T20 World Cup 2024 : सुपर-8 पूर्वी टीम इंडियाची चिंता वाढली, स्फोटक फलंदाजाच्या हाताला दुखापत, समोर आलं ‘हे’ अपडेट…
T20 World Cup 2024 ,Super 8 (IND vs AFG) : जगातील नंबर वन टी-20 फलंदाज सूर्यकुमार यादव सोमवारी दुखापतग्रस्त झाला. प्रशिक्षणादरम्यान त्याच्या हाताला दुखापत झाल्याने टीम इंडियाची चिंता वाढली आहे.
वास्तविक, काल भारतीय संघाने बार्बाडोसच्या ब्रिजटाऊनमध्ये सराव सत्राला सुरुवात केली. यावेळी नेटमध्ये फलंदाजी करताना या स्टार फलंदाजाच्या हाताला दुखापत झाली, त्यानंतर फिजिओने येऊन त्याच्यावर प्राथमिक उपचार केले. यानंतर स्टार खेळाडूने पुन्हा एकदा फलंदाजी केली. दुखापत फारशी गंभीर नसली तरी समस्या वाढल्यास टीम इंडियाचे टेन्शन वाढू शकते. याबाबत अद्याप कोणतीही अधिकृत माहिती समोर आलेली नाही.
बार्बाडोसमध्ये गुरुवारी भारताचा पहिला सुपर 8 सामना अफगाणिस्तानशी होणार आहे. 2007 च्या चॅम्पियनसाठी कॅरेबियनमधील हा पहिलाच सामना असेल. वास्तविक, संघाने आपले सर्व गट टप्प्यातील सामने अमेरिकेत खेळले. भारताने न्यूयॉर्कमध्ये तीन सामने खेळले, तर शनिवारी फ्लोरिडामध्ये कॅनडाविरुद्धचा त्यांचा शेवटचा सामना पावसामुळे वाहून गेला, त्यामुळे भारताला त्यांच्या प्लेइंग 11 चा प्रयोग करण्याची संधी मिळाली नाही.
सूर्यकुमार हा टीम इंडियाच्या महत्त्वाच्या खेळाडूंपैकी एक आहे. त्याने अमेरिकेविरुद्ध नाबाद अर्धशतक झळकावले. सूर्याने 50 धावा केल्या होत्या. 49 चेंडूंचा सामना करताना त्याने 2 चौकार आणि 2 षटकार मारले. तो पाकिस्तानविरुद्ध काही विशेष करू शकला नाही. पाकिस्तानविरुद्ध 7 धावा करून सूर्या बाद झाला होता.
सुपर-8 फेरी 19 जूनपासून सुरू…
सुपर-8 चे आठ संघ निश्चित झाले आहेत. सुपर-8 फेरी 19 जूनपासून सुरू होणार आहे. या विश्वचषकात 20 संघ खेळण्यासाठी आले होते, ज्यांची प्रत्येकी पाच गटात विभागणी करण्यात आली होती. प्रत्येक गटातील अव्वल दोन संघ सुपर-8 मध्ये पोहोचले आहेत. यामध्ये भारत, ऑस्ट्रेलिया, दक्षिण आफ्रिका, वेस्ट इंडिज, अफगाणिस्तान, अमेरिका, इंग्लंड आणि बांगलादेश यांचा समावेश आहे.
दरम्यान, भारताला सुपर 8 मध्ये तीन सामने खेळायचे आहेत. टीम इंडियाचा पहिला सामना अफगाणिस्तानविरुद्ध आहे. हा सामना 20 जून रोजी होणार आहे. यानंतर भारत आणि बांगलादेश यांच्यात सामना होणार आहे. हा सामना 22 जून रोजी होणार आहे. टीम इंडियाचा तिसरा सामना ऑस्ट्रेलियाशी होणार आहे. हा सामना 24 जून रोजी होणार आहे. टी-20 विश्वचषक 2024 चा पहिला उपांत्य सामना 26 जून आणि दुसरा उपांत्य सामना 27 जून रोजी खेळवला जाईल. बार्बाडोस येथे 29 जून रोजी अंतिम सामना होणार आहे.
