पिंपरी, (प्रतिनिधी) – रावेतमधील बहुचर्चित मेट्रो इको पार्कमधील झाडेवाचविण्यासाठी झाडांना पुरेशा प्रमाणात पाणी उपलब्ध करून द्या. त्यांची निगा राखा, अशा शब्दांत जिल्हाधिकारी सुहास दिवसे यांनी सार्वजनिक बांधकाम विभागाला निर्देश दिले आहेत.

मेट्रो इको पार्कमधील झाडांना पुरेशा प्रमाणात पाणी उपलब्ध होत नसल्याने ही झाडे वाळली आहेत. या झाडांना वाचविण्यासाठी मेट्रो इको पार्क बचाव समिती आणि ग्रीन आर्मीसह विविध गटांचे प्रतिनिधीत्व करणार्‍या नागरिकांनी नुकतीच जिल्हाधिकार्‍यांची भेट घेतली. यावेळी इको पार्कमधील झाडांकडे केले जाणारे दुर्लक्ष व अन्य बाबी त्यांच्या निदर्शनास आणुन दिल्या. यावेळी दिवसे यांनी सार्वजनिक बांधकाम विभागाला याबाबतचे निर्देश दिले.

ग्रीन आर्मीचे संस्थापक प्रशांत राऊळ यांनी उद्यानाच्या दुरवस्थेबाबत अधिकार्‍यांना दिलेल्या माहितीतील तफावत अधोरेखित करून नागरिकांच्या तक्रारी मांडल्या. राऊळ यांनी आरटीआय दस्तावेज, मीडिया कव्हरेज आणि उद्यानाच्या दुर्लक्षाचा छायाचित्रे आदी पुरावे सादर केले. तसेच झाडे वाचविण्यासाठी तातडीने कार्यवाही करण्याची गरज असल्याची बाब त्यांच्या निदर्शनास आणुन दिली.

सुरक्षेबाबत आणि उद्यानाच्या उद्दिष्टाच्या जमिनीच्या वापराबाबत जिल्हाधिकार्‍यांनी सुरुवातीच्या काळात चिंता व्यक्त केली असली तरी या बैठकीतून सकारात्मक परिणाम दिसून आला. जिल्हाधिकार्‍यांनी पारदर्शकतेची गरज ओळखून मर्यादित संख्येने नागरिकांना उद्यानाची पाहणी करण्याची परवानगी देण्याचे मान्य केले.

दरम्यान, नागरिकांना त्यांच्या भेटीदरम्यान उद्यानाची स्थिती समाधानकारक नाही. अनेक झाडे मृत झाल्याचे आढळून आले.यावेळी बाजू ऐकून घेत, जिल्हाधिकारी दिवसे यांनी उद्यानाच्या देखभालीबाबत नाराजी व्यक्त केली आणि समस्या सोडवण्यासाठी वैयक्तिक निधी निधी उपलब्ध करुन देण्याचा संताप व्यक्त केला.

नागरिकांच्या दबावामुळे जिल्हाधिकार्‍यांनी मेट्रो इको पार्कमधील सर्व झाडांची छाटणी, पाणी घालणे आणि त्यांची संपूर्ण देखभाल करण्याचे सार्वजनिक बांधकाम विभागाला तात्काळ आदेश जारी केले. शिवाय, जबाबदारी सुनिश्चित करण्यासाठी नागरिकांनी देखभालीच्या कामावर देखरेख करण्याचा इरादा व्यक्त केला. यावेळी मनसे नेते हेमंत संभूस यांनी मेट्रो इको पार्क दीर्घकाळ बंद राहिल्याबद्दल चिंता व्यक्त करत वृक्षसंवर्धनाकडे लक्ष वेधले.

तात्पुरता पाणीपुरवठा पीडब्ल्युडीकडून
मेट्रो इको पार्कमधील झाडे जगविण्यासाठी त्यांना पुरेशा प्रमानात पाणीपुरवटा करण्याची गरज अधोरेखित झाली. यावर तातडीची पावले उचलण्यासाठी या पार्कमधील झाडांना पाणी पुरवण्याची जबाबदारी सार्वजनिक बांधकाम खात्याने सोपविण्यात आली आहे.