Thane News: मध्यपूर्वेतील भू-राजकीय तणावामुळे इंधन टंचाईची शक्यता वर्तवली जात असताना महाराष्ट्रात LPG साठेबाजी व काळाबाजाराविरुद्ध कारवाईचा धडाका सुरू आहे. याच मोहिमेअंतर्गत रेशनिंग विभागाच्या फ्लाइंग स्क्वॉडने भिवंडी तालुक्यातील वलपाडा परिसरात छापा टाकून ८४ LPG सिलिंडर जप्त केले असून दोन टेम्पो चालकांना ताब्यात घेत अत्यावश्यक वस्तू कायद्यांतर्गत गुन्हा दाखल करण्यात आला आहे. खबरीच्या माहितीवरून छापा – ठाणे ‘F’ विभागाचे उपनियंत्रक प्रशांत काळे यांच्या देखरेखीखाली ही कारवाई करण्यात आली. फ्लाइंग स्क्वॉडला भिवंडी तालुक्यातील वलपाडा भागातील वर्धमान कंपाउंडमधील एका गोदामात LPG सिलिंडरचा अनधिकृत साठा असल्याची विशिष्ट माहिती मिळाली. त्यानुसार पथकाने सापळा रचून अचानक तपासणी केली असता तीन टेम्पोंमध्ये ८४ सिलिंडर आढळून आले. हे सिलिंडर योग्य परवानगीशिवाय साठवले व वाहतूक केली जात असल्याचे उघड झाले. अनेक कंपन्यांचे सिलिंडर जप्त – जप्त केलेल्या सिलिंडरमध्ये भारत गॅस, हिंदुस्तान पेट्रोलियम, गो गॅस व गॅस वन या विविध कंपन्यांचा समावेश होता. ४ किलो, १२ किलो, १७ किलो व १९ किलो क्षमतेचे घरगुती व व्यावसायिक असे वेगवेगळ्या प्रकारचे सिलिंडर यात होते. तपासणीत ३३ सिलिंडर भरलेले तर ५१ रिकामे असल्याचे आढळले. गॅस पुरवठ्याबाबतच्या अनिश्चिततेचा फायदा घेऊन काळाबाजारासाठी हे सिलिंडर जमा केले जात असल्याचा अधिकाऱ्यांचा संशय आहे. हेही वाचा – दोन भारतीय LPG जहाजांनी पार केली होर्मुझ सामुद्रधुनी; 92,700 टन गॅस घेऊन गुजरातच्या बंदरांकडे रवाना दोन चालक ताब्यात – फ्लाइंग स्क्वॉड निरीक्षक भगवान खंदेराव, भिवंडी रेशनिंग अधिकारी रत्नदीप सावंत, गणेश हराणे व मनीष शास्त्री यांनी ही कारवाई केली. घटनास्थळी असलेल्या दोन टेम्पो चालकांना चौकशीसाठी ताब्यात घेण्यात आले असून नरपोली पोलीस स्टेशनमध्ये अत्यावश्यक वस्तू कायद्यांतर्गत त्यांच्याविरुद्ध गुन्हा दाखल करण्यात येत आहे. LPG सिलिंडरची साठेबाजी, अवैध साठवणूक व काळाबाजार करणाऱ्यांविरुद्ध कठोर कारवाई सुरूच राहील, असा इशारा अधिकाऱ्यांनी दिला आहे.
