Team India : आयर्लंड आणि इंग्लंडविरुद्धच्या आगामी टी-२० मालिकेसाठी (Team India) काही दिवसांपूर्वीच भारतीय संघाची घोषणा करण्यात आली होती. मात्र, ही मालिका सुरू होण्यापूर्वीच भारतीय संघात आणखी एक मोठा बदल करण्यात आला आहे.

संघातील अनुभवी आणि प्रमुख वेगवान गोलंदाज मोहम्मद सिराजला (Mohammed Siraj) या मालिकेतून विश्रांती देण्याचा निर्णय बीसीसीआयने (Team India) घेतला असून, त्याच्या जागी युवा वेगवान गोलंदाज प्रसिध कृष्णाला (Prasidh Krishna) मुख्य संघात स्थान देण्यात आले आहे.

वर्कलोड मॅनेजमेंटमुळे निर्णय

अफगाणिस्तानविरुद्धच्या नुकत्याच झालेल्या एकमेव कसोटी सामन्यात भारतीय संघाने १ डाव आणि ३०० धावांनी ऐतिहासिक विजय मिळवला. या कसोटी संघात मोहम्मद सिराज आणि प्रसिध कृष्णा हे दोन्ही गोलंदाज सामील होते.

मात्र, आगामी काळातील भारतीय (Team India) संघाचे व्यस्त वेळापत्रक आणि खेळाडूंची शारीरिक क्षमता लक्षात घेता, बीसीसीआयच्या मेडिकल टीम आणि संघ व्यवस्थापनाने चर्चा करून सिराजला विश्रांती देण्याचा सल्ला दिला. हा निर्णय पूर्णपणे ‘वर्कलोड मॅनेजमेंट’ अंतर्गत घेण्यात आला असून, सिराजला पुढील महत्त्वाच्या सामन्यांसाठी पूर्णपणे फिट ठेवणे हा यामागचा मुख्य उद्देश आहे.

श्रेयस अय्यरकडे कर्णधारपद

याआधीच बीसीसीआयने या दौऱ्यासाठी संघात एक मोठा बदल केला आहे. धडाकेबाज फलंदाज सूर्यकुमार यादवला कर्णधारपदावरून हटवण्यात आले असून, टी-२० संघाच्या नेतृत्वाची धुरा आता मधल्या फळीतील फलंदाज श्रेयस अय्यरकडे सोपवण्यात आली आहे. श्रेयस अय्यरच्या नेतृत्वाखाली भारतीय संघ या दोन महत्त्वाच्या परदेशी दौऱ्यांवर कसा खेळ करतो, याकडे सर्वांचे लक्ष असणार आहे.

कधी रंगणार सामने?

आयर्लंड दौरा: भारतीय संघ २६ जूनपासून आयर्लंडविरुद्धच्या टी-२० मालिकेला सुरुवात करेल.
इंग्लंड दौरा: आयर्लंडमधील सामने संपल्यानंतर जुलै महिन्यापासून भारत आणि इंग्लंड यांच्यातील टी-२० मालिकेचा थरार पाहायला मिळणार आहे.

बीसीसीआयचे अधिकृत पत्रक
“वेगवान गोलंदाज मोहम्मद सिराजला आयर्लंड आणि इंग्लंडविरुद्धच्या टी-२० मालिकेतून विश्रांती देण्यात आली आहे. मेडिकल टीम आणि संघ व्यवस्थापनाच्या सल्ल्यानुसार त्याच्या वर्कलोडवर नियंत्रण ठेवण्यासाठी हा निर्णय घेण्यात आला आहे. निवड समितीने त्याच्या जागी प्रसिध कृष्णाची संघात निवड केली आहे.” असे बीसीसीआयकडून स्पष्ट करण्यात आले आहे.

आयर्लंड – इंग्लंडविरूद्ध च्या मालिकेसाठी भारतीय संघ

श्रेयस अय्यर (कर्णधार), तिलक वर्मा (उपकर्णधार), अभिषेक शर्मा, संजू सॅमसन, इशान किशन, शिवम दुबे, नितीश कुमार रेड्डी, अक्षर पटेल, वॉशिंग्टन सुंदर, वरूण चक्रवर्ती, रवी बिश्नोई, प्रसिध कृष्णा, हर्षित राणा, अर्शदीप सिंग, प्रिन्स यादव, वैभव सूर्यवंशी