नवी दिल्ली – हिंदी सिनेसृष्टीत आपला वेगळा ठसा उमटवणारे अभिनेते नाना पाटेकर यांच्या चाहत्यांसाठी एक आनंदाची बातमी आहे. 2018 साली MeToo चळवळीदरम्यान झालेल्या आरोपांनंतर नाना पाटेकर लवकरच मोठ्या पडद्यावर पुनरागमन करणार आहेत. ‘द कन्फेशन’ या सोशल थ्रिलर चित्रपटात ते मुख्य भूमिकेत दिसणार आहेत. या चित्रपटाचे मोशन पोस्टर रिलीज करण्यात आले आहे.

ट्विटरवर ट्रेड अॅनालिस्ट तरण आदर्श यांनी मोशन पोस्टर रिलीज करून बऱ्याच वर्षांनंतर नाना पाटेकर मोठ्या पडद्यावर परतल्याची घोषणा केली आहे. त्यांनी शेअर केलेल्या मोशन पोस्टरमध्ये नाना पाटेकर यांचा दमदार आवाज ऐकू येत आहे. नाना म्हणतात की, मी सत्याचा चेहरा पाहिला आहे, मी सत्याचा आवाज देखील ऐकला आहे, सत्य माहित असूनही मी ते स्वीकारत नाही, जीव गेला तरी कबूल आहे मला. ऑडिओ संपताच नाना पाटेकर यांचा चेहराही दिसतो.

अनंत नारायण महादेवन या चित्रपटाचे दिग्दर्शन करणार आहेत. त्याचवेळी नरेंद्र हिरावत, प्रवीण शाह, सगुन बाग, अजय कपूर आणि सुभाष काळे ‘द कन्फेशन’ची निर्मिती करणार आहेत. चित्रपटाच्या प्रदर्शनाच्या तारखेबाबत अद्याप कोणतीही माहिती देण्यात आलेली नाही. या चित्रपटाद्वारे नाना पाटेकर अनेक वर्षांनी पुनरागमन करत आहेत. चाहत्यांना मोठा आनंद झाला आहे.

नाना पाटेकर याआधी शेवटचे 2018 मध्ये रजनीकांत यांच्या ‘काला’ चित्रपटात दिसले होते. या चित्रपटात त्यांनी खलनायकाची भूमिका साकारली होती. त्यांनी 2019 मध्ये ‘हाऊसफुल 4’ चे शूटिंग देखील सुरू केले होते, परंतु अभिनेत्री तनुश्री दत्ताने MeToo चळवळ अंतर्गत लैंगिक शोषणाचा आरोप केल्यानंतर चित्रपट सोडला. आता ते लवकरच ‘द कन्फेशन’मध्ये दिसणार आहे.