दा भक्तांची प्रचंड गर्दी होती. लांबच-लांब भक्तांच्या रांगा लागलेल्या होत्या. व्यापाऱ्यांची दुकाने बेल-फुलांच्या हारांनी व प्रसादाच्या साहित्यांनी सजलेली होती, पालख्यांना पाहण्यासाठी वाईकरांनी मोठी गर्दी केली होती.