PAN-Aadhaar Link: तुमचे पॅन कार्ड (PAN) आधार कार्डशी (Aadhaar) लिंक करण्याची अंतिम मुदत अत्यंत जवळ आली आहे. जर तुम्ही अद्याप ही प्रक्रिया पूर्ण केली नसेल, तर १ जानेवारी २०२६ पासून तुमचे पॅन कार्ड ‘इनऑपरेटिव्ह’ म्हणजेच निकामी होऊ शकते. ज्या नागरिकांचे आधार कार्ड १ ऑक्टोबर २०२४ पूर्वी जारी झाले आहे, त्यांना ३१ डिसेंबर २०२५ पर्यंत ही प्रक्रिया पूर्ण करणे अनिवार्य आहे. लिंकिंग न केल्यास ‘या’ आर्थिक अडचणींना सामोरे जावे लागणार – पॅन कार्ड आधारशी लिंक नसल्यास सामान्य करदात्यांना दैनंदिन व्यवहारात मोठ्या अडचणी येऊ शकतात. तुम्ही इनकम टॅक्स रिटर्न फाइल करू शकणार नाही. बँक खाते आणि मोठ्या रकमेच्या व्यवहारांवर मर्यादा येऊ शकतात. म्युच्युअल फंड, शेअर्स, बाँड्स आणि विमा क्षेत्रातील गुंतवणूक रखडू शकते. वैयक्तिक कर्ज किंवा गृहकर्ज मिळणे कठीण होईल. पॅन निकामी झाल्यास टीडीएस (TDS) अधिक दराने कापला जाईल. विलंब झाल्यास १००० रुपये दंड – ठरवून दिलेल्या मुदतीपर्यंत लिंकिंग न केल्यास, पॅन कार्ड पुन्हा सक्रिय करण्यासाठी नागरिकांना १,००० रुपये दंड भरावा लागेल. इनकम टॅक्सच्या ‘e-Pay Tax’ सुविधेद्वारे हा दंड भरल्यानंतरच लिंकिंगची प्रक्रिया पूर्ण होईल. माहितीमध्ये तफावत असल्यास काय करावे? अनेकदा नाव, जन्मतारीख किंवा मोबाईल नंबर जुळत नसल्यामुळे लिंकिंगमध्ये अडथळे येतात. अशा वेळी Protean किंवा UTIITSL च्या वेबसाइटवर जाऊन माहिती अपडेट करा.UIDAI च्या पोर्टलवर जाऊन किंवा मदत केंद्रावर ईमेल करून माहिती दुरुस्त करा. ऑनलाइन प्रक्रिया अयशस्वी झाल्यास, अधिकृत पॅन सेवा केंद्रावर जाऊन १००० रुपये फी आणि कागदपत्रांसह बायोमॅट्रिक ऑथेंटिकेशनद्वारे लिंकिंग करता येईल. असे करा ऑनलाइन लिंकिंग: -आयकर विभागाच्या (Income Tax e-Filing Portal) अधिकृत पोर्टलवर जा. -‘Link Aadhaar’ या पर्यायावर क्लिक करा. -तुमचा पॅन आणि आधार क्रमांक प्रविष्ट करा. -आधारशी लिंक असलेल्या मोबाईलवर आलेला OTP टाकून पडताळणी करा. -मुदत संपली असल्यास, प्रथम ई-पे टॅक्सद्वारे १००० रुपये भरा आणि नंतर विनंती सबमिट करा. स्टेटस कसे तपासावे? तुमचे पॅन आधारशी लिंक आहे की नाही, हे तपासण्यासाठी आयकर पोर्टलवर जाऊन ‘Link Aadhaar Status’ या पर्यायावर क्लिक करा. तिथे पॅन आणि आधार क्रमांक टाकल्यास तुमची लिंकिंग स्थिती त्वरित समजेल.
