मुंबई : आगामी मुंबई महापालिका निवडणुकीसाठी सगळ्या राजकीय पक्षांनी पक्ष बांधणीला सुरुवात केली आहे. आपल्या राजकीय वाटचालीसाठी आणि पक्षाच्या अस्तित्वासाठी उद्धव ठाकरे यांच्यासाठी मुंबई महापालिकेची निवडणूक खूप महत्वाची मानली जात आहे. उद्धव ठाकरे यांनी आपल्या निवडणुकीच्या रणनीतीला सुरुवात केली असून शिलेदारांना वेगवेगळ्या जबाबदाऱ्या सोपवल्या आहेत. यादरम्यान पक्षात नाराज असल्याच्या कारणाने माजी नगरसेविका तेजस्वी घोसाळकर यांच्यावर उद्धव ठाकरे यांनी विश्वास दाखवत एक मोठी जबाबदारी सोपवली आहे. तेजस्वी घोसाळकरांनी काही महिन्यांपूर्वीच दिला राजीनामा तेजस्वी घोसाळकर यांनी काही महिन्यापूर्वीच पक्षातील सर्व पदांचा राजीनामा दिला होता. पक्षातील अंतर्गत वादामुळे त्या नाराज असल्याच्या चर्चा सुरू होत्या. त्यानंतर तेजस्वी या शिंदे गट अथवा भाजपात प्रवेश करणार असल्याचे म्हटले जात होते. मात्र, आपण पक्ष सोडल्याचे त्यांनी जाहीर केले होते. तर, दुसरीकडे माझ्या सूनेवर आणि माझ्यावर शिवसेना ठाकरे गट सोडून जाण्यासाठी दबाव टाकला जात असल्याचा आरोप ठाकरे गटाचे उपनेते विनोद घोसाळकर यांनी म्हटले होते. त्यामुळे राजकीय वातावरण आणखीच गरम झाले होते. यादरम्यान भाजपने मोठी खेळी खेळत भाजपचे वर्चस्व असलेल्या मुंबै बँकेच्या संचालकपदी तेजस्वी घोसाळकर यांची नियुक्ती केली. यामुळे राजकीय वर्तुळात चर्चाना अजून उधाण आले. मात्र २ दिवसांपूर्वी तेजस्वी घोसाळकर यांनी ‘मातोश्री’वर जाऊन पक्षप्रमुख उद्धव ठाकरे यांची भेट घेतली, आणि आपण पक्षातच कार्यरत राहणार असल्याचं स्पष्ट केलं. यानंतर त्यांच्यावर उद्धव ठाकरे यांच्याकडून मोठी जबाबदारी सोपवण्यात आली. काय दिली जबाबदारी? माजी नगरसेविका तेजस्वी घोसाळकर यांची दहिसर विधानसभा प्रमुखपदी नियुक्ती करण्यात आली आहे. दहिसर विधानसभा हा ठाकरे गटासाठी महत्त्वाचा मतदारसंघ मानला जातो. या ठिकाणी मराठी मतदार चांगल्या संख्येने आहे. त्याशिवाय, शिवसेनेला मानणारा मोठा मतदार वर्ग या ठिकाणी आहे. तेजस्वी घोसाळकर यांचा स्थानिक पातळीवरील कामाचा अनुभव चांगला असल्याने दहिसरमध्ये पक्षाला याचा फायदा होईल असे म्हंटले जात आहे.
