प्रभात वृत्तसेवा तळेगाव दाभाडे – तळेगाव दाभाडे नगरपरिषदेच्या उपनगराध्यक्षपदी गणेश मोहनराव काकडे यांची बिनविरोध निवड करण्यात आली. तसेच स्वीकृत सदस्यपदी राष्ट्रवादी काँग्रेसकडून कामगार नेते शिवाजी आगळे, अमीर (बाबा) मुलानी आणि भारतीय जनता पक्षाकडून सुरज सातकर यांची नियुक्ती करण्यात आली. नुकत्याच पार पडलेल्या नगरपरिषदेच्या सार्वत्रिक निवडणुकीनंतर नवनिर्वाचित नगरसेवकांची पहिली सर्वसाधारण सभा उपनगराध्यक्ष आणि स्वीकृत सदस्यांच्या निवडीसाठी घेण्यात आली. या सभेचे पीठासन अधिकारी म्हणून नगराध्यक्ष संतोष दाभाडे पाटील यांनी काम पाहिले. सभेस सर्व नगरसेवक उपस्थित होते. उपनगराध्यक्ष पदासाठी उद्योजक व माजी उपनगराध्यक्ष गणेश काकडे यांचा एकमेव अर्ज प्राप्त झाल्याने पीठासन अधिकारी नगराध्यक्ष संतोष दाभाडे पाटील यांनी त्यांची बिनविरोध निवड झाल्याचे घोषित केले.स्वीकृत सदस्यपदासाठी जिल्हा प्रशासन अधिकारी, नगर विकास विभाग, जिल्हाधिकारी पुणे यांच्या शिफारशीनुसार मंजूर झालेली नावे शिवाजी आगळे, अमीर (बाबा) मुलानी व सुरज सातकर यांची घोषणा नगराध्यक्ष संतोष दाभाडे पाटील यांनी सभेत केली. यावेळी नगराध्यक्ष संतोष दाभाडे पाटील व मुख्याधिकारी गिरीश दापकेकर यांनी नवनिर्वाचित उपनगराध्यक्ष, स्वीकृत सदस्य तसेच पहिल्या सर्वसाधारण सभेनिमित्त सर्व उपस्थित नगरसेवकांचे अभिनंदन करून सन्मान केला. सभेचे नियोजन मुख्याधिकारी गिरीश दापकेकर, उपमुख्याधिकारी ममता राठोड व नगरपरिषदेच्या कर्मचाऱ्यांनी केले.
