Tamilnadu Politics: तामिळनाडू विधानसभा निवडणूक २०२६ च्या निकालांनी संपूर्ण राज्याच्या राजकारणात मोठी खळबळ उडवून दिली आहे. राज्याचे मुख्यमंत्री आणि डीएमकेचे सर्वेसर्वा एम. के. स्टॅलिन यांना त्यांच्या अत्यंत सुरक्षित मानल्या जाणाऱ्या ‘कोलाथुर’ मतदारसंघात पराभवाचा धक्का सहन करावा लागला आहे. अभिनेता विजय याच्या ‘तमिळगा वेत्री कड़गम’ (TVK) पक्षाचे उमेदवार व्ही. एस. बाबू यांनी स्टॅलिन यांचा सुमारे ९ हजार मतांनी पराभव करत ऐतिहासिक विजय नोंदवला आहे. हेही वाचा – प. बंगालमध्ये मुख्यमंत्री कोण होणार? ‘या’ 5 दिग्गज नेत्यांची नावं चर्चेत एकेकाळचा ‘सारथी’च बनला पराभवाचे कारण – या विजयामागे राजकीय सूड आणि संघर्षाची एक मोठी पार्श्वभूमी आहे. विजयी उमेदवार व्ही. एस. बाबू हे एकेकाळी स्टॅलिन यांचे अत्यंत विश्वासू सहकारी होते. २०११ मध्ये जेव्हा कोलाथुर मतदारसंघाची निर्मिती झाली, तेव्हा स्टॅलिन यांच्या निवडणूक प्रचाराची सर्व जबाबदारी बाबू यांच्यावरच होती. मात्र, त्यावेळी अपेक्षेप्रमाणे मोठे मताधिक्य न मिळाल्याने स्टॅलिन यांनी बाबू यांना जबाबदार धरून पदावरून हटवले होते. याच अपमानाचा बदला घेण्यासाठी बाबू यांनी आधी एआयएडीएमके आणि नंतर अभिनेता विजयच्या पक्षात प्रवेश करून थेट मुख्यमंत्र्यांना त्यांच्याच गडात आव्हान दिले. अभ्येद्य गड कोसळला – कोलाथुर हा स्टॅलिन यांचा सर्वात मजबूत गड मानला जात होता. २०११ मध्ये त्यांनी येथून निसटता विजय मिळवला होता, पण त्यानंतर २०१६ आणि २०२१ च्या निवडणुकांमध्ये त्यांनी अनुक्रमे ३७ हजार आणि ७० हजारांहून अधिक मताधिक्याने विजय मिळवून आपले वर्चस्व सिद्ध केले होते. हेही वाचा – ममता बॅनर्जी म्हणाल्या – “माझी मते लुटली जात आहेत,” मतमोजणी थांबली, नेमकं काय घडतंय? मात्र, २०२६ च्या निवडणुकीत ही विजयाची लाट ओसरली असून उत्तर चेन्नईतील या महत्त्वाच्या जागेवर स्टॅलिन यांना हार पत्करावी लागली आहे. तामिळनाडूत तिसऱ्या शक्तीचा उदय – १९६२ पासून तामिळनाडूचे राजकारण प्रामुख्याने डीएमके आणि एआयएडीएमके या दोन पक्षांभोवतीच फिरत राहिले आहे. मात्र, २०२६ च्या निकालांनी ही परंपरा मोडीत काढली आहे. अभिनेता विजयच्या ‘टीव्हीके’ पक्षाने थेट मुख्यमंत्र्यांच्या जागेवर विजय मिळवून राज्यात तिसऱ्या पर्यायाची भक्कम पायाभरणी केली आहे. राज्याच्या पारंपारिक द्रविडी राजकारणाला आता एका नव्या आणि तरुण नेतृत्वाचे मोठे आव्हान उभे राहिले असल्याचे या निकालावरून स्पष्ट होत आहे.
