शिवसेनेची भाईगिरी! बंदला प्रतिसाद मिळत नसल्याने रिक्षाचालकांना मारहाण
ठाणे – राज्यात लखीमपूर घटनेच्या निषेधार्थ आज महाराष्ट्र बंद पुकारला आहे. या बंदमध्ये रिक्षा चालवत असल्याच्या कारणावरुन स्टेशन परिसरात शिवसैनिकांनी रिक्षाचालकांना दांडक्याने मारहाण केल्याची घटना समोर आली आहे. दरम्यान या मारहाणीचा व्हिडिओ सुद्धा समोर आला आहे.
महाविकास आघाडी सरकारकडून राज्यात आज महाराष्ट्र बंदचे आवाहन करण्यात आले आहे. महाराष्ट्र बंदला समिश्र प्रतिसाद मिळत असल्याचे चित्र आहे. या बंदला राज्यातील अनेक ठिकाणी गालबोट लागले आहे. असाच एक प्रकार ठाण्यातून समोर आला आहे. येथील स्टेशन परिसरात रिक्षा चालकांना मारहाण करण्यात आली आहे. या घटनेचा व्हिडीओ देखील व्हायरल होतो आहे.
ठाण्यातील बंदला प्रतिसाद मिळत नसल्याने शिवसैनिकांनी रिक्षाचालकांना मारहाण करून बंद करण्याचा प्रयत्न केला. ठाण्याचे शिवसेनेचे महत्वाचे पदाधिकारी देखील या मारहाणीत सहभागी असल्याचे पाहायला मिळाले.
केवळ रिक्षाच सुरु असल्याने बंद पूर्णपणे यशस्वी कारण्यासाठी शिवसैनिकही यावेळी आक्रमक झाले. जांभळी नाका परिसरात रिक्षाचालकांना मारहाण करण्याचा हा प्रकार घडला आहे.
