Japanese Lifestyle: आनंदी आणि तणावमुक्त जीवनाचं जपानी सीक्रेट! ‘या’ ७ सवयी नक्की करून पाहा
Japanese Lifestyle घर आवरण्यापासून ते जेवताना कृतज्ञता व्यक्त करण्यापर्यंतच्या छोट्या गोष्टींमधूनही दिवस अधिक व्यवस्थित आणि शांत करण्याचा प्रयत्न करता येतो.
Japanese Lifestyle: रोजची धावपळ, कामाचा ताण आणि बदलती जीवनशैली यामुळे अनेकांना स्वतःसाठी वेळ देणं कठीण झालं आहे. सततचा ताण, अपुरी विश्रांती, व्यायामाचा अभाव आणि विस्कळीत दिनचर्या याचा परिणाम आपल्या मनःशांतीवरही होऊ शकतो. अशा परिस्थितीत जपानी जीवनशैलीतील काही छोट्या आणि शिस्तबद्ध सवयी आपल्या दैनंदिन जीवनात उपयोगी ठरू शकतात.
या सवयींसाठी फार मोठे बदल करण्याची गरज नाही. घर आवरण्यापासून ते जेवताना कृतज्ञता व्यक्त करण्यापर्यंतच्या छोट्या गोष्टींमधूनही दिवस अधिक व्यवस्थित आणि शांत करण्याचा प्रयत्न करता येतो. चला जाणून घेऊया अशाच सात जपानी पद्धती…
१. हायाओकी – सकाळची सुरुवात शांतपणे करा
जपानी जीवनशैलीत दिवसाची सुरुवात लवकर करण्याला महत्त्व दिलं जातं. सकाळी उठल्यानंतर लगेच मोबाईल किंवा कामात व्यस्त होण्याऐवजी स्वतःसाठी थोडा वेळ देता येतो. हलका व्यायाम, ध्यान, चहा-कॉफीचा आस्वाद किंवा दिवसाचं नियोजन अशा छोट्या गोष्टी सकाळची धावपळ कमी करण्यास मदत करू शकतात.
२. सौजी – स्वच्छतेला द्या महत्त्व
जपानी संस्कृतीत स्वच्छता ही केवळ घरकाम मानली जात नाही. घर आणि आजूबाजूचा परिसर स्वच्छ ठेवणं ही शिस्तीची सवय मानली जाते. दररोज काही मिनिटं वस्तू व्यवस्थित लावणे, अनावश्यक सामान बाजूला करणे आणि घर स्वच्छ ठेवणे यामुळे वातावरण अधिक नीटनेटके राहू शकते. स्वच्छ जागेमुळे मनालाही प्रसन्न वाटू शकतं.
३. युबुने नी त्सुकारु – आंघोळीचा वेळ स्वतःसाठी ठेवा
दिवसभराच्या धावपळीनंतर काही वेळ शांतपणे आराम करणं महत्त्वाचं आहे. जपानी संस्कृतीत कोमट पाण्यात काही वेळ आराम करण्याची पद्धत आहे. आंघोळ करताना काही मिनिटं मोबाईल आणि इतर गोष्टींपासून दूर राहून स्वतःसाठी वेळ देता येतो. यामुळे शरीराला आराम मिळण्यासोबत मनही शांत वाटू शकतं.
Japanese Lifestyle
४. इतादाकिमासु – अन्नाबद्दल कृतज्ञ राहा
जपानमध्ये जेवण सुरू करण्यापूर्वी ‘इतादाकिमासु’ म्हणण्याची परंपरा आहे. यामागे अन्न आणि ते तयार करण्यासाठी मेहनत घेणाऱ्या प्रत्येक व्यक्तीबद्दल कृतज्ञता व्यक्त करण्याची भावना आहे.आपणही जेवताना काही क्षण थांबून अन्नाबद्दल आभार मानण्याची सवय लावू शकतो. यामुळे अन्नाचं महत्त्व जाणवण्यास आणि अन्नाची नासाडी टाळण्यास मदत होऊ शकते.
५. कुत्सु ओ सोरोएरु – वस्तू योग्य जागी ठेवा
घरी आल्यानंतर बूट किंवा चप्पल अस्ताव्यस्त न ठेवता ठरलेल्या जागी व्यवस्थित ठेवण्याची जपानी पद्धत आहे. ही छोटी सवय घरात शिस्त आणि नीटनेटकेपणा ठेवण्यास मदत करते. दिवसभराच्या धावपळीनंतर घरात प्रवेश करताना वस्तू व्यवस्थित ठेवणं म्हणजे बाहेरील गोंधळातून शांत वातावरणात जाण्याचा एक छोटासा बदल ठरू शकतो.
६. मोत्ताइनाई – वस्तूंची किंमत ओळखा
‘मोत्ताइनाई’ ही जपानी संकल्पना अनावश्यक अपव्यय टाळण्यावर भर देते. एखादी वस्तू खराब झाली म्हणून लगेच फेकून देण्याऐवजी ती दुरुस्त करून वापरता येते का, याचा विचार करण्याची ही सवय आहे. कपडे, फर्निचर किंवा घरातील इतर वस्तूंचा योग्य वापर आणि पुनर्वापर केल्याने कचरा कमी करण्यास मदत होऊ शकते. त्याचबरोबर गरज आणि हौस यातील फरकही समजतो.
७. शुन – निसर्गाशी नातं जोडा
‘शुन’ या जपानी संकल्पनेत योग्य हंगामातील गोष्टींचा आनंद घेण्यावर भर दिला जातो. आपल्या जीवनातही मोसमी फळं-भाज्या खाणं, ऋतूंमध्ये होणारे बदल अनुभवणं आणि निसर्गाकडे लक्ष देणं याचा समावेश करता येतो. दिवसभराच्या धावपळीतून थोडा वेळ निसर्गासाठी काढल्याने मनाला विरंगुळा मिळू शकतो. छोट्या गोष्टींचा आनंद घेण्याची सवयही लागते.
छोट्या सवयी, मोठा बदल
या सातही पद्धतींचं वैशिष्ट्य म्हणजे त्यासाठी जीवनशैलीत मोठा बदल करण्याची गरज नाही. दिवसाची सुरुवात शांतपणे करणं, घर स्वच्छ ठेवणं, अन्नाची कदर करणं आणि निसर्गासाठी वेळ देणं अशा छोट्या सवयी दैनंदिन जीवन अधिक व्यवस्थित करण्यास मदत करू शकतात.
