नगर  – शंभरावे अखिल भारतीय मराठी नाट्य संमेलन 1 ते 3 मे रोजी नगरला होणार आहे. त्याची माहिती देण्यासाठी अभिनेते शरद पोंक्षे व नाट्य परिषदेचे मध्यवर्ती शाखेचे अध्यक्ष प्रसाद कांबळी हे नगरला आले होते. मात्र, अभिनेते शरद पोंक्षे यांच्या गाडीची काच अज्ञातांनी फोडल्याचं समोर आले आहे. मात्र, चोरीच्या उद्देशाने कुणीतरी हा प्रकार केला असल्याचे सीसीटीव्ही फूटेजच्या तपासणीतून स्पष्ट झालं आहे. गाडीतून काहीही चोरीला गेलं नसल्याची माहिती पोलिसांनी दिली आहे.

नगर-मनमाड महामार्गावर एका हॉटेलमध्ये त्यांची पत्रकार परिषद होती. पत्रकार परिषद झाल्यानंतर निघण्यासाठी ते गाडीजवळ गेले असता काच फुटल्याचं उघडकीस आले. पोंक्षे यांच्या मध्यंतरीच्या काही वक्तव्यांचा निषेध म्हणून काच फोडल्याची चर्चा सुरू झाली होती.

या प्रकारानंतर तोफखाना पोलीस ठाण्याचे पोलीस अधिकारी व कर्मचारी हे घटनास्थळी आले होते. त्यांनी हॉटेलच्या सीसीटीव्ही कॅमेऱ्याचे फूटेज तपासले. त्यात तिघे व्यक्ती कारजवळ आल्याचे दिसत आहे. त्यातील एकाने ड्रायव्हरच्या बाजूची काच फोडली. त्यावेळी इतर दोघे टेहळणी करत होते. त्यानंतर तिघेही निघून गेले. चोरीच्या उद्देशाने त्यांनी ही काच फोडल्याचे तपासात उघडकीस आले.

त्याचवेळी अर्धा किलोमीटरच्या अंतरावर एका कार्यालयात आलेल्या महिलेच्या कारमधील पर्सही चोरीला गेल्याचं निदर्शनास आले. दोन्ही ठिकाणचे सीसीटीव्ही फूटेज पाहून पोंक्षे यांची गाडीची काच चोरट्यांनी फोडल्याचे पोलिसांनी सांगितले.