Tamannaah Bhatia: बॉलिवूड अभिनेत्री तमन्ना भाटिया हिने अभिनयासोबतच आता व्यवसाय क्षेत्रातही ठाम पाऊल टाकले आहे. तिने ‘तमन्ना फाइन ज्वेलरी’ या नावाने प्रीमियम दागिन्यांचा ब्रँड सुरू केला आहे. तिच्या या नव्या उपक्रमाचे अनेकांकडून कौतुक होत असून ‘शुगर कॉस्मेटिक्स’च्या सह-संस्थापक आणि सीईओ विनीता सिंह यांनी तिच्या ब्रँडबाबत मोठा विश्वास व्यक्त केला आहे. विनीता सिंह यांच्या पॉडकास्टमध्ये बोलताना तमन्नाने आपल्या ब्रँडविषयी मनमोकळेपणाने विचार मांडले. ती म्हणाली, “मी स्वतःकडे ब्रँड सुरू करणारी सेलिब्रिटी म्हणून पाहत नाही. मी स्वतःला एक संस्थापक समजते, जी हा व्यवसाय उभा करण्यासाठी पूर्ण ताकदीने काम करत आहे.” केवळ प्रसिद्धीच्या जोरावर महागडे दागिने विकले जाणार नाहीत, याची जाणीव तिला आहे. त्यामुळे उत्पादनाची गुणवत्ता, डिझाइन आणि विश्वासार्हता यावर ती विशेष लक्ष देत असल्याचे तिने सांगितले. तमन्नाने पुढे स्पष्ट केले की, जर तिला फक्त पैसा कमवायचा असता, तर तिने अधिक लोकप्रिय आणि पटकन विकले जाणारे उत्पादन निवडले असते. पण तिने ज्वेलरीसारखा विश्वासावर आधारित आणि जबाबदारीचा व्यवसाय निवडला. “नावापासून गुंतवणुकीपर्यंत आणि कल्पनेपासून अंमलबजावणीपर्यंत प्रत्येक टप्प्यात मी स्वतः सहभागी आहे,” असे ती म्हणाली. अनेक व्यवसाय कल्पना चांगल्या असतात, पण योग्य अंमलबजावणी नसल्यामुळे त्या अपयशी ठरतात, असेही तिने नमूद केले. Tamannaah Bhatia विनीता सिंह यांनी तमन्नाच्या या दृष्टिकोनाचे कौतुक केले. त्या म्हणाल्या, “अनेक ब्रँड प्रॉडक्ट-मार्केट फिट न मिळाल्यामुळे अपयशी ठरतात. मागणी नसताना उत्पादन बाजारात आणले जाते. पण तुम्ही एका स्टोअरपासून छोट्या प्रमाणात सुरुवात केली आणि त्यावर नियंत्रण ठेवले आहे, ही योग्य रणनीती आहे.” यावेळी विनीता सिंह यांनी मोठे विधान करत सांगितले की, जर तमन्ना ‘शार्क टँक इंडिया’ या व्यवसाय रिअॅलिटी शोमध्ये सहभागी झाली असती, तर त्या आपल्या संपूर्ण हंगामातील गुंतवणूक तिच्या ब्रँडमध्ये केल्या असत्या. “कोणत्याही सेलिब्रिटी ब्रँडपेक्षा तुमचा दाव मोठा आहे. तुम्ही शोमध्ये असता तर मी माझे सर्व पैसे तुमच्या ब्रँडमध्ये गुंतवले असते,” असे त्यांनी स्पष्ट केले. सध्या अनेक बॉलिवूड कलाकार स्वतःचे ब्रँड सुरू करत आहेत. दीपिका पदुकोण हिने ८२°ई हा स्किनकेअर ब्रँड सुरू केला आहे, तर कतरिना कैफ हिने ‘के ब्यूटी’ हा मेकअप ब्रँड लाँच केला आहे. कृती सॅनन हिने ‘हायफन’ हा स्किनकेअर ब्रँड बाजारात आणला आहे. तसेच मीरा राजपूत हिने ‘अकाइंड’ आणि ‘धून वेलनेस’ हे उपक्रम सुरू केले आहेत. या पार्श्वभूमीवर तमन्नाचा ज्वेलरी ब्रँड वेगळा ठरत आहे. अभिनयासोबत व्यवसायातही गांभीर्याने काम करण्याची तिची तयारी अनेक तरुणांसाठी प्रेरणादायी ठरत आहे.
