Satara: म्हसवड (ता. माण) येथील सोलर पॅनल प्रकल्पातील केबल वायर चोरीचा गुन्हा म्हसवड पोलिसांनी उघडकीस आणला आहे. याप्रकरणी सोलापूर आणि धाराशिव जिल्ह्यांतील दोघांना अटक करण्यात आली असून, चोरीस गेलेली सुमारे दोन लाख 58 हजार रुपये किमतीची केबल पोलिसांनी जप्त केली आहे. म्हसवड पोलीस आणि सातारा स्थानिक गुन्हे शाखेने संयुक्तपणे ही कारवाई केली.

म्हसवड पोलीस ठाण्याच्या हद्दीतील वरकुटे मलवडी, (ता. माण) येथील सोलर पॅनल प्रकल्पातून स्ट्रिंग केबल वायर आणि इतर वायर चोरीला गेल्याची तक्रार संबंधित कंपनीच्या सुपरवायझरने पोलिसांकडे केली होती. या प्रकरणी म्हसवड पोलीस ठाण्यात गुन्हा दाखल करण्यात आला होता. पोलीस अधीक्षक निखिल पिंगळे, अपर पोलीस अधीक्षक वैशाली कडूकर आणि दहिवडी विभागाचे उपविभागीय पोलीस अधिकारी रणजित सावंत यांनी गुन्हे उघडकीस आणण्याच्या सूचना दिल्या. त्यानुसार पोलीस निरीक्षक विश्वजित घोडके आणि म्हसवड पोलीस ठाण्याचे प्रभारी अधिकारी सहायक पोलीस निरीक्षक संदीप पोमण यांच्या मार्गदर्शनाखाली म्हसवड पोलीस व स्थानिक गुन्हे शाखेचे संयुक्त पथक तयार करण्यात आले. या पथकाने गोपनीय बातमीदार आणि तांत्रिक माहितीच्या आधारे तपासाची चक्रे फिरवली.

या तपासात आदर्श दत्तात्रय आटपाडकर (रा. पंढरपूर, जि. सोलापूर) आणि अजय भीमराव पवार (रा. सांजा, जि. धाराशिव) यांची नावे निष्पन्न झाली. पोलिसांनी दोघांना ताब्यात घेऊन चौकशी केली असता, त्यांनी संगनमताने केबल वायर चोरल्याचे तपासात निष्पन्न झाले. त्यांच्याकडून चोरीस गेलेली सुमारे दोन लाख 58 हजार रुपये किमतीची केबल वायर जप्त करण्यात आली आहे.
या कारवाईत स्थानिक गुन्हे शाखा आणि म्हसवड पोलीस ठाण्यातील अधिकारी व कर्मचार्‍यांनी सहभाग घेतला. संबंधित पथकाचे पोलीस अधीक्षक निखिल पिंगळे आणि अपर पोलीस अधीक्षक वैशाली कडूकर यांनी अभिनंदन केले आहे.