Pune News : काल मंगळवारी झालेल्या तुफान पावसामुळे पुणे शहरातील रस्त्यांना नदीचे स्वरुप आले होते. शहरातील प्रमुख रस्त्यांवर पाणी साचल्याने वाहन चालकांना वाहन चालवताना मोठ्या अडचणींचा सामना करावा लागला. पावसामुळे शहरातील जनजीवन पूर्णतः विस्कळीत झाले होते. मंगळवार दुपारपासून जोर धरलेल्या पावसाने आज पहाटे विश्रांती घेतले आहे.

पुणे शहरातील हडपसर भागात देखील पावसाचा कहर पाहायला मिळाला. येथील विविध भागातील रस्त्यांवर पाणी आल्याने वाहन चालविताना वाहनधारकांची मोठी दमछाक झाली. मान्सूनपूर्व पावसाने प्रशासनाने राबविलेल्या पावसपूर्व कामांची पोल खोल केली आहे. यामुळे पावसाळ्यापूर्वी करण्यात आलेल्या कामाचा पूरता बोजवारा उडल्याचे चित्र पाहायला मिळाले. याचा निषेध पुण्यातील राष्ट्रवादी काँग्रेस पक्ष शरद पवार गटाच्या कार्यकर्त्यांने होडी आंदोल करून नोंदविला आहे. सध्या या अनोख्या आंदोलनाची पुण्यात जोरदार चर्चा पाहायला मिळत आहे.

राष्ट्रवादी काँग्रेस शरद पवार गटाचे कार्यकर्ते गजेंद्र बाबा मोरे यांनी मांजरी येथे प्रशासनाच्या निषेध नोंदविण्यासाठी रस्त्यावर साचलेल्या पाण्यात होडी चालवून होडी आंदोलन केले. महापालिका आणि पीएमआरडीच्या निषेधार्थ हे होडी आंदोलन करण्यात आले. या अनोख्या आंदोलनाने प्रशासन गडबडून गेले आहे. ‌

लक्ष वेधण्यासाठी आंदोलन

मांजरी बुद्रुक येथील मुळा मुठा नदीवर सार्वजनिक बांधकाम विभागाच्या वतीने पूल बांधण्यात आला आहे. तर पुलाच्या पुढील भागात पीएमआरडीएने रस्ता केला आहे. सध्या मांजरी बुद्रुक ग्रामपंचायत ही पुणे महानगरपालिकेत गेल्याने या ठिकाणी पुणे महानगरपालिकेचा कारभार सुरू आहे. या तीनही विभागात समन्वय नसल्याने या ठिकाणीचे काम अर्धवट असून प्रत्येक पावसाळ्यात पूलाच्या या भागात मोठ्या प्रमाणात पाणी साठून राहत आहे. परिणामी साठलेल्या पाण्यातून पायी ये -जा करणाऱ्यांना मोठा त्रास सहन करावा लागत आहे. या पाण्यातून दुचाकीही बाहेर काढणे जिकरीचे ठरत आहे. त्यामुळे तिन्ही विभागांचे लक्ष वेधण्यासाठी मांजरी बुद्रुक येथील सामाजिक कार्यकर्ते तसेच राष्ट्रवादी काँग्रेस पार्टी शरदचंद्र पवार चे पदाधिकारी गजेंद्र बाबा मोरे यांनी आज या साचलेल्या पाण्यात बोट सोडून अनोखे आंदोलन केले.

तीनही विभागातील समन्वयाचा अभाव ; नागरिकांना नाहक त्रास?

मांजरी बुद्रुक ग्रामपंचायत ही पुणे महानगरपालिकेत समाविष्ट करण्यात आली आहे. मांजरी बुद्रुक रेल्वे गेट ते मांजरी बुद्रुक मुळा मुठा नदी स्मशानभूमीपर्यंत पीएमआरडीएच्या माध्यमातून रस्ता रुंदीकरण व सिमेंट काँक्रीटचा रस्त्याचे काम हाती घेण्यात आले. त्याला अनेक वर्ष झाले आहेत. मात्र, रस्त्याचे काम अद्यापही अर्धवट स्थितीत आहे. याशिवाय पुलाचे कामही काही अंशी बाकी आहे. एकाच रस्त्यावरती सार्वजनिक बांधकाम विभाग पीएमआरडीए तसेच आता पुणे महानगरपालिका काम करते आहे. मात्र, अवघ्या दोन ते अडीच किलोमीटरच्या अंतरावर ती केवळ या तिन्ही विभागात समन्वय नसल्याने काम अर्धवट असून, स्थानिक नागरिकांसह वाहन चालकांची मोठी गैरसोय होत आहे.