Talegaon Dabhade – आद्य पत्रकार आचार्य बाळशास्त्री जांभेकर यांच्या निपक्ष व निर्भीड पत्रकारितेची गरज आजच्या वर्तमान काळात समाजाला अधिक असल्याचे प्रतिपादन नगराध्यक्ष संतोष दाभाडे पाटील यांनी केले. तळेगाव दाभाडे नगर परिषदेमध्ये आचार्य बाळशास्त्री जांभेकर यांच्या २१४ व्या जयंतीनिमित्त आयोजित कार्यक्रमात अध्यक्षस्थानावरून ते बोलत होते. कार्यक्रमास उपनगराध्यक्ष गणेश काकडे, मुख्याधिकारी गिरीश दापकेकर, ज्येष्ठ पत्रकार सोनबा गोपाळे, अतुल पवार, गटनेते इंद्रकुमार ओसवाल, निखिल भगत, विनोद भेगडे, सागर बोडके, नगरसेविका शोभा परदेशी, सोनाली दरेकर, अश्विनी शेळके, मनीषा म्हाळसकर, सिया चिमटे, उपमुख्याधिकारी ममता राठोड, नगरपरिषदेतील अधिकारी-कर्मचारी तसेच शहर परिसरातील पत्रकार उपस्थित होते. कार्यक्रमाच्या प्रारंभी नगराध्यक्षांच्या हस्ते जांभेकर यांच्या प्रतिमेचे पूजन करण्यात आले. उपनगराध्यक्ष गणेश काकडे यांनी पत्रकारांनी समाजाचा आरसा म्हणून कार्य करावे, असे मत व्यक्त केले. ज्येष्ठ पत्रकार सोनबा गोपाळे यांनी जांभेकर यांच्या जीवनकार्याचा आढावा घेतला. मुख्याधिकारी गिरीश दापकेकर यांनी प्रास्ताविकात स्वातंत्र्यपूर्व काळातील प्रतिकूल परिस्थितीत जांभेकर यांनी समाजाला योग्य दिशा दिली व अनिष्ट प्रथांवर लेखणीच्या माध्यमातून अंकुश ठेवला, असे सांगितले. कार्यक्रमाचे सूत्रसंचालन भास्कर वाघमारे यांनी तर आभार प्रदर्शन उपमुख्याधिकारी ममता राठोड यांनी केले.
