नसरापूर :  शेततळ्यात पोहण्यासाठी गेलेल्या दहा वर्षीय मुलीचा पाण्यात बुडून मृत्यू झाल्याची दुर्दैवी घटना मंगळवारी (दि. ६) दुपारी आर्वी परिसरात घडली. खुशबु बसंत बसदेवा (वय १०, रा. आर्वी, ता. हवेली, जि. पुणे) असे मृत मुलीचे नाव आहे.

पोलिसांनी दिलेल्या माहितीनुसार, खुशबु ही अन्य मुलांसोबत पोहण्यासाठी संजय हरिभाऊ घोगरे यांच्या शेततळ्यात गेली होती. दुपारी सुमारे ३ वाजण्याच्या सुमारास ही घटना घडल्याची माहिती पोलिसांकडे नोंदविण्यात आली आहे.

खुशबुचे वडील वसंत बसदेवा हे मजुरीचे काम करतात. घटनेच्या वेळी ते शिवापूर येथे विटांच्या बांधकामाच्या कामासाठी गेले होते. दुपारी साडेतीनच्या सुमारास आर्वीचे पोलीस पाटील संदीप मास्ती घोगरे यांनी कामाच्या ठिकाणी जाऊन त्यांना मुलगी शेततळ्यात बुडाल्याची माहिती दिली.

माहिती मिळताच वसंत बसदेवा घटनास्थळी रवाना झाले. दरम्यान, स्थानिक नागरिक आणि पोलिसांकडून शेततळ्यात मुलीचा शोध घेण्यात आला. त्यानंतर खुशबुला पाण्याबाहेर काढण्यात आले.

खुशबुला तातडीने रुग्णवाहिकेतून ब्लॉक हॉस्पिटल, श्रीरामनगर-बांडेवाडी, ता. हवेली, जि. पुणे येथे नेण्यात आले. तेथील वैद्यकीय अधिकाऱ्यांनी तपासणी केल्यानंतर तिचा मृत्यू झाल्याचे घोषित केले.

या घटनेची नोंद राजगड पोलीस ठाण्यात अकस्मात मृत्यू रजिस्टर क्रमांक ९२/२०२६, भारतीय नागरिक सुरक्षा संहिता (BNSS) कलम १९४ अन्वये करण्यात आली आहे. घटनेची नोंद ६ ऑक्टोबर रोजी सायंकाळी ६.०५ वाजता स्टेशन डायरी क्रमांक ३२/२०२६ अन्वये करण्यात आली.

या प्रकरणाचा पुढील तपास सहाय्यक पोलीस उपनिरीक्षक काळे करीत असून, प्रभारी अधिकारी पोलीस निरीक्षक जाधव यांच्या मार्गदर्शनाखाली तपास सुरू आहे. घटनेची नेमकी परिस्थिती आणि इतर बाबींचा तपास करण्यात येत आहे.

शेततळ्यांबाबत सुरक्षिततेचा प्रश्न पुन्हा ऐरणीवर

ग्रामीण भागात शेतीसाठी तयार करण्यात आलेल्या शेततळ्यांमध्ये पाणी साचलेले असते. अशा ठिकाणी लहान मुले पोहण्यासाठी किंवा खेळण्यासाठी जाऊ नयेत, यासाठी पालकांनी विशेष काळजी घेण्याची गरज आहे. शेततळ्यांच्या परिसरात सुरक्षेच्या दृष्टीने आवश्यक उपाययोजना करण्याचीही गरज या घटनेमुळे अधोरेखित झाली आहे.