सांगलीः येथील म्हैसाळमध्ये कर्नाटक राज्य परिवहन महामंडळाची बस व ट्रक्टरचा अपघात झाल्याची घटना आज सकाळी साडेदहा वाजण्याच्या सुमारास घडली आहे. हा अपघात बसवरील चालकाचा ताबा सुटल्याने घडला असून बस थेट ३० फूट उंचीवरून दरीत कोसळली. या अपघातामध्ये कोणतीही जीवितहानी झालेली नाही. बसमधील २० प्रवासी अपघातामध्ये जखमी झाले असून जखमींना मिरज येथील सिव्हिल हॅास्पिटलमध्ये दाखल करण्यात आले आहे.

नेमका अपघात कसा घडला?

सकाळी दहा वाजण्याच्या सुमारास कर्नाटक महामंडळाची बस मैसाळहून कर्नाटकच्या दिशेने मार्गस्थ झाली. यावेळी कागवाडहून म्हैसाळच्या दिशेने ऊस वाहतूक करणारा मोकळा ट्रक्टर दोन ट्रेलरसह म्हैसाळच्या दिशेने येत होता. कर्नाटक बसने ट्रक्टरच्या मागे असणाऱ्या ट्रेलरला धडक दिली. त्यानंतर बसवरील चालकाचे नियंत्रण सुटले आणि बस थेट दरीत कोसळली. अपघातानंतर म्हैसाळ येथील तरूणांनी बसमधील प्रवाशांना सुखरूप बाहेर काढले.

मिळालेल्या माहितीनुसार, या बसमधून जवळपास ४० प्रवासी हे प्रवास करत होते. या अपघातामध्ये २० प्रवासी जखमी झाले असून पैकी २ जणांना खाजगी तर १८ प्रवाशांना मिरजच्या शासकीय रुग्णालयात उपचारांसाठी दाखल करण्यात आले आहे. या अपघातामध्ये बस चालवणाऱ्या चालकाचा उजया पाय मोडला आहे. शर्थीचे प्रयत्न करून त्याला बाहेर काढण्यात आले आहे. घटनेची माहिती मिळताच मिरज ग्रामीण पोलीस स्टेशनचे पोलीस अधिकारी, वाहतूक शाखेचे पोलीस कर्मचारी तात्काळ घटनास्थळी पोहचले आहेत.