ठाणे : ठाणे महापालिकेच्या निवडणुकीचा बिगुल वाजल्यापासूनच शिंदेसेनेतील वरिष्ठ नेत्यांच्या घराणेशाहीवर विरोधाची लाट उभी राहिली आहे. खासदार नरेश म्हस्के यांच्या मुलाला उमेदवारी देण्याच्या निर्णयावर कार्यकर्त्यांकडून विरोध सुरू झाला असून शिंदेसेनेचे काही कार्यकर्ते प्रमोद गोगावले यांना उमेदवारी द्यावी, अशी मागणी करताना दिसले. प्रमोद हे भरत गोगावले यांचे समर्थक असून, काही दिवसांपूर्वी माजी नगरसेवक संजय भोईर यांच्या भावाच्या उमेदवारीवरही अशाच प्रकारचा विरोध नोंदला गेला होता. या घटनांमुळे शिंदेसेनेतील गटबाजी सार्वजनिकपणे स्पष्ट होत असल्याचे दिसून येत आहे. शिवसेना एकसंध असताना नरेश म्हस्के कोपरी येथील आनंदनगर भागातून नगरसेवक म्हणून निवडून आले होते आणि त्यांनी ठाण्याचे महापौरपदही भूषवले होते. उपमुख्यमंत्री एकनाथ शिंदे यांनी उद्धव ठाकरे यांची साथ सोडल्यावर, नरेश म्हस्के यांनी शिंदे यांच्यासोबत राहणे पसंत केले. नुकत्याच झालेल्या लोकसभा निवडणुकीत त्यांनी ठाकरेसेनेचे नेते राजन विचारे यांचा पराभव करत मोठा राजकीय प्रभाव दाखवला. नरेश म्हस्के खासदार झाल्यामुळे त्यांच्या प्रभागातील नगरसेवकाची जागा रिक्त राहिली आहे.
