T20 World Cup : इंग्लंड अँड वेल्स क्रिकेट बोर्डाने (ECB) भारत आणि श्रीलंकेत ७ फेब्रुवारी ते ८ मार्च २०२६ दरम्यान होणाऱ्या आयसीसी पुरुष टी-२० वर्ल्ड कपसाठी १५ सदस्यीय प्रोव्हिजनल संघ जाहीर केला आहे. युवा फलंदाज हॅरी ब्रूकवर पहिल्यांदाच मोठ्या स्पर्धेत कर्णधारपदाची धुरा सोपवण्यात आली आहे, तर दुखापतीनंतर जोफ्रा आर्चरचे संघात पुनरागमन झाले आहे. मात्र, स्फोटक फलंदाज आणि ऑलराऊंडर लियाम लिविंगस्टनला संघाबाहेर ठेवण्यात आले आहे, ज्यामुळे क्रिकेट चाहत्यांमध्ये मोठी चर्चा सुरू झाली आहे. हॅरी ब्रूकच्या नेतृत्वाखालील इंग्लंड संघात अनुभवी जोस बटलर, फिल सॉल्ट, बेन डकेट आणि विल जॅक्स यांच्यासारखे आक्रमक फलंदाज आहेत. वेगवान गोलंदाजीची कमान जोफ्रा आर्चरकडे असेल, जो सध्या दुखापतीतून सावरत आहे. स्पिन विभागात आदिल रशीद आणि रेहान अहमद यांची साथ असेल. संघात जोश टंग आणि ल्यूक वुड यांसारखे नवे चेहरेही आहेत. विशेष म्हणजे, आयपीएल २०२६ च्या लिलावात सनरायझर्स हैदराबादच्या मालकिण काव्या मारनने १३ कोटी रुपये खर्चून विकत घेतलेल्या लियाम लिविंगस्टनला इंग्लंडच्या वर्ल्ड कप संघात स्थान मिळाले नाही. लिविंगस्टनने टी-२० इंटरनॅशनलमध्ये ६० सामन्यात ५९ षटकार आणि ५४ चौकार मारले आहेत, तरीही मार्च २०२५ पासून तो संघाबाहेर आहे. त्याचा शेवटचा टी-२० इंटरनॅशनल सामना फेब्रुवारी २०२५ मध्ये भारताविरुद्ध झाला होता. या निर्णयामुळे लिविंगस्टनच्या चाहत्यांमध्ये निराशा आहे. या वर्ल्डकपमध्ये इंग्लंडचा संघ ग्रुप सीमध्ये आहे, ज्यात बांगलादेश, इटली, वेस्ट इंडिज आणि नेपाळ यांचा समावेश आहे. दोनवेळचा विजेता इंग्लंड संघ या स्पर्धेत तिसरे जेतेपद पटकावण्याच्या इराद्याने मैदानात उतरेल. संघाची अंतिम निवड खेळाडूंच्या फिटनेस आणि फॉर्मवर अवलंबून असणार आहे. टी-20 वर्ल्ड कपसाठी इंग्लंडचा संघ – हॅरी ब्रूक (कर्णधार), रेहान अहमद, जोफ्रा आर्चर, टॉम बँटन, जेकब बेथेल, जोस बटलर, ब्रायडन कार्स, सॅम करन, लियाम डॉसन, बेन डकेट, विल जॅक्स, जेमी ओव्हरटन, आदिल रशीद, फिल सॉल्ट, जोश टंग आणि ल्यूक वुड.
