Shantanu Moghe: अभिनेत्री प्रिया मराठे यांच्या निधनाला एक वर्ष पूर्ण झालं आहे. 31 ऑगस्ट 2025 रोजी कर्करोगाशी झुंज देताना प्रियाने अखेरचा श्वास घेतला. तिच्या निधनाने मराठी मनोरंजन विश्वासह तिच्या चाहत्यांना मोठा धक्का बसला. या कठीण काळात तिचे पती आणि अभिनेते शंतनू मोघे यांनी प्रियाला खंबीरपणे साथ दिली होती. प्रियाच्या जाण्यानंतर तिच्या आठवणी आजही शंतनू आणि तिच्या जवळच्या व्यक्तींसोबत आहेत.

नुकत्याच दिलेल्या एका मुलाखतीत शंतनू मोघे यांनी प्रियासोबतच्या अनेक आठवणींना उजाळा दिला. यावेळी त्यांनी वडील आणि ज्येष्ठ अभिनेते श्रीकांत मोघे यांच्यासोबतचं नातं, प्रियासोबतची पहिली भेट आणि लग्नाआधीच्या त्यांच्या नात्याबद्दलही सांगितलं.

प्रियाबद्दल वडिलांना कसं कळलं?

शंतनू यांनी सांगितलं की, त्यांच्या वडिलांना त्यांच्या मित्र-मैत्रिणी आणि नाटकांच्या प्रयोगांबद्दल बरीच माहिती असायची. मात्र, प्रिया आणि शंतनू यांचं लग्न ठरण्याआधी त्यांनी ही गोष्ट घरात सांगितली नव्हती. याच काळात शंतनू पुण्यात गेले होते. त्यावेळी श्रीकांत मोघे यांनी त्यांना फोन करून अचानक ‘अभिनंदन’ म्हटलं. शंतनू यांना नेमकं कशासाठी अभिनंदन करत आहेत, हे समजलं नाही. त्यानंतर त्यांच्या वडिलांनी थेट विचारलं, ‘प्रिया मराठे ना…?’

आपल्याला धक्का बसला होता, असं शंतनू यांनी सांगितलं. पुण्यात असूनही वडिलांना प्रियाबद्दल कसं कळलं, याचं त्यांना आश्चर्य वाटलं. मात्र, वडिलांनी कधीही त्यांच्यावर कोणताही दबाव टाकला नाही. उलट ते कायम आपल्या पाठीशी उभे राहिले, असं शंतनू यांनी सांगितलं.

‘बाबांनी आयुष्य कसं जगायचं ते शिकवलं’

शंतनू यांनी आपल्या वडिलांबद्दल बोलताना त्यांच्या शिकवणीचाही उल्लेख केला. आज आपण ज्या ताकदीने उभे आहोत, त्यामागे वडिलांची शिकवण आहे, असं त्यांनी सांगितलं. आयुष्य कसं जगायचं, हे श्रीकांत मोघे यांनी शिकवलं. आईचाही तितकाच पाठिंबा मिळाला, अशी आठवण त्यांनी सांगितली. ‘हे एकच आयुष्य देवाने दिलं आहे आणि ते जगताना आपण काहीतरी करून दाखवलं पाहिजे’, हा विचारही त्यांनी यावेळी व्यक्त केला.

अशी झाली प्रिया आणि शंतनूंची पहिली भेट

प्रियासोबतच्या पहिल्या भेटीची आठवण सांगताना शंतनू भावूक झाले. त्या काळात प्रिया हिंदीतील ‘कॉमेडी सर्कस’मध्ये काम करत होती. शंतनू यांनी तिला शोमध्ये पाहिलं आणि तिचं काम त्यांना आवडलं. प्रियाचा फोन नंबर मिळवण्यासाठी त्यांनी अभिनेत्री शर्वरी लोहकरे यांच्याशी संपर्क साधला. नंबर मिळाल्यानंतर त्यांनी प्रियाला फोन केला. ‘आपण दोन मिनिटं बोलू शकतो का?’ असं त्यांनी विचारलं. त्यावेळी प्रिया गाडी चालवत असल्याने तिने बोलता येणार नसल्याचं सांगितलं.

यानंतर शंतनू यांनी तिला गाडी बाजूला घेऊन दोन मिनिटं बोलण्याची विनंती केली. गाडी बाजूला घेतल्यानंतर त्यांनी प्रियाचं ‘कॉमेडी सर्कस’मधील काम आवडल्याचं सांगितलं आणि तिला शुभेच्छा दिल्या. यानंतर दोघांची भेट शर्वरी लोहकरे यांच्या घरी झाली. तिथे झालेल्या गप्पांमधून त्यांच्यातील ओळख वाढत गेली.

‘प्रियासारखी कोणीच नाही’

शंतनू यांच्या मते, लग्नाआधी त्यांनी आणि प्रियाने एकमेकांसोबत घालवलेला वेळ खूप खास होता. त्यांच्या नात्यात पैसा, यश, प्रसिद्धी किंवा दिसणं यापेक्षा विचार आणि मनांचं नातं महत्त्वाचं होतं. दोघांचे विचार आणि मनं जुळली आणि त्यांच्यातील बॉण्डिंग वाढत गेली. याच नात्याचं पुढे लग्नात रूपांतर झालं. प्रियाच्या व्यक्तिमत्त्वाबद्दल बोलताना शंतनू यांनी, ‘प्रियासारखी कोणीच नाही’, अशा भावना व्यक्त केल्या.

प्रियाच्या निधनाला एक वर्ष पूर्ण झाल्यानंतरही तिच्या आठवणी शंतनू यांच्या मनात तितक्याच जिवंत आहेत. त्यांच्या या आठवणींमधून दोघांच्या नात्यातील प्रेम, मैत्री आणि एकमेकांवरील विश्वासाची झलक पाहायला मिळते.