Kajol: बॉलिवूडमधील दमदार अभिनेत्री काजोल आज, ५ ऑगस्ट रोजी आपला ५२ वा वाढदिवस साजरा करत आहे. अभिनय, सहज वावर आणि नैसर्गिक व्यक्तिमत्त्वामुळे काजोलने गेली साडेतीन दशके प्रेक्षकांच्या मनावर अधिराज्य गाजवले आहे. विशेष म्हणजे वाढदिवसाच्या काही दिवसांपूर्वीच तिने चित्रपटसृष्टीतील ३४ वर्षांचा प्रवास पूर्ण केला. १९९२ मध्ये प्रदर्शित झालेल्या ‘बेखुदी’ या चित्रपटातून तिने बॉलिवूडमध्ये पदार्पण केले आणि त्यानंतर अनेक सुपरहिट चित्रपट देत ती हिंदी चित्रपटसृष्टीतील आघाडीच्या अभिनेत्रींपैकी एक बनली.

काजोलचा जन्म ५ ऑगस्ट १९७४ रोजी मुंबई येथे झाला. ती प्रसिद्ध अभिनेत्री तनुजा आणि दिग्दर्शक-निर्माते शोमू मुखर्जी यांची मुलगी आहे. अभिनयाचा वारसा तिला घरातूनच मिळाला. तिची मावशी दिग्गज अभिनेत्री नूतन होत्या. आजी शोभना समर्थ, पणजी रत्तनबाई, काका जॉय मुखर्जी आणि देव मुखर्जी तसेच आजोबा शशधर मुखर्जी आणि नाना कुमारसेन समर्थ यांचाही चित्रपटसृष्टीशी जवळचा संबंध होता. अभिनेत्री राणी मुखर्जी, अभिनेता मोहनीश बहल आणि दिग्दर्शक अयान मुखर्जी हे तिचे चुलत भाऊ-बहिणी आहेत.

काजोलचे सासरही चित्रपटसृष्टीतीलच आहे. १९९९ मध्ये तिने अभिनेता अजय देवगणसोबत विवाह केला. अजयचे वडील वीरू देवगण हे प्रसिद्ध ॲक्शन दिग्दर्शक होते, तर आई वीणा देवगण या निर्मात्या होत्या. अजय आणि काजोल यांना न्यासा आणि युग ही दोन मुले आहेत.

विशेष म्हणजे काजोलने अभिनयाची सुरुवात शालेय जीवनातच केली. बेखुदी चित्रपट प्रदर्शित झाला तेव्हा ती अवघ्या १७ वर्षांची होती. पहिल्याच चित्रपटानंतर तिच्या अभिनयाची दखल घेतली गेली आणि पुढे तिची कारकीर्द वेगाने पुढे सरकली.

१९९७ मध्ये आलेल्या गुप्त या चित्रपटात काजोलने खलनायिकेची भूमिका साकारली. हा तिच्या कारकिर्दीतील सर्वात आव्हानात्मक अभिनय असल्याचे तिने अनेक मुलाखतींमध्ये सांगितले आहे. या भूमिकेसाठी तिला फिल्मफेअरचा सर्वोत्तम नकारात्मक भूमिकेचा पुरस्कार मिळाला. हा मान मिळवणारी ती पहिली महिला अभिनेत्री ठरली.

हिंदी चित्रपटांव्यतिरिक्त काजोलने तमिळ चित्रपटसृष्टीतही काम केले आहे. मिन्सारा कनवू या चित्रपटात ती प्रभुदेवा आणि अरविंद स्वामी यांच्यासोबत झळकली होती. प्रभुदेवासोबत नृत्य करणे खूप कठीण असल्याचे तिने नंतर सांगितले होते.

दिग्दर्शक करण जोहर आणि काजोल यांची मैत्री बॉलिवूडमध्ये खूप प्रसिद्ध आहे. करण जोहर काजोलला आपला ‘लकी चार्म’ मानतो. त्याच्या अनेक चित्रपटांमध्ये काजोल प्रमुख भूमिकेत किंवा छोट्या पाहुण्या भूमिकेत दिसते.

१९९५ हे वर्ष काजोलच्या कारकिर्दीतील सर्वात महत्त्वाचे ठरले. याच वर्षी ‘दिलवाले दुल्हनिया ले जायेंगे’ प्रदर्शित झाला. हा चित्रपट हिंदी चित्रपटसृष्टीतील सर्वाधिक लोकप्रिय आणि यशस्वी चित्रपटांपैकी एक ठरला. या चित्रपटासाठी काजोलला सर्वोत्तम अभिनेत्रीचा पहिला फिल्मफेअर पुरस्कार मिळाला. त्याच वर्षी करण अर्जुन हा चित्रपटही मोठा हिट ठरला.

शाहरुख खान आणि काजोल ही जोडी बॉलिवूडमधील सर्वात लोकप्रिय जोड्यांपैकी एक मानली जाते. बाजीगर, करण अर्जुन, दिलवाले दुल्हनिया ले जायेंगे, कुछ कुछ होता है आणि कभी खुशी कभी गम हे दोघांचे चित्रपट आजही प्रेक्षक आवडीने पाहतात.

काजोलची लोकप्रियता भारतापुरती मर्यादित नाही. सिंगापूरमधील मॅडम तुसाँ संग्रहालयात तिचा मेणाचा पुतळा उभारण्यात आला आहे. चित्रपटांबरोबरच तिने ओटीटी विश्वातही यश मिळवले. त्रिभंगा या चित्रपटातून तिने ओटीटीवर पदार्पण केले. त्यानंतर लस्ट स्टोरीज २, द ट्रायल, दो पत्ती आणि सरजमीं यांसारख्या प्रकल्पांमधून तिने आपल्या अभिनयाची वेगळी छाप सोडली.