Rajgurunagar | पुणे जिल्हातील राजगुरुनगरमध्ये महाविद्यालयात शिक्षण घेणाऱ्या अल्पवयीन तरुणीचा मृतदेह शनिवारी पहाटे भीमा नदी पात्रात आढळून आला होता. यामुळे राजगुरुनगरमध्ये एकच खळबळ उडाली होती. मयत अल्पवयीन तरुणी बेपत्ता झाल्याची तक्रार तिच्या आई वडिलांनी राजगुरुनगर पोलिसांत दिली होती. त्यानंतर तरुणीचा मृतदेह भीमा नदी पात्रात आढळून आला.

शुक्रवारी ११ एप्रिल रोजी ही अल्पवयीन तरुणी महाविद्यालयाचे कारण सांगून घरातून निघून गेली होती. मुलगी परतत नसल्याने काळजीत असलेल्या आई वडिलांनी राजगुरुनगर पोलिस ठाणे गाठत तिची बेपत्ता झाल्याची तक्रार दिली होती.

पोलिसांनी दिलेल्या माहितीनुसार, तरुणीचा मृतदेह मांजरेवाडी येथे भीमा नदीच्या पात्रात आढळून आला आहे. तपासणीत मुलीच्या डोक्यावर आणि तोंडावर गंभीर दुखापती आढळून आल्या आहेत. यावरून पोलिसांनी हा खून असल्याचा प्राथमिक अंदाज व्यक्त केला आहे. पुरावे नष्ट करण्याच्या उद्देशाने मृतदेह नदीत फेकून दिल्याचा संशय पोलिसांना आहे. यामुळे तरुणीच्या हत्यमागेचे नेमक कारण काय आहे? याचा शोध पोलीस घेत आहेत.

सीसीटीव्ही फुटेज समोर 

या प्रकरणाचा तपास पोलीस करत असून पोलिसांनी तरुणीची हत्या झाल्याचा दाट संशय पोलिसांना आहे. या घटनेमुळे राजगुरुनगरमध्ये खळबळ उडाली असून भीतीचे वातावरण तयार झाले आहे. आता या प्रकरणात एक मोठा पुरावा पोलिसांच्या हाती लागला आहे. पोलिसांच्या हाती सीसीटीव्ही फुटेज लागले असून या फुटेजची तपासणी पोलिसांनी केली असता ही मुलगी एका मुलाच्या दुचाकीवर बसून जाताना दिसत आहे. या प्रकरणी एका संशयित व्यक्तीला पोलिसांनी ताब्यात घेतले असल्याची माहिती आहे.

कुटुंबावर दुःखाचा डोंगर 

रविवारी १३ एप्रिल रोजी पीडित मुलीच्या मोठ्या बहिणीचा साखरपुड्याचा कार्यक्रम होणार होता. त्यामुळे सर्व कुटुंबीय आनंदात होते. मात्र, छोट्या मुलीचा खून झाल्यामुळे कुटुंबासह संपूर्ण गावार दु:खाचा डोंगर कोसळला आहे. खेड पोलीस ठाण्याचे अधिकारी या प्रकरणाचा सखोल तपास करत आहेत. आरोपीचा शोध घेण्यासाठी पोलिसांनी स्थानिक नागरिक आणि साक्षीदारांचे जबाब नोंदवण्यास सुरुवात केली आहे.