Mumbai Morcha : निवडणूक आयोगाच्या कारभाराविरोधात आणि मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी ठाकरे बंधू आज रस्त्यावर उतरणार आहेत. आज मुंबईत ठाकरे बंधुंचा मोर्चा निघणार आहे. गर्जना लोकशाही आणि संविधान वाचवण्यासाठी असं या मोर्चाला नाव देण्यात आलं आहे.

मनसेप्रमुख राज ठाकरे आणि शिवसेना ठाकरे गटाचे प्रमुख उद्धव ठाकरे यांनी सर्व विरोधी पक्षातील नेत्यांना, पदाधिकाऱ्यांना या मोर्चात सहभागी होण्याचं आवाहन केलं आहे. या मोर्चामध्ये कुठल्याही पक्षाचा झेंडा न घेता तिरंगा हातात घेऊन मोर्चामध्ये सहभागी व्हावं असं आवाहन ठाकरे बंधूंकडून करण्यात आलं आहे.

मेट्रो सिनेमा ते महापालिका असा या मोर्चाचा मार्ग असून, सकाळी १० वाजता या मोर्चाला सुरूवात होणार आहे. या मोर्चाचा ठरवण्यात आलेला आधीचा मार्ग बदलून हा मोर्चा मेट्रो सिनेमा इथून निघणार असून, मुंबई महानगर पालिका मुख्यालयापर्यंत जाणार आहे. त्याठिकाणी सांगता सभा देखील होणार आहे. या मोर्चानंतर प्रमुख नेते मोर्चाला संबोधित करणार आहेत.

काँग्रेस आणि शरद पवारांच्या राष्ट्रवादीने पाठिंबा दर्शवला

ठाकरें बंधूंच्या आंदोलनाला राज्यातील सर्व डाव्या पक्षांनी, काँग्रेस आणि शरद पवारांच्या राष्ट्रवादीने पाठिंबा दर्शवला आहे. या मोर्चानिमित्त ठाकरे बंधू पुन्हा एकत्रित आले आहेत.

खास टी-शर्टची चर्चा 

विशेष म्हणजे या मोर्चासाठी ‘ठाकरेंचा मोर्चा देशभर चर्चा’, असे लिहिलेले टी-शर्ट घालून शिवसेना आणि मनसे पदाधिकारी आणि कार्यकर्ते मोर्चात सहभागी होणार आहेत. टी-शर्टवरच्या व्यंगचित्रात उद्धव ठाकरे आणि राज ठाकरे यांचेही चित्र आहे.

दरम्यान, विरोधकांनी निवडणूक आयोगाच्या कार्यपद्धतीवर प्रश्नचिन्ह उपस्थित केलं असून मुख्य निवडणूक आयुक्त ज्ञानेश कुमार यांच्या राजीनाम्याची मागणी लावून धरली आहे. कॉक्रोच जनता पार्टीनं महात्मा गांधी जयंतीला मुंबईतील शिवाजी पार्क मैदानावर केलेल्या आंदोलनानंतर आता आज रविवारी (4 ऑक्टोबर) ठाकरे बंधूंचा मोर्चा होणार आहे. त्यामुळे या मोर्चादरम्यान ठाकरे बंधु काय बोलणार याकडे सर्वांचे लक्ष  लागले आहे.

हेही वाचा: 

MLC Election Pune: महायुतीत भाजपचीच सरशी! पुणे शिक्षक अन् पदवीधर संघ भाजपच्याच वाट्याला; शिवसेनेला मोठा धक्का