Solapur-Hyderabad highway tyre burst accident full report : सोलापूर-हैद्राबाद राष्ट्रीय महामार्गावर अणदुर गावाजवळ शनिवारी सकाळी देवदर्शनाला जात असलेल्या भाविकांच्या क्रुझर गाडीचा भीषण अपघात झाला. गाडीचा पुढचा टायर अचानक फुटल्याने चालकाचे नियंत्रण सुटले आणि क्रुझर रस्त्यावर पलटी झाली. यावेळी समोरून येणाऱ्या ट्रॅक्टरला जोरदार धडक बसल्याने अपघाताची तीव्रता वाढली. या दुर्दैवी अपघातात पाच भाविकांचा जागीच मृत्यू झाला, यात तीन महिलांचा समावेश आहे. तर सात ते आठ जण गंभीर जखमी झाले असून त्यांना तात्काळ सोलापूर येथील शासकीय रुग्णालयात दाखल करण्यात आले आहे. अपघातग्रस्त सर्व प्रवासी हे सोलापूर जिल्ह्यातील दक्षिण सोलापूर तालुक्यातील उक्कड गावातील (उळे) रहिवासी असल्याची प्राथमिक माहिती समोर आली आहे. हे सर्वजण नळदुर्ग येथील देवदर्शनासाठी जात होते. अपघातानंतर महामार्गावर काही काळ मोठी वाहतूक कोंडी झाली. स्थानिक नागरिकांनी त्वरित मदतकार्याला सुरुवात केली तर पोलिसांनी घटनास्थळी धाव घेऊन बचावकार्य केले. मृतदेह शवचिकित्सेसाठी रुग्णालयात पाठवण्यात आले असून ओळख पटवण्याचे काम सुरू आहे. पोलिस अधिक तपास करीत आहेत.
